Ачылта 14 - Јаҥы Кереес

Јаҥы сарын

¹ Кӧрзӧм, Сион кырда Кураан туру, Оныла кожо 144 муҥ кижи. Маҥдайларында Оныҥ Адазыныҥ ады-јолы бичилген.

² Теҥеридеҥ кӧп суулардыҥ, јаан кӱкӱрттиҥ табыжындый ӱн угуп ийгем. База улус бойлорыныҥ јадагандарыла ойногондо чыгатан ӱндий ӱн угуп ийгем.

³ Олор ширеениҥ алдында, тӧрт тындуныҥ ла башчылардыҥ алдында јаҥы сарын сарнап јат. Јердеҥ садылып алган байагы 144 муҥ кижидеҥ башка, бу сарынды кем де ӱренип албаган.

⁴ Бойлорын ӱй улусла быјарсытпаган улус бу, нениҥ учун дезе олор ару бойлоры артып калгандар. Кураан кайдаар ла барганда, Оныҥ кийнинеҥ барып турган улус бу. Олор баштапкы кат-јиилектер чилеп, Кудайга ла Кураанга улустаҥ садылып алган.

⁵ Олордыҥ сӧстӧринеҥ тӧгӱн табылбаган. Кудайдыҥ ширеези алдында олордо јек јок.

Ӱч ангел

⁶ Теҥериде учуп бараткан ӧскӧ ангелди кӧрӱп ийгем. Јерде јуртаган улуска, кандый ла укка, ӱйеге, тилге ле калыкка јарлаарга, ол мӧҥкӱлик Јакшылыкту Јарлу болгон.

⁷ Ол тыҥ ӱнденип айткан: – Кудайдаҥ айап, Ого мак јетиригер, нениҥ учун дезе Оныҥ јаргызыныҥ ӧйи једип келди. Теҥерини ле јерди, талайды ла суулардыҥ агындарын јайаган Јайаачыга бажырыгар.

⁸ Оныҥ кийнинеҥ экинчи ангел учуп, айткан: – Келип тӱшти, келип тӱшти улу Вавилон! Ол кычаныҥ ла балырдыҥ аракызыла ончо калыктарды сугарган.

⁹ Олордыҥ кийнинеҥ ӱчинчи ангел учуп, тыҥ ӱнденип айткан: – Аҥга ла оныҥ сӱрине бажырып, маҥдайына эмезе колына таҥма алынып турган кижи

¹⁰ Кудайдыҥ атыйланыжыныҥ чейилбеген аракызынаҥ, Оныҥ чугулыныҥ айагында белетелген аракыдаҥ ичер. Ол агару ангелдер алдында ла Кураан алдында отло, кӱкӱрле кыйнадылар.

¹¹ Кыйыныныҥ ыжы ӱргӱлји чакка кӧдӱрилер. Аҥга ла оныҥ сӱрине бажырып, оныҥ адыныҥ таҥмазын алынып турган улус тӱште де, тӱнде де амыр билбес.

¹² Мында Кудайдыҥ јакылталарын чеберлеген ле Иисуска чындык агарулардыҥ чыдузы керек.

¹³ Теҥеридеҥ айткан ӱнди угуп ийгем: – Мыны бичи: «Ӧлгӧндӧр, – Кайраканга бӱдӱп ӧлӱп јаткандар, – эмдидеҥ ары кежиктӱ. Эйе, – деп, Тын айдат, олор бойыныҥ ижинеҥ токынаар, олордыҥ керектери кийнинеҥ барып јат».

Јердиҥ ажын кескени

¹⁴ Кӧрзӧм, ак булут, булутта Кижи Уулына тӱҥейи отуры. Бажында алтын ӧрӱмел, колында курч серп.

¹⁵ Байзыҥнаҥ ӧскӧ ангел чыгып, булутта Отурганга тыҥ ӱнденип кыйгырган: – Серпиҥди ийип, ашты кес, нениҥ учун дезе аш кезер ӧй једип келген, јерде аш быжып калган.

¹⁶ Булутта Отурганы серпин јерге чачкан, јердиҥ ажы кезилген.

¹⁷ Ӧскӧ ангел теҥеридеги байзыҥнаҥ чыгып келген, база курч серптӱ.

¹⁸ Отты башкарар ӧскӧ ангел тагылдаҥ чыгып келеле, курч серптӱге тыҥ ӱнденип кыйгырган: – Курч серпиҥди ийип, јердеги виноградтыҥ сабактарын кес, нениҥ учун дезе кат-јиилектери быжып калган.

¹⁹ Ангел серпин јерге чачып, јердеги виноградты јууп, Кудайдыҥ чугулыныҥ улу-јаан сыскырузына таштаган.

²⁰ Кат-јиилектер каланыҥ тыштындагы сыксыруда тепселген. Сыксырудаҥ кан чыгып, аттыҥ ӱйгенине де јетире кӧдӱрилип, 1600 стадияга јайылган.