Ачылта 17 - Јаҥы Кереес

Аҥга минген ӱй кижи

¹ Јети айакту јети ангелдиҥ бирӱзи келип, меге айткан: – Бери кел, кӧп сууларда отурган улу балыр ӱй кижини јаргылаганын кӧргӱзейин.

² Оныла кожо јердеги каандар балыр кылынган, оныҥ балырыныҥ аракызынаҥ јерде јуртаган улус эзирген.

³ Ангел мени ээн јерге Тында апарган. Кызыл аҥга минген ӱй кижини кӧрӱп ийгем. Бу аҥ бастыра бойы Кудайды јамандаган ат-јолдорло бичилген. Ол јети башту ла он мӱӱстӱ болгон.

⁴ Ӱй кижи кызыл ла кубакай-кызыл кийимдӱ болгон, алтынла, баалу-чуулу таштарла, эрјинеле кееркедилген. Колында алтын айак тудунып алган. Айак јескинчиле, балырыныҥ быјарыла толо болгон.

⁵ Ӱй кижиниҥ маҥдайында јажытту ат бичилген: «Улу Вавилон, балыр ӱй улустыҥ ла јердеги быјардыҥ энези».

⁶ Ӱй кижи агарулардыҥ канынаҥ ла Иисустыҥ керечилериниҥ канынаҥ эзирик болгонын кӧрӱп ийгем. Оны кӧрӧлӧ, сӱрекей кайкагам.

⁷ Ангел меге айткан: – Не кайкап туруҥ? Сеге бу ӱй кижиниҥ ле оны алып јӱрген јети башту, он мӱӱстӱ аҥныҥ јажыдын айдып берейин.

⁸ Сен кӧргӧн аҥ – болгон, эмди – јок. Ол алыс јердеҥ чыгып, бойыныҥ ӧлӱмине барар. Телекейдиҥ бӱткенинеҥ ала јӱрӱмниҥ тӱрбегинде ады-јолдоры бичилбеген, јерде јуртаган улус аҥды кӧрӱп, кайкажар, нениҥ учун дезе ол болгон, эмди јок, је ойто келер.

⁹ Мында ойгор санаа керек. Јети баш – ол ӱй кижи отурган јети тӧҥ,

¹⁰ база јети каан. Бежӱзи ӧлгӧн, бирӱзи эзен, бирӱзи – келгелек. Келзе, мында узак артпас.

¹¹ Болгон ло эмди јок аҥ – ол сегизинчи, јетӱниҥ тоозынаҥ. Ол бойыныҥ ӧлӱмине барат.

¹² Сен кӧргӧн он мӱӱс – ол каандыкты алгалак он каан, је олор каандар чылап, аҥла кожо јаҥды бир саатка алар.

¹³ Олордыҥ санаазы јаҥыс, бойлорыныҥ кӱчин ле јаҥын аҥга берер.

¹⁴ Олор Кураанга удура јуулажар, је Кураан олорды јеҥер, нениҥ учун дезе Ол – кайракандардыҥ Кайраканы, каандардыҥ Кааны. Оныла кожо јӱргендер айттырылган, талдалган ла чындык улус болуп јадылар.

¹⁵ База ангел меге айткан: – Сен сууларды кӧрдиҥ, олордо балыр ӱй кижи отуры, ол суулар – калык ла јондор, элдер ле тилдер.

¹⁶ Сен кӧргӧн он мӱӱс ле аҥ бойы балыр ӱй кижини јаман кӧрӧр, тӱредер, јылаҥаштаар, эди-канын јиир, отко ӧртӧп койор.

¹⁷ Олордыҥ јӱрегине Кудай Бойыныҥ табын бӱдӱрер кӱӱн салган. Олор Кудайдыҥ сӧзи бӱтпегенче, ончо јаҥды аҥга берер учурлу болгон.

¹⁸ Сен кӧргӧн ӱй кижи дезе јердеги каандарды бийлеген улу кала.