1 Тимофейге 4 - Јаҥы Кереес

Тимофейге јакылталар

¹ Калганчы ӧйлӧрдӧ кезик улус бӱдеринеҥ јана болор деп, Тын јарт айдат. Олор аскыраачы тындарга ла шилемирдиҥ ӱредӱзине бойлорын берип койор.

² Андый ӱредӱ эки јӱстӱ тӧгӱнчилердеҥ келип јат. Олордо уйалар јӱс јок.

³ Олор айыл-јуртту болорын јаратпайдылар, кезик курсакты јибей тудунзын деп албадайдылар. Кудайга бӱткен ле чындыкты билип алган улус алкыш-быйанын айдып јизин деп, Ол курсакты јайаган ине.

⁴ Кудайдыҥ ончо јайаганы јакшы, алкыш-быйанла алылып турган ончо неме јектелбес учурлу,

⁵ нениҥ учун дезе ол Кудайдыҥ сӧзиле, мӱргӱле агарулалат.

⁶ Мыны карындаштарга айдып, Кудайга бӱдериниҥ сӧстӧриле, сен ӱренген јакшы ӱредӱле јӱрӱп јадыҥ деп, бойыҥды кӧргӱзериҥ. Анайып Христос Иисустыҥ јакшы јалчызы болорыҥ.

⁷ Карган эмеендердиҥ сананып тапкан јескинчилӱ куучындарынаҥ кыйыжып тур; бойыҥды Кудайга беринеринде тазыктыр.

⁸ Эт-канды тазыктыратанныҥ тузазы ас; Кудайга беринеринде дезе ончозы тузалу, ондо эмдиги ле келер јӱрӱмге берген сӧс бар.

⁹ Мениҥ айдып турганым чын, оны јарадары јарамык.

¹⁰ Бис кӧп иштеп, базындырышка чыдажып јадыбыс, нениҥ учун дезе тирӱ Кудайга иженедис. Ол ончо улусты, анчада ла бӱдӱп турган улусты аргадайт.

¹¹ Улусты бого кычырып, анайда ӱрет.

¹² Сени јиит деп, кем де керекке албай калбазын. Карын, сӧстӧ, кылык-јаҥда, сӱӱште, тында, бӱдӱп јӱреринде, ару јӱрӱмде бӱдӱп турган улуска јозок бол.

¹³ Келбегенчем, Агару Бичикти кычыр, бӱдӱмјиле, ӱрет.

¹⁴ Јаандар сеге кол салып алкап турарда, јарлыктардыҥ сӧстӧриле айдылып, сеге берилген јайалтаны керекке албай калба.

¹⁵ Једимиҥди ончо улус кӧрзин деп, мыны ончозын кичее, ого бастыра бойыҥды бер.

¹⁶ Бойыҥа ла ӱредӱге ајарыҥкай бол, мында турумкай бол. Анайда эдип, бойыҥды да, сени угуп турган улусты да аргадап аларыҥ.