1 Коринфтегилерге 16 - Јаҥы Кереес

Калганчы јакылталар

¹ Эмди агаруларга болужары керегинде. Галатиядагы серкпелерге этсин деп јакарганымды слер де эдигер.

² Келзем, акча јуубаска, неделениҥ баштапкы кӱнинде кажыгар ла не барынаҥ канча кире берер аргалу, кымакайлап, чеберлеп алзын.

³ Слерге келзем, талдап алган улузыгарга самаралар берип, болужыгарды Иерусалимге јетирзин деп, олорды ийерим.

⁴ Меге де барарга јараар болзо, олор мениле кожо барар.

⁵ Слерге Македонияны ӧтсӧм келерим, нениҥ учун дезе Македония ажыра барып јадым.

⁶ Айса болзо, слерде эмеш јӱрерим эмезе кыштап та каларым. Оноҥ ары атанзам, мени јолго шыйдыырыгар.

⁷ Эмди слерле јол айас кӧрӱжер кӱӱним јок. Кайракан јаратса, слерде бир канча ӧйгӧ јӱрерим деп, иженип турум.

⁸ Ефесте Беженинчи кӱнге јетире јӱрерим.

⁹ Анда меге јаан ла једимдӱ иштер эдетен аргалар ачылып јат, удурлажып турган улус та кӧп.

¹⁰ Тимофей келзе, слерде јеткер јок айалгада јӱрзин деп кичеенигер. Ол мен ле чилеп Кайраканныҥ керегин эдип јат.

¹¹ Оныҥ учун оны кем де јектебезин, ол меге келзин деп, амыр кӱӱнзеп, јолго шыйдыгар. Мен оны карындаштарла кожо сакып јадым.

¹² Эмди Аполлос карындаш керегинде. Карындаштарла кожо слерге барзын деп, оны сӱрекей сурагам. Је ол эмди барарга чек кӱӱнзебеди. Ол эптӱ ӧй келишсе келер.

¹³ Сергек болыгар, Кудайга бӱдӱп, бек болыгар, эрлер болыгар, кӱчтӱ болыгар.

¹⁴ Нени де этсегер, сӱӱп эдигер.

¹⁵ Стефанныҥ айылдагы улузын билеригер, олордыҥ Ахаияда Кудайга ончозынаҥ озо баштанганын, агаруларга болужарга бойлорын учурлаганын. Оныҥ учун слерди сурап турум, карындаштар:

¹⁶ андый улуска, бисле кожо кӧп иштеп јӱрген ончо улуска багыныгар.

¹⁷ Стефанныҥ, Фортунаттыҥ ла Ахаиктиҥ келгенине сӱӱнип турум. Олор меге слерди солып јадылар.

¹⁸ Олор мени ле слерди сергиттилер. Андый улусты баалап јӱригер.

¹⁹ Слерге Асиядагы серкпелер эзен айдып турулар. Слерге Акила ла Прискилла, олордыҥ айлындагы серкпези, Кайраканла бир болуп, јаан эзен айдып турулар.

²⁰ Слерге ончо карындаштар эзен айдып турулар. Бой-бойыгарла агару окшошло эзендежигер.

²¹ Эмди акту бойымныҥ колымла бичип турум: «Павелдеҥ эзен.

²² Кайраканды сӱӱбей турган кижиге анафема! Маран-афа!

²³ Иисус Христос Кайраканыстыҥ јакшылыгы слерле кожо болзын.

²⁴ Мениҥ де сӱӱжим Христос Иисус ажыра ончогорло кожо болзын. Аминь».