1 Коринфтегилерге 2 - Јаҥы Кереес

Тын ончозын шиҥдеп јат

¹ Слерге келеримде, карындаштар, Кудайдыҥ керелегенин чечен эмезе ойгор сӧстӧрлӧ јарлайын деп келбедим.

² Ортогордо јӱрзем, Иисус Христостоҥ, кере тартылган Бойынаҥ башка, нени де билбейин деп шӱӱгем.

³ Мен слерге чине јок, айап, тыҥ ширтилдеп калган келгем.

⁴ Мениҥ айткан сӧстӧримде ле јарлыктаганымда кижиниҥ ойгорлыгыныҥ бӱдӱмјилӱ сӧстӧри јок болгон.

⁵ Бӱдӱп турганыгар кижиниҥ ойгорлыгына эмес, Кудайдыҥ кӱчине тӧзӧлзин деп, мениҥ сӧстӧримниҥ чыны Тынныҥ кӱчинде ачылган.

⁶ Ойгорлыкты дезе толо кемине јеткен улус ортодо јарлап јадыбыс, је бу телекейдиҥ ойгорлыгын да эмес, бу телекейдиҥ јоголып јаткан јаҥдарыныҥ ойгорлыгын да эмес.

⁷ Је бис Кудайдыҥ јажытту, јажырылган ойгорлыгын јарлап јадыбыс. Бисти макталзын деп, бу ойгорлыкты Ол ӧйлӧр башталгалакта озолодо темдектеп койгон.

⁸ Оны бу телекейдиҥ јаҥдарыныҥ кемизи де билип албаган. Билип алган болзо, мактулу Кайраканды кере тарткылабас эди.

⁹ Је анайда ла бичилген: «Оны сӱӱп турган улуска Кудай нени белетеп койгонын кӧс кӧрбӧгӧн, кулак укпаган, ол кижиниҥ санаазына кирбеген».

¹⁰ Биске дезе бу јажытты Кудай Бойыныҥ Тыныла ачкан. Тын ончозын, Кудайдыҥ јажыдыныҥ тереҥин де шиҥдейт.

¹¹ Кижиниҥ ичинде не барын кем билер? Оны јаҥыс кижиниҥ бойында јӱрген тыны билер. Анайып ок Кудайдыйын да кем де билбес. Оны јаҥыс Кудайдыҥ Тыны билер.

¹² Бис дезе Кудайдаҥ биске берилгенди билерге, бу телекейдиҥ тынын эмес, Кудайдаҥ Тын алдыбыс.

¹³ Мыны кижиниҥ ойгорлыгы ӱреткен сӧстӧрлӧ эмес, бисти Агару Тын ӱреткен сӧстӧрлӧ јарлап јадыбыс. Тыннаҥ болгон немелерди тынла јӱрген улуска јартайдыс.

¹⁴ Сезимиле јӱрген кижи дезе Кудайдыҥ Тыны ого айтканды укпайт. Мыны ол тенексиш деп бодоп, аайлап болбойт, нениҥ учун дезе бу керегинде тынныҥ болужыла шӱӱр керек.

¹⁵ Тынла јӱрген кижи – ончозы керегинде шӱӱйт, је ол кижи керегинде кем де шӱӱп болбос.

¹⁶ Кем Кайраканныҥ санаазын билип алган, кем Ого јӧп айдып берер аргалу? Бис дезе, Христос чылап сананып јадыбыс.