1 Коринфтегилерге 5 - Јаҥы Кереес

Эски ачыткыны јок эдип кырыгар

¹ Слерде балыр кылык табылган деп, чын табыш бар. Андый кылык керек дезе ӧскӧ калыктарда болгон деп угулбаган: кем де бойыныҥ ӱйиниҥ ордына адазыныҥ ӱй кижизиле јуртайт.

² Слер дезе јакшыркап јадыгар. Андый керек эткен кижини бойыгардаҥ чыгарзын деп ыйлаган болзогор, торт болор эмес пе?

³ Мен ортогордо бойым јок то болзом, је ал-санаамла слерле кожо јӱрӱп, слерде болгоным чылап, андый керек эткен кижи јанынаҥ мындый јӧп чыгардым:

⁴ Иисус Христос Кайраканыстыҥ адына болуп јуулзагар, мен де тынымла, Иисус Христос Кайраканыстыҥ кӱчиле слерле кожо болуп,

⁵ оны сатанага берип ийели, эди-каны ӧлӱп калзын, је тыны Иисус Христос Кайраканыстыҥ кӱнинде аргадалзын.

⁶ Слердиҥ мактанар немегер јок. Бир эмеш ачыткы ончо тестени кӧпшидип турганын билбезеер бе?

⁷ Анайдарда, слерге јаҥы тесте болорго, эски ачыткыны јок эдип кырыгар. Слер ачыткы јок калаш эдигер, нениҥ учун дезе, пасха курааныбыс – Христос бис учун тайылып калган.

⁸ Оныҥ учун эски ачыткы, кинчектиҥ ле јаманныҥ ачыткызы бар калашла байрамдабактар. Карын, аруныҥ ла чындыктыҥ ачыткы јок калажыла байрамдактар.

⁹ Балыр јӱрӱмдӱ улуска бирикпегер деп, слерге самарада бичигем.

¹⁰ Је мен бу телекейдиҥ балыр јӱрӱмдӱлери, эмезе ачыркактары, эмезе тонокчылары, эмезе чалуга бажыраачылары керегинде айтпадым. Оноҥ башка слерге бу телекейди таштап барарга келижер эди.

¹¹ Карын, мен карындаш деп аданып, бойы балыр јӱрӱм јӱрӱп, ачыркап, чалуга бажырып, јамандап, аракыдап, тоноп турган улуска слерди бирикпезин деп бичидим. Андый улусла кожо ажанбагар да.

¹² Туш улусты јаргылайтаны мениҥ керегим беди? Слер бойыгардыҥ улузыгарды јаргылап јадыгар ине.

¹³ Туш улусты Кудай јаргылайт. Јаман кижини бойыгардаҥ ырадыгар.