2 Коринфтегилерге 9 - Јаҥы Кереес

¹ Агаруларга болужатаны керегинде слерге база бичибезем де кем јок –

² болужарга кӱӱнзеп турганыгарды билерим. Македониядагы карындаштар алдына слерди мактап, Ахаия былтырдаҥ бери болужарга белен деп, олорго айдарымда, слердиҥ кичеенип турганыгар кӧп карындаштарды бого кӱӱнзеткен.

³ Слерди мактаганым бу учуралда темей болуп калбазын деп, мениҥ айтканымла, слерди белен болзын деп, мен карындаштарды ийгем.

⁴ Мениле кожо Македониядаҥ карындаштар келзе, белен эмезигерди кӧрбӧзин. Ол тушта слерге бӱдӱмјилӱ болуп, уйатка каларыс. Слер керегинде айтпай да јадым.

⁵ Оныҥ учун мынайда шӱӱдим: карындаштар слерге кӱн-эртеде барала, мынаҥ озо берер болгон сыйыгарды белетеп койзын деп сураар керек. Ол тушта сыйыгарды албанла эмес, бойыгардыҥ кӱӱнигерле берип турган болорыгар.

⁶ Мыны сананып јӱригер: кысканып ӱрендеп турган кижи ас тӱжӱм јууп алар; кысканбай ӱрендеп турган кижи кӧп тӱжӱм јууп алар.

⁷ Кажы ла кижи јӱреги ого айтканыла, ачурканбай, албан јокко берзин, не дезе сӱӱнип берип турган кижиге Кудай буурзап јат.

⁸ Слерди јаантайын ла ончозында јеткилдӱ болуп, кандый ла быйанду керекти артыктай этсин деп, Кудай слерге кандый ла јакшылыкты артыктай берер аргалу.

⁹ Бичилгениле: «Кысканбай, тӱреҥилерге ӱлеп берген, оныҥ акту керектери ӱргӱлји чакка јӱрет».

¹⁰ Ӱрендеечиге ӱрен, јизин деп, калаш берип турганы дезе, слерге де артыктай ӱрен берип, акту керектеригердиҥ тӱжӱмин арбынду эдер.

¹¹ Ончо немеде бай боло берип, кысканбай берер аргалу болорыгар. Анайып, кӧп улус бис ажыра алган сыйлар учун Кудайга алкыш-быйанын јетирер.

¹² Нениҥ учун дезе анайда эдип ле јалчы болуп, агарулардыҥ керексингенин јеткилдеп јадыгар. Је анайда ок кӧп улусты Кудайга арбынду алкыш-быйан јетирерге кӱӱнзедип јадыгар.

¹³ Олор бу иштиҥ турултазын кӧрӱп, Кудайды алкайдылар. Христостыҥ Сӱӱнчилӱ Јарына уккур болуп, оны јӱрӱмигерде бӱдӱрип, олорло, ончозыла кысканбай ӱлежип јадыгар.

¹⁴ Олор слер учун слерге јӱректери тартылып мӱргиир, нениҥ учун дезе слерге Кудай Бойыныҥ арбынду јакшылыгын берген.

¹⁵ Кудайдыҥ сӧслӧ айдып болбос сыйы учун Ого баш болзын!