2 Коринфтегилерге 1 - Јаҥы Кереес

¹ Кудайдыҥ табыла Христос Иисустыҥ апостолы Павелдеҥ ле Тимофей карындаштаҥ – Кудайдыҥ Коринфтеги серкпезине, анайда ок Ахаия ичинде јуртаган ончо агаруларга.

² Слерге Адабыс Кудайдаҥ ла Иисус Христос Кайраканнаҥ јакшылык ла амыр јетсин.

Кудайга коот учун баш болзын

³ Кудайга, Иисус Христос Кайраканыстыҥ Адазына, баш болзын! Ол буурзак Ада, кандый ла коот береечи Кудай.

⁴ Ол бисти ончо уур-кӱчтеристе кооттоп јат. Анайып бис те, уур-кӱчтерде јӱрген улусты Ол бисти кооттоп турган коотло кооттоор аргабыс бар.

⁵ Христоско болуп кыйындарыс кӧптӧйт, анайып ла Христос ажыра биске берилген коот кӧптӧйт.

⁶ Кыйналып јӱрген болзобыс, слерди коот алзын ла аргадалзын деп кыйналадыс. Коот алып турган болзобыс, слердиҥ коодыгарга болуп алып јадыбыс. Бу коотты, бис ӧдӱп турган кыйындарды чыдажып ӧдӱп турганыгарда, алып јадыгар.

⁷ Слерге бек иженип јадыбыс. Кыйындарысты да, коотты да ӱлежип турганыгарды билип, коот алып турганыста, слерди коот алзын ла аргадалзын деп, кооттонып јадыбыс.

⁸ Оныҥ учун, карындаштар, Асияда бисле болгон уур-кӱчтеристи билигер дейдис. Кӧдӱрип алып чыгарып болбос кату-јоболго учурап, тирӱ артарыска иженбегенис.

⁹ Је бис ӧлӧр учурлу деп, бойыбыста бойыс сананганыс. Бойыбыска бойыс иженбезин, ӧлгӧн улусты тиргизеечи Кудайга ижензин деп, мынайда болгоны бу.

¹⁰ Ол бисти андый коркышту ӧлӱмнеҥ аргадаган, мынаҥ да ары аргадаар. Ол база аргадаар деп, Ого иженедис.

¹¹ Слер де бис учун мӱргип, биске болужып јадыгар. Анайып бис учун кӧп улустыҥ мӱргигенин угуп, биске берген јакшылыгы учун кӧп улус Кудайга алкыш-быйанын јетирер.

Биске Кудай керечи

¹² Бат неле мактанып јадыбыс: бис бу телекейде, анчада ла ортогордо Кудайдаҥ алган ачык-јарыгысла эдип, кижиниҥ ойгорлыгыла эмес, Кудайдыҥ јакшылыгыла јӱргенис деп, биске кӱӱн-санаабыс керелейт.

¹³ Кычырар эмезе аайлаар аргагар барын, учына јетире оҥдоорыгар деп иженип турганымды слерге бичийдис.

¹⁴ Слер кезигин аайладыгар: бис слерле мактанып турганыс чылап, слер де бисле Иисус Кайраканыс келер кӱнде мактанарыгар.

¹⁵ Менде андый бӱдӱмји бар болуп, слерди ойто катап сӱӱндирерге, слерге озо келерге умзангам.

¹⁶ Слерге туштап, Македония барайын, Македониядаҥ слерге бурулайын деп санангам. Слер меге Иудей јаар атанарга болужар эдигер.

¹⁷ Анайда умзанып, сананбай эттим эмеш пе? Эмезе акту бойымныҥ кӱӱнимле эдип, та «эйе», та «јок» деп, бир уунда айдып турган болорым ба?

¹⁸ Кудай чындык, Ол биске керечи, бис слерге та «эйе», та «јок» деп, бир уунда айтпадыс.

¹⁹ Слерде мен, Силуан ла Тимофей јарлыктаган Кудайдыҥ Уулы Иисус Христос «эйе» ле «јок» болбогон. Је Оныҥ Бойында «эйе» болгон.

²⁰ Кудай канча да кире кӧп сӧс берзе, Оныҥ Бойында «эйе» болуп јат. Оныҥ учун Кудай макталзын деп, Ол ажыра «аминь» дейдис.

²¹ Кудай Бойы дезе бисти слерле кожо Христостыҥ Бойында тыҥыдып, майлап јат.

²² Ол бисти таҥмалап койгон, берер болгонын аларыска бӱдӱмјилӱ болзын деп, јӱректериске Тын берген.

²³ Кудайды керечиге кычырып, јӱрӱмимле чертенип турум: слерди чеберлеп аларга, Коринфке база катап келбедим.

²⁴ Бис Кудайга бӱдӱп јӱргенигерди башкарып турганыс бу эмес, је бис сӱӱнчигерге болуп слерле кожо иштейдис. Слер дезе бӱдӱп, бек туруп јадыгар.