1 Коринфтегилерге 3 - Јаҥы Кереес

Ончобыс бир керек эдип јадыбыс

¹ Бат оныҥ учун, карындаштар, слерге тынла јӱрген улуска чылап айдып болбодым. Је мен слерге улуска чылап, Христоско бӱдеринде јаш балдарга чылап айттым.

² Мен слерди сӱтле азырадым, кату курсакла эмес. Кату курсакты јип албас болгоноор, эмди де болбой јадыгар,

³ нениҥ учун дезе эмди де улус чылап јӱрӱп јадыгар. Кӱйӱнижип, ӧӧркӧжип, оҥдошпой турган болзогор, улус чылап јӱргенигер ол эмес пе, кижинийиле кылынып јӱргенигер ол эмес пе?

⁴ Бирӱгер: «Мен – Павелдийи», ӧскӧгӧр: «Мен – Аполлостыйы» – дегенде, улус чылап эдип јӱргенигер ол эмес пе?

⁵ Аполлос ол не кижи? Павел ол не кижи? Олор јӱк јалчылар. Олордыҥ шылтузында слер Кудайга бӱттигер, кажыгарга ла Кайраканнаҥ канча кире берилгениле бӱттигер.

⁶ Мен тарыдым, Аполлос сугарды, је ӧскӱргени Кудай болды.

⁷ Оныҥ учун тарып та, сугарып та турганы учурлу эмес, јаҥыс ӧскӱрип турган Кудай учурлу.

⁸ Тарып турганы ла сугарып турганы бир керек эдип јадылар, је кажызы ла канча кире кӱчин салып иштегениле јал алар.

⁹ Бис Кудайга кожо иштеп јӱргенибис, слер – Кудайдыҥ кыразы, Кудайдыҥ тудуп турганы.

¹⁰ Кудайдаҥ меге берилген јакшылыкла, ойгор тудаачы чылап, тӧс салдым, ӧскӧ кижи ого тудуп јат. Је кажы ла кижи бойы канайып тудуп турганын кӧрзин.

¹¹ Салылганнаҥ башка, ӧскӧ тӧсти кем де салып болбос. Бу тӧс – Иисус Христос.

¹² Кем бу тӧскӧ алтынла, мӧҥӱнле, баалу-чуулу таштарла, агашла, ӧлӧҥлӧ эмезе саламла тутса,

¹³ кажы ла кижиниҥ эткен кереги ачылар. Мыны кӧргӱзетен кӱн келер, нениҥ учун дезе кажы ла кижиниҥ эткен кереги отто ачылат, ол кандый болгонын от ченеер.

¹⁴ Кемниҥ тутканы отко кӱйӱп калбаза, јал алар.

¹⁵ Кемдийи кӱйӱп калза, ого чыгым болор. Је бойы аргадалар, оттоҥ чыкканы чылап аргадалар.

¹⁶ Слер – Кудайдыҥ байзыҥы деп, слердиҥ бойыгарда Кудайдыҥ Тыны јӱрӱ деп, билбейдигер бе?

¹⁷ Кудайдыҥ байзыҥын јоголтотон кижини Кудай јоголтып койор. Кудайдыҥ байзыҥы агару ине, ол байзыҥ – слер.

¹⁸ Кем де бойын бойы тӧгӱндебезин. Кемигер бу чакта чындаптаҥ ойгор болорго сананып јӱрген, ол кижи ойгор болорго, тенек боло берзин.

¹⁹ Бу телекейдиҥ ойгорлыгы – Кудайдыҥ алдында тенексиш болуп јат. Бичилген эмес беди: «Кудай ойгорлорды олордыҥ ла тузагыла тудуп јат».

²⁰ База: «Кайракан ойгорлордыҥ шӱӱлтелерин билер. Олор куру».

²¹ Анайдарда, кем де улусла мактанбазын, ончозы слердийи:

²² Павел беди, эмезе Аполлос, эмезе Кифа, эмезе телекей, эмезе јӱрӱм, эмезе ӧлӱм, эмезе эмдиги ӧй, эмезе келер ӧй – бу ончозы слердийи.

²³ Слер – Христостыйы, Христос – Кудайдыйы.