2 Фессалоникадагыларга 3 - Јаҥы Кереес

¹ Адакыда, карындаштар, бис учун мӱргигер, слерде де чилеп, Кайраканныҥ сӧзи ылтам тарказын ла макталзын деп,

² јарабас кылыкту ла јаман улустаҥ айрылалы деп, нениҥ учун дезе Кудайга ончозы бӱтпейдилер.

³ Је Кайракан чындык, Ол слерди тыҥыдып, јаманнаҥ чеберлеер.

⁴ Бис Кайракан ажыра слерге бӱдӱмјилӱ: слерге јакарганысты бӱдӱрип јӱредигер ле бӱдӱреригер.

⁵ Кайракан дезе Кудайдыҥ сӱӱжине ле Христостыҥ чыдузына јӱректеригерге јол кӧргӱссин.

Иштеер кӱӱни јок кижи ажанбас

⁶ Иисус Христос Кайраканыстыҥ адыла слерге јакарып турубыс, карындаштар: аай-баш јок јӱрӱп, бистеҥ алган ӱредӱле јӱрбей турган кандый ла карындаштаҥ кыйыжыгар.

⁷ Бистеҥ канайда тем алатанын бойыгар билеригер. Бис слерде аайы-бажы јок јӱрӱм јӱрбеген эдибис.

⁸ Кемниҥ де калажын тегин јибедис, је кемигерди де кӱчсиндирбеске, бойыска килебей, тӱн-тӱш иштеп јӱрдис.

⁹ Бисте јаҥ болбогон учун эмес, карын, бойысты тем эдип кӧргӱзерге, анайда эткенис.

¹⁰ Слерде болорыста, јакарганыс: иштеер кӱӱни јок кижи ажанбас.

¹¹ Је кезигер аайы-бажы јок јӱрӱм јӱрӱп, нени де этпей, сандырап јадылар деп угадыс.

¹² Андый улусты Иисус Христос Кайраканыстыҥ адынаҥ јакарып ла кычырып турубыс: токыналу иштеп, бойыныҥ калажын јизин.

¹³ Слер дезе, карындаштар, быйан эдип, чылабагар.

¹⁴ Кем кижи бу самарадагы сӧзибисти укпаза, ол кижини ајаруга алыгар, оны уйалтарга, оныла колбу тутпагар.

¹⁵ Је ӧштӱге бодобогор, карындажыгар ла чылап санандырыгар.

¹⁶ Амырдыҥ Кайраканы Бойы јаантайын ла ончо эп-аргала слерге амыр берзин. Кайракан ончогорло кожо!

¹⁷ Мен, Павел, бу уткуулды бойымныҥ колымла бичип турум. Кажы ла самарамды анайда темдектеп, анайда ла бичип јадым.

¹⁸ Иисус Христос Кайраканыстыҥ јакшылыгы ончогорло кожо. Аминь.