Ачылта 16 - Јаҥы Кереес

Кудайдыҥ чугулы

¹ Мыныҥ кийнинде байзыҥнаҥ јети ангелге айткан тыҥ ӱнди угуп ийгем: – Барып, Кудайдыҥ чугулыныҥ јети айагын јерге урыгар.

² Баштапкы ангел барып, айагын јерге урган. Аҥныҥ таҥмазы бар, оныҥ сӱрине бажырып јӱрген улустыҥ эди-канында јаман ла ириҥдӱ ӧҥзӱре шыркалар боло берген.

³ Экинчи ангел айагын талайга урган. Суу ӧлгӧн кижиниҥ каны ошкош кан боло берген, талайдагы ончо тындулар ӧлӱп калган.

⁴ Ӱчинчи ангел айагын сууларга ла агындарга урган. Олор кан боло берген.

⁵ Сууларды башкарар ангелдиҥ мынайда айтканын угуп ийгем: – Сен, Кайракан, акту, Сен – Бары ла Болгоны, Сен Агару, нениҥ учун дезе мыны јаргылагаҥ.

⁶ Олор агарулардыҥ ла јарлыкчылардыҥ канын тӧккӧн учун, Сен олорго кан ичерге бергеҥ. Олор бого туруп јат.

⁷ Тагылдаҥ айткан ӧскӧ ӱнди угуп ийгем: – Эйе, Кайракан, кӱчтӱдеҥ кӱчтӱ Кудай, јаргыларыҥ чын ла чындык!

⁸ Тӧртинчи ангел айагын кӱнге урган: кӱнге улусты отло ӧртӧдӧри берилген.

⁹ Улус коркышту изӱге ӧртӧткӧн. Олор бу кату-јоболдыҥ бажын билер Кудайдыҥ адын јамандап, Ого мак јетирбегендер ле баштанбагандар.

¹⁰ Бежинчи ангел айагын аҥныҥ ширеезине урган: аҥныҥ каандыгы караҥуй боло берген. Олор оору-сыстаҥ тилдерин тиштенип тургандар.

¹¹ Оору-сызынаҥ ла шырказынаҥ улам Теҥери Кудайын јамандап, је эткен керектериниҥ кинчегин алынбагандар.

¹² Алтынчы ангел айагын улу Евфрат сууга урган: кӱнчыгыштаҥ каандарга јол белен болзын деп, оныҥ суузы сооло берген.

¹³ Бакадый ӱч кара јелбисти кӧрӱп ийгем. Олор јелбегенниҥ оозынаҥ, аҥныҥ оозынаҥ ла тӧгӱн јарлыкчыныҥ оозынаҥ чыгып јаткандар.

¹⁴ Бу – билдилер эдеечи шилемирдиҥ јелбистери. Олор бастыра телекейдиҥ каандарына, олорды кӱчтӱдеҥ кӱчтӱ Кудайдыҥ улу кӱнинде јуу-согушка јуурга, барып јадылар.

¹⁵ – Бат, уурчы чылап сакыбас јанынаҥ келерим. Јылаҥаш баспайын, уйадымды кижи кӧрбӧзин деп, ойгу болуп, кийимин чеберлеген кижи кежиктӱ.

¹⁶ Олор каандарды еврейлеп Армагеддон деп јерге јууп алгандар.

¹⁷ Јетинчи ангел айагын кейге урган. Теҥериниҥ байзыҥындагы ширеедеҥ: «Бӱтти!» – деген тыҥ ӱн угулган.

¹⁸ Јалкындар јалтылдап, кӱкӱрттер кӱркӱреп, ӱндер угулып, улу-јаан јерсилкиниш болгон. Андый тыҥ, андый улу-јаан јерсилкиниш кижи јерде табылганынаҥ бери болбогон.

¹⁹ Улу кала ӱч башка јарылган, калыктардыҥ калалары келип тӱшкен. Кудай улу Вавилонды эске алып, ого Бойыныҥ чугулыныҥ атыйланыжыныҥ аракылу айагынаҥ ичерге берген.

²⁰ Кандый ла ортолык кача берген, кырлар јоголып калган.

²¹ Талант кемдӱ јаан мӧндӱр теҥеридеҥ улуска тӱшкен. Мӧндӱрдеҥ болгон кату-јобол учун улус Кудайды јамандаган, нениҥ учун дезе бу коркышту кату-јобол болгон.