1 Тимофейге 1 - Јаҥы Кереес

¹ Аргадаачы Кудайыс ла ижемјибис болгон Иисус Христос Кайраканныҥ јакарганыла Иисус Христостыҥ Павел апостолынаҥ.

² Тимофейге, бӱдӱп јӱреринде чындык уулга. Сеге Ада Кудайдаҥ ла Христос Иисус Кайраканыстаҥ јакшылык, быйан ла амыр јетсин.

Тӧгӱн ӱредӱчилер керегинде озолодо айтканы

^3-4 Македония јаар ууланып јадала, ӧскӧ ӱредӱ таркатпазын деп, сананып тапкан куучындарга ла учы-куйузы јок угы-тӧзине бойлорын берип салбазын деп, сени Ефесте артып калзын, кезик улусты кычырзын деп сурагам. Мынызы кӧп сабазында бӱдӱп јӱреринде Кудай јакып ӱредерине эмес, блааш-тартышка экелет.

⁵ Ол кычыруныҥ амадузы – акту јӱректеҥ, ару санаадаҥ ла экијӱстенбей бӱдӱп јӱреринеҥ табылган сӱӱш.

⁶ Бу амадудаҥ кезик улус јана болуп, куру эрмек-куучынга јайылган.

⁷ Олор Јасактыҥ ӱредӱчилери болор кӱӱндӱ, бойлоры дезе нени айдып та, неге бӱдӱмјилеп те тургандарын оҥдобой јадылар.

⁸ Јасакла чын тузаланып турза, ол јакшы деп, бис билерис.

⁹ Јасак акту улуска эмес, јазык эткендерге ле бакпастарга, ак-чек эместерге ле кинчектӱлерге, Кудайы јок улуска ла быјарсыгандарга, ада-энезин ӧлтӱреечилерге, кижи ӧлтӱреечилерге учурлалган деп билерис.

¹⁰ Бу јасак баскындарга, ӱй улусла чылап билишкен эр улуска, кижиниҥ тынын кулданаачыларга, тӧгӱнчилерге, тӧгӱндеп керелеечилерге, кемжикпеген ӱредӱге удура болгон ончо немеге учурлалган.

¹¹ Бу ӱредӱ алкышту Кудайдыҥ мактулу Сӱӱнчилӱ Јарына келижет; Ол мыны меге ижемјилеген.

Кудайдыҥ быйаны учун алкыш

¹² Меге кӱч берген Христос Иисус Кайраканыска алкыш-быйаным. Ол мени чындык кижи деп, ишке тургускан.

¹³ Башкыда Оны јамандагам, истегем ле тарындыргам, је меге быйан эдилген, нениҥ учун дезе билбей ле бӱтпей јадып анайда эткем.

¹⁴ Кайраканыстыҥ јакшылыгы дезе мени Христос Иисуска бӱдериле, сӱӱшле артыктай толтырган.

¹⁵ Бат, јарадарга јарамыкту чындык сӧстӧр: Христос Иисус телекейге кинчектӱ улусты аргадаарга келген, олордыҥ ортозында баштапкызы мен.

¹⁶ Иисус Христос Бойыныҥ ончо узак чыдузын озо мен ажыра кӧргӱссин деп, бого болуп меге быйан эдилгени ол. Мынызыла ӱргӱлји јӱрӱм аларга Ого бӱдетен улуска тем эткен.

¹⁷ Чактардыҥ Каанына, ӧлбӧс, кӧрӱнбес, ойгордоҥ ойгор бирлик Кудайга, ӱргӱлји чакка кӱндӱӱ ле мак. Аминь.

¹⁸ Тимофей уулым, сен керегинде јарлыктар ажыра айдылган сӧстӧргӧ келиштире бу јакылтаны сеге берип турум. Бу сӧсти тузаланып, јакшы јуучыл чылап тартыш.

¹⁹ Кудайга бӱдӱп, ару санаалу бол. Кезик улус ару санааны јектеп койгон, олордыҥ Кудайга бӱткени талайда кереп чилеп оодылган.

²⁰ Олордыҥ тоозында Именей ле Александр. Кудайды јамандабаска ӱренип алзын деп, олорды сатанага берип ийгем.