2 Коринфтегилерге 5 - Јаҥы Кереес

Бисте Кудайдаҥ теҥериде айыл-јурт бар

¹ Бис билерис: јердеги айлы-јуртыбыс – чадырыс јемирилзе, бисте Кудайдаҥ айыл-јурт бар. Ол теҥериде, мӧҥкӱлик, ол кижиниҥ колыла тудулбаган.

² Оныҥ учун теҥеридеги айлы-јуртыбыс јабынчыбыс болзын деп тыҥ кӱӱнзеп, онтоп јадыбыс.

³ Кийимдӱ де болзобыс, јылаҥаш болуп калбайлы.

⁴ Бис бу чадырда јӱрӱп, уур јӱктиҥ алдында онтойдыс, бу чадырды бойыбыстаҥ уштыырга турганыс учун эмес, ӧлӱмдӱни јӱрӱм јуда салзын деп, теҥеридеги чадырга кирерге турганыс учун.

⁵ Бого болуп бисти Кудай јайап, бисти мында бӱдӱмјилӱ болзын деп, биске Тын берген.

⁶ Анайдарда, бис јаантайын токыналу ла бӱдӱмјилӱ болуп, билип јадыбыс: эди-каныста јӱрген тужыста Кайраканнаҥ ыраакта јӱрӱп јадыбыс.

⁷ Бис бӱдӱп турганысла јӱрӱп јадыбыс ине, кӧрӱп турганысла эмес.

⁸ Бис токыналу ла бӱдӱмјилӱ, ары торт эт-каннаҥ чыгып, Кайраканда јӱрерге кӱӱнзейдис.

⁹ Оныҥ учун айлы-јуртыбыста јӱргенис пе, оноҥ чыгып јатканыс па, Кайраканга јараарга тыҥ кӱӱнзеп јадыбыс.

¹⁰ Кажы ла кижи эт-канда јӱрӱп, јакшыны эмезе јаманды эткениле аларга, ончобыс Христостыҥ јаргызы алдында турар учурлу.

Кудайла јаражыгар

¹¹ Анайдарда, Кайраканнаҥ айаарын билип, улусты бӱдӱндирип јадыбыс. Кудайга бис ачык. Не улус болгонысты јӱректеригерде шӱӱрге слерге де ачык деп, иженип турубыс.

¹² Слердиҥ алдыгарда бойыбысты ойто катап кӧргӱзип турганыс бу эмес. Јӱрегинде барыла эмес, тыш немелерле мактанып јӱрген улуска айдар сӧзигер бар болзын деп, слерге бисле мактанар арга берип турубыс.

¹³ Санаабыс ордында эмес болзо, онызы Кудайга, санаабыс ордында болзо, онызы слерге.

¹⁴ Бисти Христостыҥ сӱӱжи ээлеп јат ине. Бис мынайда шӱӱйдис: бир кижи ончозы учун ӧлгӧн болзо, ончозы ӧлӱп калган.

¹⁵ Јӱрген улус бойлорына болуп јӱрбезин, олор учун ӧлӧлӧ тирилгенге болуп јӱрзин деп, Христос ончозы учун ӧлгӧн.

¹⁶ Оныҥ учун мынаҥ ары кемди де кижиниҥ кемјӱзиле билбезис. Башкыда Христосты кижи чилеп билген болзобыс, эмди билбезис.

¹⁷ Анайдарда, Христостыҥ Бойындагы кижи – ол јаҥы јайаан. Јебрендези ӧдӱп калган, эмди ончозы јаҥы.

¹⁸ Мыны ончозын Кудай эткен. Ол бисти Иисус Христос ажыра Бойыла јараштырып, ӧскӧлӧрин Бойыла јараштырзын деп, биске јалчыланарын берген.

¹⁹ Анайып, Кудай улустыҥ јазыктарын тоого албай, Христос ажыра бу телекейдиҥ улузын Бойыла јараштырып, биске јараштырар сӧс берген.

²⁰ Анайдарда, бис – Христоско болуп элчилер. Кудай Бойы бис ажыра кычырып јат. Христоско болуп сурап турубыс, Кудайла јаражыгар!

²¹ Бис Оныҥ Бойында Кудай актаган улус боло берзин деп, Ол кинчектӱ эмести биске болуп кинчек учун тайылга эдип койгон.