1 Тимофейге 5 - Јаҥы Кереес

Бир кезик јӧп айдып бергени

¹ Јажай берген эр кижини каарып айтпа, је адаҥа чылап айт; јиит уулдарга карындаштарыҥа чылап;

² јажай берген ӱй улуска энелерге чилеп; јиит кыстарга сыйындарыҥа чылап айт. Мыны ару санаалу болуп эт.

³ Тул ӱй улусты, чыннаҥ тул ӱй улусты, тооп јӱр.

⁴ Кандый бир тул ӱй кижи балдарлу эмезе јеен балдарлу болзо, олор элдеҥ озо акту бойыныҥ билезин тооп јӱрерге, јаандарына каруу эдип, олорды кичеерге ӱрензин. Онызы Кудайга јарап јат.

⁵ Чыннаҥ тул калып, јаҥыскан арткан ӱй кижи Кудайга иженип, болуш сурап, Ого тӱн-тӱш мӱргип јат.

⁶ Сайрап јӱргени дезе тирӱге ӧлӱп калганы ол.

⁷ Каарып айдар шылтак јок болзын деп, олорды бого ӱрет.

⁸ Бойыныҥ улузын, анчада ла айылдагы улузын кичеебей турган кижи дезе бӱдӱп јӱреринеҥ јана тӱжӱп, бӱтпес кижидеҥ јаман болгоны ол.

⁹ Ас ла салза алтан јашка јеткен, бир ӧбӧгӧндӱ болгон тул ӱй кижи тоого кирер аргалу.

¹⁰ Бала-барка азыраган, кӱндӱзек болгон, агарулардыҥ будын јунган болзо, шыралап јӱрген улуска болушкан, бойын быйанду керек эдерге учурлаган болзо, ол быйанду керектериле јарлу болор учурлу.

¹¹ Тул келиндерди тоого кийдирбе, нениҥ учун дезе, сезими ээлеп, Христостоҥ туура апарганда, олор кижиге барар кӱӱндӱ.

¹² Башкыда берген сӧзин јектегени учун олор јаргыга калар.

¹³ Ӱзеери иш этпей, айылдар керип јӱрерине ӱренип калгылайт. Јаҥыс та иштебей јӱрген эмес, је калырууш болгылайт, ӧскӧ улустыҥ керектерине киришкилейт, айтпасты айдып јӱргӱлейт.

¹⁴ Оныҥ учун тул келин кижиге барзын, бала тапсын, айылдыҥ ижин этсин, ӧштӱге јаман айдар шылтак бербезин деп, кӱӱнзеп турум.

¹⁵ Кезиги јолдоҥ астыгып, сатананыҥ кийнинеҥ барган ине.

¹⁶ Бӱдӱп турган ӱй ле эр кижиниҥ билезинде тул улус бар болзо, олорго болушсын, олор серкпеге уур јӱк болбозын, серкпе чыннаҥ тул ӱй улуска болужар аргалу болзын.

¹⁷ Јакшы башкарып турган јаандар аҥылу кӱндӱӱде болзын, анчада ла јарлыктап ла ӱредип јӱргендери.

¹⁸ Агару Бичикте айдылган: «Теермен айландырган чардыҥ оозын туй буулаба»; база: «Иштеп јӱргени јалына турар».

¹⁹ Эки эмезе ӱч керечи јӧмӧбӧгӧн болзо, јаанды бурулап айтканды укпа.

²⁰ Арткан улус айап јӱрзин деп, кинчек эдеечилерди ончо улус алдында илезине чыгар.

²¹ Кудайдыҥ ла Иисус Христос Кайраканныҥ алдында, талдап алган ангелдердиҥ алдында айдып, кычырып турум: бу јакаруларды озолодо тӱп-шӱӱлте этпей бӱдӱр, нени де этсеҥ, улусты ылгабай эт.

²² Кемди де јылгырлап кол салып алкаба, ӧскӧ улустыҥ кинчегинде турушпа. Бойыҥды ару тут.

²³ Ич-карыныҥ улам сайын оорып турган учун јаҥыс суу ичпе, је эмештеҥ аракы ичип тур.

²⁴ Кезик улустыҥ кинчектери олордыҥ алдында јаргыга барып, иле кӧрӱнет; кезигиниҥ кийнинеҥ барып јадылар.

²⁵ Анайда ок быйанду керектер иле. Иле эмес болзо, туйукта болор аргазы јок.