Ачылта 2 - Јаҥы Кереес

Ефестеги серкпеге

¹ Ефестеги серкпениҥ ангелине бичи: оҥ колында јети јылдыс тудунып алганы, јети алтын јарыткыштыҥ ортозыла базып јӱргени мынайда айдат:

² «Эдип јӱрген керектериҥди, уур ижиҥди де, чыдууҥды да билерим. Анайда ок јаман улусты кӧрӱп албазыҥды, бойлорын апостолдор деп аданган улусты ченеп, олор тӧгӱнчи болгонын јартына чыкканыҥды билерим.

³ Сенде чыду бар, Меге болуп сеге кӧпти ӧдӧргӧ келишкен, је сен јобобогоҥ.

⁴ Је сеге удура айдатаным бар: сен баштапкы сӱӱжиҥди јылыйтып койгоҥ.

⁵ Анайдарда, кайдаҥ јыгылганыҥды эзеп, кинчегиҥди алынып, башкыдагы керектерди эт. Андый эмес болзо, кинчегиҥди алынбазаҥ, удабас сеге келип, јарыткыжыҥды јеринеҥ јылдырып койорым.

⁶ Је сенде јакшызы бар, ол – николаиттердиҥ эдип јӱрген керектерин Мен чилеп јаман кӧрӱп турганыҥ.

⁷ Тын серкпелерге нени айдып турганын кулакту кижи уксын: јеҥип турганга Кудайдыҥ райында ӧзӱп турган јӱрӱм агажынаҥ јиирге берерим».

Смирнадагы серкпеге

⁸ База Смирнадагы серкпениҥ ангелине бичи: ӧлгӧн Бойы тынданган Баштапкы ла Калганчы мынайда айдат:

⁹ «Сениҥ керектериҥди, кыйыныҥды да, тӱреҥиҥди де (чындап, сен бай) билерим, је сен бай эмейиҥ. „Иудейлер бис“ дешкендердиҥ јамандаганын да билерим. Олор иудейлер де эмес, сатананыҥ јууны.

¹⁰ Сеге ӧдӧтӧн кыйын-шырадаҥ коркыба. Бат, кӧрмӧс слерди ченейин деп, ортогордоҥ кезигерди тӱрмеге сугар. Слер он кӱн кыйналарыгар. Ӧлӧргӧ јетире чындык бол, кайрал эдип сеге јӱрӱм берерим.

¹¹ Тын серкпелерге нени айдып турганын кулакту кижи уксын: јеҥип турганы экинчи ӧлӱмнеҥ каршу албас».

Пергамдагы серкпеге

¹² База Пергамдагы серкпениҥ ангелине бичи: эки мистӱ кылыштузы мынайда айдат:

¹³ «Сениҥ керектериҥди, сатананыҥ ширеези турган јерде јуртаганыҥды билерим. Анайда ок Меге чындык болгоныҥды, керек дезе слерде, сатана јуртаган јерде, чындык Антипа керечим ӧлтӱртип койордо, Меге бӱткениҥнеҥ јана тӱшпегениҥди де билерим.

¹⁴ Је сеге эмеш удура айдатаным бар: сенде Валаамныҥ ӱредӱзинеҥ тудунган улус бар. Ол Израильдиҥ улузы чалуга тайганды јип, балыр јӱрӱм јӱрзин деп, олорды астырарга Валакты ӱредип койгон.

¹⁵ Анайда ок сенде де Мениҥ кӧрӧр кӱӱним јок николаиттер ӱредӱзинеҥ тудунган улус бар.

¹⁶ Анайдарда, кинчегиҥ алын. Алынбазаҥ, удабастаҥ сеге келип, оозымныҥ кылыжыла ол улусла јуулажарым.

¹⁷ Кулакту кижи уксын, Тын серкпелерге нени айдып турганын: јеҥип турганга јажытту манна јиирге берерим, база ак-таш, ташка бичилген јаҥы атла адаарым. Алып јатканнаҥ башка, ол атты кем де билбес».

Фиатирдеги серкпеге

¹⁸ База Фиатирдеги серкпениҥ ангелине бичи: кӧзи болзо от јалбыжындый, буды болзо јестий Кудайдыҥ Уулы мынайда айдат:

¹⁹ «Эдип јӱрген керектериҥди, сӱӱжиҥди де, бӱдӱмјиҥди де, Кудайга јалчы болуп јӱргениҥди де, чыдууҥды да билерим, калганчы керектериҥ баштапкызынаҥ јаан болгонын да билерим.

²⁰ Бойын јарлыкчы деп аданып турган Иезавель деп ӱй кижиниҥ табына салдырып турганыҥ учун сеге удура айдатаным бар. Ол Мениҥ кулдарымды ӱредип, балыр кылынзын, чалуга тайганды јизин деп, астырып јат.

²¹ Мен ого балыр кылыныжында кинчегин алынар ӧй бергем, је ол кинчегин алынбаган.

²² Бат, ол эдип јӱрген керектериниҥ кинчектерин алынбаза, Мен оны оору-јоболдыҥ тӧжӧгине, оныла кожо балыр кылынып јӱргендерди улу ачу-коронго таштап јадым.

²³ Балдарын да ӧлтӱрерим, Мен – кижиниҥ санаазын ла јӱрегин ченеечи деп, ончо серкпелер билип алар. Кажыгарга ла эткен керектеригер аайынча јандыра берерим.

²⁴ Слерге дезе, база бу ӱредӱдеҥ тудунбай турган, сатананыҥ тереҥ јажыттары дегенди билбес Фиатирдеги арткан улуска, айдып турум: слерге ӧскӧ јӱк артпазым.

²⁵ Је келгенчем, бойыгарда барын бек тудыгар.

²⁶ Јеҥип, Мениҥ керектеримди учына јетире бӱдӱрип турган кижиге калыктардыҥ бажын билер јаҥ берерим.

²⁷ Ол калыктарды темир тайакла кабырар, той балкаштаҥ эткен јыракыларды чылап оодор. Мен де Адамнаҥ јаҥ алганым чылап,

²⁸ ого таҥ чолмонды берерим.

²⁹ Тын серкпелерге нени айдып турганын кулакту кижи уксын».