2 Тимофейге 2 - Јаҥы Кереес

Христос Иисустыҥ јакшы јуучылы

¹ Анайдарда, уулым, Христос Иисустагы јакшылыкта кӱч ал.

² Ӧскӧ дӧ улусты ӱредип койор аргалу болзын деп, кӧп керечилер кӧзинче менеҥ укканыҥды чындык улуска јетир.

³ Христос Иисустыҥ јакшы јуучылы чылап, уур-кӱчтерде кожо туруш.

⁴ Черӱге алган кижиге јарайын деп, кандый да јуучыл јадын-јӱрӱмдеги керектерле бойын колбобой јат.

⁵ Маргаанда туружып, маргаанныҥ ээжизин бускан кижи кайрал албас.

⁶ Кӧп иштеп јӱрген кырачы тӱжӱмнеҥ озо алар учурлу.

⁷ Нени айдып турганымды оҥдо, Кайракан сеге ончозын оҥдоорго бергей.

⁸ Сӱӱнчилӱ Јарымда айдылганыла, тирилген Иисус Христосты – Давидтиҥ калдыгын эске алып јӱр.

⁹ Бу Јарга болуп кыйналып јадым, оноҥ болгой шокчыл чылап кижендедип койгом; је Кудайдыҥ сӧзин кижендеп болбос.

¹⁰ Христос Иисус ажыра мӧҥкӱлик макла кожо аргадаш алар аргалу болзын деп, Кудай талдап алган улуска болуп ончо немеге чыдажып јадым.

¹¹ Чын айдылган сӧс: «Оныла кожо ӧлгӧн болзобыс, Оныла кожо јӱрерис.

¹² Чыдажып турган болзобыс, Оныла кожо башкарарыс. Јана тӱшсебис, Ол до бистеҥ јана тӱжер.

¹³ Чындык эмес болзобыс, Ол чындык артат, нениҥ учун дезе Ол Бойынаҥ јана тӱжӱп болбос».

Кудайдаҥ ченелген ишчи

¹⁴ Кайраканныҥ алдында сурап, мыны эске алындырып тур: сӧс керегинде блааш-тартыш эткилебезин. Олордоҥ бир де туза јок, угуп турган улуска каршу једет.

¹⁵ Эткен кереги учун уйалары јок, чындыктыҥ сӧзин чын ӱредип турган, ченелген ишчи деп, Кудайдыҥ алдында бойыҥды кӧргӱзерге кичеен.

¹⁶ Эш-немеге јарабас куру эрмек-куучындардаҥ кыйыжып јӱр. Ого кирижип турган улус там ла там Кудайы јок јӱрӱп баштаар.

¹⁷ Олордыҥ сӧзи југуш оору чылап таркаар. Андый улустыҥ тоозында Именей ле Филит.

¹⁸ Олор тирилиш болуп калган деп айдып, чындыктыҥ јолынаҥ астыгып, кезик улустыҥ бӱдӱп турганын јайрадып јадылар.

¹⁹ Је Кудайдыҥ бек тӧзӧгӧзи туруп јат. Анда мындый таҥма бар: «Кайракан Бойыныҥ улузын билер»; база: «Кайраканныҥ адыла бойын аданып јӱрген кажы ла кижи, јазыктаҥ јана болзын».

²⁰ Јаан турада јаҥыс та алтыннаҥ ла мӧҥӱннеҥ эмес, агаштаҥ ла той балкаштаҥ эткен айак-казан бар. Кезиги кӱндӱлӱ тузаланышка, ӧскӧлӧри – кӱндӱлӱ эмес.

²¹ Анайдарда, бойын јаманнаҥ арутаган кижи кӱндӱлӱ тузаланышка керектӱ, агарулалган, Ээзине тузалу, быйанду керекке белен айак-казан болор.

²² Јиит тужыҥныҥ кычазынаҥ кыйыш, Кайраканга ару јӱрегинеҥ баштанып турган улусла кожо актуга, бӱдӱп јӱрерине, сӱӱшке, энчӱге јӱтки.

²³ Тенексӱ ле учур јок блааш-тартыштардаҥ кыйыжып јӱр, олор ӧӧн-бӧкӧнгӧ экелип турганын билериҥ.

²⁴ Кудайдыҥ кулы ӧӧркӧшпӧс учурлу, карын, ончо улуска кӱӱнзек болор, ӱредип билер, чыдамкай болор,

²⁵ удурлажып турган улусты јымжак тӱзедер учурлу. Айса болзо, Кудай олорго кинчегин алынар арга берер, олор чындыкты билип алар,

²⁶ санаазы кирер, кӧрмӧстиҥ чакпызынаҥ јайымдалар. Кӧрмӧс бойыныҥ табын бӱдӱрзин деп, олорды олјодо туткан.