Ачылта 1 - Јаҥы Кереес

Сӧс бажы

¹ Иисус Христостоҥ болгон ачылта. Бу ачылтаны Ого удабастаҥ не болотонын Бойыныҥ кулдарына кӧргӱзейин деп, Кудай берген. Ол мыны Бойыныҥ ангели ажыра Бойыныҥ Иоанн кулына ийип кӧргӱскен.

² Иоанн нени кӧргӧнин ончозын айдып туру: Кудайдыҥ сӧзи керегинде, ого Иисус Христос ачкан чындык керегинде.

³ Бу судур сӧстӧрди кычырып турганы ла угуп тургандары, анда бичилгенин чеберлеп тургандары кежиктӱ, нениҥ учун дезе ӧй јууктап келди.

⁴ Иоаннаҥ – Асиядагы јети серкпеге. Слерге бар, болгон ло келип јаткан Кудайдаҥ, Оныҥ ширеези алдында јӱрген јети тыннаҥ,

⁵ база чындык керечи, ӧлгӧндӧр ортодо баштапкы тирилген, јердеги каандардыҥ Башчызы Иисус Христостоҥ јакшылык ла амыр јетсин. Ол биске карузып јат, бисти Бойыныҥ каныла кинчектеристеҥ јунган.

⁶ Ол Кудайга, Бойыныҥ Адазына, бисти каандар ла абыстар эткен. Ого ӱргӱлји чакка мак ла кӱч! Аминь.

⁷ Бат, Ол булутла келер, Оны кандый ла кӧс, Оны јыдала сайгандары да, кӧрӱп ийер, јердиҥ ончо ук-калыктары Оныҥ алдында сыктажар. Чын, аминь.

⁸ «Мен – Альфа ла Омега, бажы ла учы» – деп, Кудай Кайракан айдат, бар, болгон ло келип јаткан кӱчтӱдеҥ кӱчтӱ Кудай.

⁹ Мен, Иоанн, Иисус Христостыҥ Бойындагы карындажыгар, кыйын-шырада, каандыкта ла чыдуда слерле кожо туружаачы бойым, Кудайдыҥ сӧзи учун, Иисус Христостыҥ керези учун Патмос дейтен ортолыкта болуп калгам.

¹⁰ Мен Кайраканныҥ кӱнинде Тынга алдыртып, кийнимде амыргыныҥ ӱни ошкош тыҥ ӱнди угуп ийгем, ол айткан: Мен – Альфа ла Омега, Баштапкы ла Калганчы.

¹¹ Кӧрӱп турганыҥды тӱрбекке бичип, јети серкпеге ий: Ефеске, Смирнага, Пергамга, Фиатирге, Сардиске, Филадельфияга, Лаодикияга.

¹² Меге айткан ӱн кемдийи деп кӧрӧргӧ, кайра баштангам. Кайра баштанала, јети алтын јарыткышты,

¹³ јети јарыткыштыҥ ортозында Кижи Уулына тӱҥейди кӧрӱп ийгем. Ол узун эдектӱ кеп кийген, кӧгӱстей алтын кур курчанган.

¹⁴ Бажындагы чачы ак тӱктий, кардый апагаш, кӧстӧри – оттыҥ јалбыжындый.

¹⁵ Буттары јестий, печкеде кызыгандый, ӱни – кӧп суулардыҥ табыжындый.

¹⁶ Оҥ колында јети јылдыс тудунып алган, оозынаҥ эки мистӱ кылыш чыгып турган. Чырайы – јаркынду чалыган кӱндий.

¹⁷ Оны кӧрӧлӧ, будына ӧлгӧндий барып тӱшкем. Ол меге оҥ колын салып, айткан: – Коркыба, Мен – Баштапкы ла Калганчы,

¹⁸ база Јӱргени. Ӧлгӧм, је бат, ӱргӱлји чакка тирӱ, аминь. Менде таамыныҥ ла ӧлӱмниҥ тӱлкӱӱри бар.

¹⁹ Анайдарда, кӧргӧниҥди бичи: не барын, мыныҥ соҥында не болорын.

²⁰ Сен кӧргӧн оҥ колымдагы јети јылдыстыҥ ла јети алтын јарыткыштыҥ јажыды бу: јети јылдыс – јети серкпениҥ ангелдери, сен кӧргӧн јети јарыткыш – јети серкпе.