1 Фессалоникадагыларга 4 - Јаҥы Кереес

Кудайга учурлалган јӱрӱм

¹ Анайдарда, карындаштар, канайда јӱретени ле Кудайга јарайтаны керегинде бистеҥ ӱредӱ алган эдигер. Слер анайда ла јӱрӱп јадыгар. Је мында мынаҥ кӧп једимдерге једигер деп, Христос Иисустыҥ адынаҥ сурап ла кычырып турубыс.

² Иисус Кайракан ажыра слерге кандый јакылталар бергенисти билеригер.

³ Кудай слерди агару болзын, балыр јӱрӱм јӱрбей тудунзын деп кӱӱнзейт.

⁴ Кажыгар ла бойыныҥ эдин агаруда ла кӱндӱде чеберлейтенин билер учурлу,

⁵ Кудайды билбес ӧскӧ калыктар чылап, кычагардыҥ кӱӱнине салдырбас учурлу.

⁶ Карындажыгар јанынаҥ јаман кылынбагар, бу керекте бойыгарга туза бедиребегер. Бу ончозы учун Кайракан ӧч алат. Ол керегинде башкыда слерге айтканыс ла керелегенис.

⁷ Кудай бисти быјарга эмес, агаруга кычырган.

⁸ Анайдарда, бакпай турган кижи, кижиге бакпай турган эмес, биске Бойыныҥ Агару Тынын берген Кудайга бакпай јат.

⁹ Карындаштык сӱӱш керегинде дезе слерге бичийтени керек јок. Кудай бой-бойыгарды сӱӱрге ӱредип койгон ине.

¹⁰ Анайда ла эдип, Македония ичиндеги ончо карындаштарды сӱӱп јадыгар. Је слерди кычырып турубыс, карындаштар: бой-бойыгарды оноҥ тыҥ сӱӱгер,

¹¹ јобош јӱрерге, бойыгардыйын эдерге, акту бойыгардыҥ колыгарла иштеерге там кичеенигер. Ол керегинде слерге айтканыс.

¹² Туш улус алдында јакшы тудунып, немедеҥ тутабагар деп, мыны айдып турганыс ол.

Кайракан келер

¹³ Карындаштар, ижемјизи јок ӧскӧ улус чылап, слерди ачуланбазын деп, слерди ӧлгӧндӧр керегинде билзин деп турум.

¹⁴ Иисус ӧлӧлӧ тирилген деп бӱдӱп турган болзобыс, Иисуска бӱдӱп ӧлгӧн улусты Кудай Оныла кожо экелер деп, бӱдӱп јадыбыс.

¹⁵ Мыны слерге Кайраканныҥ сӧзиле айдып турубыс: бис, Кайраканныҥ келеринде јӱрӱп, артып калар улус, ӧлгӧндӧрди бир де озолобозыс.

¹⁶ Јакару угулар – архангелдиҥ ӱни ле Кудайдыҥ амыргызыныҥ табыжы. Кайракан Бойы теҥеридеҥ тӱжер, Христостыҥ Бойындагы ӧлгӧн улус озо тирилер.

¹⁷ Оноҥ бис, тирӱ арткан улус, Кайраканла кейде туштажарга, олорло кожо булутка кӧдӱрилерис. Анайып јаантайын Кайраканла кожо болорыс.

¹⁸ Оныҥ учун бу сӧстӧрлӧ кӧкӱдижигер.