1 Коринфтегилерге 13 - Јаҥы Кереес

Сӱӱш ончозынаҥ бийик

¹ Улустыҥ да, ангелдердиҥ де тилдериле айдып турган болзом, је менде сӱӱш јок болзо, мен – шыҥыраган јес эмезе табыштанган кимвал.

² Судурлаар јайалталу болзом, ончо јажыттарды билер болзом, меге ончо билгирлер берилген болзо, бӱдӱп, кырларды да јылдырып ийер аргалу болзом, је менде сӱӱш јок болзо, – мен не де эмезим.

³ Не барымды ӱлеп берзем, эди-канымды ӧртӧӧргӧ берип ийзем, је менде сӱӱш јок болзо, – бу меге кандый да туза экелбес.

⁴ Сӱӱш узак чыдажат, быйан эдет, сӱӱш кӱйӱнбейт, сӱӱш мактанбайт, јакшыркабайт;

⁵ улуска кату эмес, бойындыйын бедиребейт, ачынбайт, јаманды тоолобойт.

⁶ Сӱӱш јаманга сӱӱнбейт, ол чындыкла кожо сӱӱнет.

⁷ Не де болзо, сӱӱш ончо јаманды таштайт, ончозына бӱдет, јаантайын иженет, ончозын чыдажып ӧдӧт.

⁸ Судурлаштар токтоп то калза, тилдер унчукпай да барза, билгир керек јок то болуп калза, сӱӱш качан да тӱгенбейт.

⁹ Бистиҥ билерис кезектей, судурлап та турганыс кезектей.

¹⁰ Толо кемдӱзи једип келзе, кезектейи јоголып калар.

¹¹ Бала тужымда бала чылап айткам, бала чылап санангам, бала чылап шӱӱгем. Эр кемине једип келеле, бала тужымдазын артырып койгом.

¹² Эмди кӱскӱдеҥ чилеп, боромтык сӱрди кӧрӱп јадыбыс, ол тушта чике-јарт кӧрӧрис. Эмди кезектей билерим, ол тушта Кудай мени билип алганы чылап, толо билип аларым.

¹³ Эмди бу ӱчӱ јӱрет: бӱдӱмји, ижемји ле сӱӱш. Је олордыҥ эҥ јааны – сӱӱш.