Ачылта 15 - Јаҥы Кереес

¹ Теҥериде улу ла кайкамчылу ӧскӧ билдини кӧрӱп ийгем – ол калганчы јети кату-јоболду јети ангел болгон. Бу кату-јоболдорло Кудайдыҥ чугулы туузылып јаткан.

² Отло колынган шил талайдый немени кӧрӱп ийгем. Аҥды, оныҥ сӱрин ле ады-јолыныҥ тоозын јеҥген улус Кудайдыҥ јадагандарын тудунганча, шил талайда турулар.

³ Олор Кудайдыҥ Моисей кулыныҥ сарынын ла Кураанныҥ сарынын сарнап, айдыжып јадылар: – Э-э, Кайракан, кӱчтӱдеҥ кӱчтӱ Кудай, эдип јӱрген керектериҥ улу ла кайкамчылу! Э-э, агару улустыҥ Кааны, јолдорыҥ чындык ла чын!

⁴ Кем Сенеҥ айабас, Кайракан, адыҥды кем алкабас? Јаҥыс Сен агару. Ончо калыктар келип, алдыҥа бажырар, нениҥ учун дезе чындык керектериҥ ачылган.

⁵ Мыныҥ кийнинде кӧрзӧм, теҥериде байзыҥныҥ ич јаны – керениҥ чадыры ачылган.

⁶ Байзыҥнаҥ јети кату-јоболду јети ангел чыгып келген. Олор ару ла јаркындалган кеден кийимдӱ болгон, кӧгӱстей алтын курлар курчалган.

⁷ Тӧрт тындуныҥ бирӱзи јети ангелге јети алтын айак берген. Бу айактар ӱргӱлји чакка јӱреечи Кудайдыҥ чугулыла толо болгон.

⁸ Байзыҥ Кудайдыҥ магынаҥ ла кӱчинеҥ ышла толгон. Јети ангелдиҥ јети кату-јоболы божобогончо, байзыҥга кем де кирип болбогон.