1 Коринфтегилерге 9 - Јаҥы Кереес

Ончозын Сӱӱнчилӱ Јарга болуп эдип јадым

¹ Мен јайым эмезим бе? Мен апостол эмезим бе? Иисус Христос Кайраканысты кӧрбӧдим бе? Кайраканла бир болуп јӱргенигер – мениҥ ижимниҥ турултазы эмес пе?

² Ӧскӧ улуска апостол эмес болзом, је слерге – апостол. Апостол болорго тудулганымды керелеген таҥма – Кайраканла бир болуп јӱрген бойыгар.

³ Мени јаргылап тургандарга бойымды корып айдар сӧзим бу.

⁴ Бисте јиир, ичер јаҥ јок по?

⁵ Ӧскӧ апостолдор чылап, Кайраканныҥ карындаштары эмезе Кифа чылап, бӱдӱп турган ӱйлерлӱ болуп, јолдо кожо алып јӱрер јаҥыбыс јок по?

⁶ Эмезе јаҥыс менде ле Варнавада иштебес јаҥ јок по?

⁷ Кандый јуучыл бойыныҥ акчазыла черӱде туруп јат? Виноградты тарыйла, оноҥ алып јибей турган кижи бар ба? Уй кабырып, оныҥ сӱдинеҥ ичпей турган кижи бар ба?

⁸ Мыны кижи чилеп шӱӱп айдып турган болорым ба? Мыны ок Јасак айдып турган эмес пе?

⁹ Моисейдиҥ Јасагында бичилген јок беди: «Теермен айландырып турган чардыҥ оозын туй буулаба». Кудай чарлар керегинде сананып туру эмеш пе?

¹⁰ Эмезе биске мыны айдып туру ба? Мынайда биске бичилген эмей, нениҥ учун дезе кыра сӱрӱп турган кижи, иженип сӱрер учурлу; теермендеп турган кижи, ӱлӱӱмди аларым деп, иженип теермендеер учурлу.

¹¹ Слердиҥ бойыгарда Тынныҥ ӱренин ӱрендеген болзобыс, тӱжӱм чилеп, слердеҥ болуш алзабыс, ол кӧп пӧ?

¹² Ӧскӧ улуста слердеҥ болуш алар јаҥ бар болзо, бисте андый јаҥ оноҥ кӧп эмес пе? Је бис бу јаҥла тузаланбадыс. Карын, Христостыҥ Сӱӱнчилӱ Јарын јарлаарга буудак этпеске, ол керегинде унчукпадыс.

¹³ Байзыҥныҥ ишчилери байзыҥнаҥ азыранып турганын, тагылдыҥ јанында иштеп јӱрген улус тайганнаҥ ӱлӱӱ алып турганын билбейдигер эмеш пе?

¹⁴ Анайып, Сӱӱнчилӱ Јар јарлыктап јӱрген улус јӱрӱмге керектӱзин јарлыкташтаҥ алзын деп, Кайракан да јакарган.

¹⁵ Је мен мыныла бир де тузаланбадым. Мыныла тузаланайын деп бичиген эмезим. Кем-кем мактанарымды јоголткончо, ӧлӱп калзам, меге торт болор.

¹⁶ Сӱӱнчилӱ Јар јарлап јӱрген болзом, мактанарым јок ине, ол мениҥ молјуум. Оны јарлабазам, меге ачу-корон болор!

¹⁷ Мыны бойымныҥ кӱӱнимле эдип јӱрген болзом, јал алар эдим. Бойымныҥ кӱӱнимле эмес болзо, меге бӱдӱмјилелген ишти эдип јадым.

¹⁸ Мениҥ јалым неде? Сӱӱнчилӱ Јарды јарлыктап, јарлыкчыныҥ јаҥыла тузаланбай, Христос керегинде јалы јокко јарлап јӱргенимде.

¹⁹ Ончозынаҥ јайым бойым, улусты Кудайга кӧптӧҥ таап аларга, ончозына кул боло бергем:

²⁰ иудейлерди Кудайга таап аларга, иудейлерге иудейдий болгом; Јасакка багып јӱрген улусты таап аларга, олорго Јасакка багып јӱрген кижидий болгом;

²¹ Јасакты билбес улусты таап аларга, олорго Јасакты билбес кижидий болгом. Кудайдыҥ Јасагын билип, Христоско багып јадым.

²² Чине јок улусты таап аларга, чине јок улуска чине јок кижидий болгом. Кезиктерин де болзо аргадап аларга, ончозына ончозындый боло бергем.

²³ Мыны Сӱӱнчилӱ Јарга болуп оныҥ бӧлӱги боло берерге эдип јадым.

²⁴ Маргаанда кӧп улус јӱгӱрип јат, је кайралды бир кижи алып турганын билбезигер бе? Кайралды аларга, анайып јӱгӱригер!

²⁵ Маргаанныҥ ончо туружаачылары кӧп немедеҥ мойноп јадылар. Олор чалдыгар чечектиҥ ӧрӱмелин аларга болуп мыны эдедилер, бис чалдыкпас ӧрӱмелди аларга болуп.

²⁶ Оныҥ учун амадулу кижи чилеп јӱгӱрип, кейди темей јудуруктабай,

²⁷ је эди-канымды согуп, оны бойыма кул эдип јадым. Ӧскӧ улуска јарлыктап, бого бойым јарамыкту артайын деп, анайда эдедим.