2 Тимофейге 3 - Јаҥы Кереес

Калганчы кӱндерде Кудайы јок јӱрери

¹ Билип јӱр, калганчы кӱндерде уур-кӱч ӧйлӧр келер.

² Улус јаҥыс бойын сӱӱр, акчага ӱстӱгер, мактанчак, бийиркек болор, јамандаар, ада-энезиниҥ сӧзин укпас, быйаны јок болор, олордо агару не де болбос; буурзабас,

³ јаражар кӱӱни јок, копчы болор, тудунбас, казыр болор, јакшыны јаман кӧрӧр;

⁴ садынчак болор, сананбас, улуркак болор, соот-јыргалды Кудайдаҥ артык сӱӱр.

⁵ Тыштыла Кудайга берингендий болор, бойлоры бериништиҥ кӱчин јектеп јадылар. Андый улустаҥ кыйыжып јӱр.

⁶ Олордыҥ кезиги кинчектерге бастырган, јӱзӱн-базын кычаларга башкарткан ӱй улустыҥ айылдарына кирип, олорды олјолойдылар.

⁷ Бу ӱй улус јаантайын ӱренип, чындыкты билип аларына качан да једип болбойдылар.

⁸ Ианний ле Иамврий Моисейге удурлашканы чылап, олор до чындыкка удурлажадылар. Олор бӱдӱп јӱреринде ченедер аргазы јок, санаазы саҥ-тескери улус.

⁹ Је олор оноҥ ары барып болбос, нениҥ учун дезе, ол улусла болгоны чылап, олордыҥ јӱӱлгеги ончозы алдында ачылар.

Неге ӱреткен, ондо болуп јӱр

¹⁰ Сен дезе ӱредӱде, јӱрӱмде, амадуда, бӱдӱп јӱреринде, чыдуда, сӱӱште, турумкайда мениле кожо баргаҥ.

¹¹ Антиохияда, Иконияда ла Листрада истедип, кыйналып јӱреримде, мениле кожо болгоҥ. Бу истежӱлерди чыдажып ӧткӧм, олордыҥ ончозынаҥ мени Кайракан айрыган.

¹² Анайда ок Кудайга беринип, Христос Иисустыҥ Бойында јӱрер кӱӱндӱ ончо улус истедер.

¹³ Јаман улус ла куурмакчылар дезе улусты аскыртып ла бойлоры азып, оноҥ јаан јаманга јединер.

¹⁴ Сен дезе, сени кем ӱреткенин билип, неге ӱреткен ле нени ижемјилеген, ондо болуп јӱр.

¹⁵ Кичӱдеҥ ала Агару Бичиктерди билериҥ, олор сени ойгор эдип, Христос Иисуска бӱткениҥ ажыра аргадаш берер аргалу.

¹⁶ Ончо Агару Бичик Кудайдыҥ Тыныла берилген. Ол улусты ӱредерге, кинчекти илезине чыгарарга, јӱрӱмди тӱзедерге, акту эдип таскадарга тузалу.

¹⁷ Кандый ла быйанду керекти эдерге јепселген болзын деп, Кудайдыҥ кижизи белен болзын.