2 Коринфтегилерге 4 - Јаҥы Кереес

Бис – эрјинелӱ той балкаш јыракылар

¹ Оныҥ учун, Кудайдыҥ быйаныла анайда јалчы болуп, чӧкӧбӧйдис.

² Је бис туйук ла уйатту керектерди јектеп, сӱмеленип этпей, Кудайдыҥ сӧзин ӧскӧртпӧй јадыбыс. Карын, чындыкты ачып, Кудайдыҥ алдында не улус болгонысты кажы ла кижиге бойы јӱрегинде шӱӱр арга берип турубыс.

³ Сӱӱнчилӱ Јарыбыс јабык болзо, ол ӧлӱмниҥ јолыла барып јаткан улуска јабык.

⁴ Олорго Сӱӱнчилӱ Јардыҥ јарыгы јаркындалбазын деп, олор Христостыҥ магын кӧрбӧзин деп, бу чактыҥ «кудайы» бӱтпестердиҥ сагыжын сокорткон. Христос дезе кӧрӱнбес Кудайдыҥ сӱр-кебери.

⁵ Бис бойыбысты јарлыктабайдыс ине, је Иисус Христос ол Кайракан деп јарлыктайдыс. Бис – Иисуска болуп слердиҥ кулдарыгар.

⁶ «Караҥуйдаҥ јарык јаркындалзын» деп айткан Кудай јӱректеристи јарыдып, биске Христос ачкан Кудайдыҥ магын билип алар јарык берген.

⁷ Је бис јӱк андый эрјине чеберлелип турган той балкаш јыракылар эдибис. Оныҥ учун бу артыкташкан кӱч бистийи эмес, Кудайдыйы болгоны јарт.

⁸ Бисти ончо јанынаҥ кыстайдылар, је бис кыстатпайдыс. Бис кӱч айалгаларда јӱрӱп јадыбыс, је чӧкӧбӧйдис.

⁹ Бисти истейдилер, је Кудай бисти артырбай јат. Бисти јыга согодылар, је бис ӧлбӧйдис.

¹⁰ Ол ок чылап, эди-каныбыста јӱрӱм алалы деп, Иисус чылап, эди-каныбысты јаантайын ӧлӱмге берип јадыбыс.

¹¹ Иисустыҥ јӱрӱми де ӧлӱмдӱ эди-каныбыста ачылзын деп, бис, тирӱ улус, Ого болуп јаантайын ӧлӱмниҥ јеткеринде јӱрӱп јадыбыс.

¹² Оныҥ учун ӧлӱм бистиҥ бойыбыста, јӱрӱм слердиҥ бойыгарда јӱрет.

¹³ Мен бӱткем, оныҥ учун айткам деп бичилгениле, бойыбыста бӱдӱп јӱрериниҥ андый ла тыны бар. Бис те бӱдӱп, оныҥ учун айдып турубыс.

¹⁴ Бис билерис: Иисус Кайраканды тиргискен Кудай Иисусла кожо бисти де тиргизип, слерле кожо Бойыныҥ алдына тургузар.

¹⁵ Кудайдыҥ элбек јакшылыгы кӧп улуска једип, олорды Кудайга там алкыш-быйанду этсин деп, бу ончозы слерге болуп эдилет. Анайып Кудай макталзын.

¹⁶ Оныҥ учун чӧкӧбӧйдис. Тыш бойыбыс чирип те турган болзо, ич бойыбыс кӱнӱҥ сайын јаҥырат.

¹⁷ Кыска ӧйгӧ јеҥил кыйыныбыс биске кеми јок, артыкташкан ла мӧҥкӱлик мак экелет.

¹⁸ Кӧрӱнип турганына эмес, је кӧрӱнбей турганына кӧрӧдис, нениҥ учун дезе кӧрӱнип турганы – удурум, кӧрӱнбей турганы – ӱргӱлји.