1 Коринфтегилерге 12 - Јаҥы Кереес

Агару Тынныҥ јайалталары

¹ Слерди Тынныҥ јайалталары керегинде билзин деп турум, карындаштар.

² Кара јаҥду болороордо, слерди тил јок чалуларга не де тартып тургандый, олорго бажырарга барып туратанаарды билеригер.

³ Оныҥ учун слерге айдып турум: Кудайдыҥ Тыныла айдып турган бир де кижи Иисуска анафема дебес. Бойында Агару Тын јӱрбей турган бир де кижи Иисусты Кайракан деп адап болбос.

⁴ Јайалталар јӱзӱн-башка, је олорды бир Тын башкарат.

⁵ Кудайга јалчы болуп јӱрери јӱзӱн-башка, је оны бир Кайракан башкарат.

⁶ Кажызыныҥ ла эдип јӱргени јӱзӱн-башка, је мыны ончозын ончо улустыҥ бойында бир ле Кудай эдет.

⁷ Је кажыбыста ла Тынныҥ эдип турганы ончобыска тузага болуп јат.

⁸ Бир кижиге Тынла ойгорлыктыҥ сӧзи берилет, ӧскӧзине ол ло Тынла билгирдиҥ сӧзи берилет.

⁹ Бирӱзине ол ло Тынла Кудайга бӱдӱп јӱрери берилет. Ӧскӧзине ол ло Тынла ооруны јазар јайалта берилет.

¹⁰ Кезигине кайкалдар јайаар кӱч, кезигине судурлаары, кезигине тындарды ылгаштырары, кезигине ӧрӧртинеҥ тилдер, кезигине бу тилдерле айтканды јартаары берилет.

¹¹ Је мыны ончозын бир ле Тын эдип, бу јайалталарды кажызына ла Бойыныҥ кӱӱнзегениле ӱлейт.

Бис – Христостыҥ эди-каны

¹² Эт-кан бир, је ондо кӧп ӱйелер. Олор кӧп тӧ болзо, ончозы бир эт-кан болуп јадылар. Анайда Христос то керегинде айдарга јараар.

¹³ Бис ончобыс – иудейлер ле еллиндер, кулдар ла јайым улус бир эт-кан боло берерге, бир Тынла креске тӱжӱп, ончобыс ол ок Тынла толтырылганыс.

¹⁴ Эт-кан бир ӱйедеҥ эмес, кӧп ӱйелердеҥ туруп јат.

¹⁵ Бут: «Мен кол эмезим, оныҥ учун эт-кандыйы эмезим» – дезе, мынаҥ улам ол эт-кандыйы болбой барар ба?

¹⁶ Кулак: «Мен кӧс эмезим, оныҥ учун эт-кандыйы эмезим» – дезе, мынаҥ улам ол эт-кандыйы болбой барар ба?

¹⁷ Ончо эт-кан кӧс болзо, ол канайып угар эди? Ончо эт-кан кулак болзо, ол канайып јыт алар эди?

¹⁸ Је Кудай Бойыныҥ кӱӱнзегениле ончо ӱйелерди бир эт-канда кондырган.

¹⁹ Ончозы бир ӱйе болгон болзо, эт-кан кайда болор эди?

²⁰ Је эмди ӱйелер кӧп, эт-кан – бир.

²¹ Кӧс колго: «Сен меге керек јок» – деп айдып болбос, эмезе баш буттарга: «Слер меге керек јок» – деп.

²² Карын, эт-канда кӱч јок деп бодолып турган ӱйелер сыраҥай керектӱ болуп калат.

²³ Эт-канда тыҥ баалалбайт деп бодолып турган ӱйелерди артык кичеейдис.

²⁴ Уйатту деп бодолып тургандарына кӧп кичеемел эдедис. Бӱдӱми јараш ӱйелер мыны керексинбей јадылар. Је тыҥ баалалбай турган ӱйелер баалалзын деп, Кудай эт-канды анайда бӱдӱрген.

²⁵ Эт-канда бӧлиниш болбозын деп, ончо ӱйелер бой-бойын теҥ кичеезин деп.

²⁶ Бир ӱйе шыралап турган болзо, оныла кожо ончо ӱйелер шыралап јадылар, бир ӱйе макталып турган болзо, оныла кожо ончо ӱйелер сӱӱнип јадылар.

²⁷ Слер де – Христостыҥ эди-каны, таҥынаҥ – ӱйелер.

²⁸ Кудай Серкпеде, баштапкызында, апостолдорды туткан, экинчизинде – јарлыкчыларды, ӱчинчизинде – ӱредӱчилерди. Ӧскӧлӧрине кайкалдар јайаар кӱч берген, анайда ок ооруны јазар, болужар, башкарар, ӧрӧртинеҥ тилдерле айдар јайалталар берген.

²⁹ Ончозы апостолдор бо? Ончозы јарлыкчылар ба? Ончозы ӱредӱчилер бе? Ончозы кайкал јайаачылар ба?

³⁰ Ончозында ооруны јазар јайалта бар ба? Ончозы ӧскӧ тилдерле айдат па? Ончозы бу тилдерле айтканды јартайт па?

³¹ Мынаҥ јаан јайалталарды аларга кӱӱнзегер. Мен слерге эҥ артык јолды кӧргӱзерим.