1 Фессалоникадагыларга 2 - Јаҥы Кереес

Кудайга јараарыла эдип турубыс

¹ Слерге барып келгенис темей эмезин бойыгар билеригер, карындаштар.

² Је башкыда Филиппыда шыралап ла базындырып, јаан удурлажуны ӧдӱп, Кудайдыҥ шылтузында слерге Оныҥ Сӱӱнчилӱ Јарын ачык-јарык јарлыктаганысты база билеригер.

³ Бистиҥ јарлыктаганыста азыш та, кара санаа да, куурмак та јок.

⁴ Канайып Кудай бисти ченейле, јарамыкту деп бодоп, Сӱӱнчилӱ Јарды бӱдӱмјилеген, анайып бис кижиге эмес, бистиҥ јӱректеристи ченеечи Кудайга јараарга айдадыс.

⁵ Слер билеригер, слерге качан да јарамсыбаганысты, бойыбыска нени де алар деген умзаныш јок болуп айтканысты. Кудай бого керечи!

⁶ Бисти улус мактазын дебей јадыс – слер де, ӧскӧлӧри де.

⁷ Христостыҥ апостолдоры чылап, слерге некелтелӱ келгедий болгоныс. Карын, ортогордо балдар чылап јӱргенис; балдарын эркелеткен энедий болгоныс.

⁸ Слерди анайда сӱӱп, слерге јаҥыс та Кудайдыҥ Сӱӱнчилӱ Јарын эмес, јӱрӱмисти де берерге белен болгоныс, нениҥ учун дезе биске кару болгоныгар.

⁹ Ижибисти ле јоболтобысты санаада алып јӱрген эмейигер, карындаштар. Кемигерди де кӱчсиндирбеске, тӱн-тӱш иштеп, слерде Кудайдыҥ Сӱӱнчилӱ Јарын јарлыктадыс.

¹⁰ Бӱдӱп турган слердиҥ алдыгарда бис агару, чындык ла јек јок кылынып јӱрдис. Оныҥ керечилери – слер ле Кудай.

¹¹ Кажыгарды ла адазы балдарын чылап кӧрӱп јӱргенисти билеригер:

¹² Кудайга јарамыкту этсин деп, слерди кычырдыс, сӧстӧдис, бӱдӱндирдис. Ол слерди Бойыныҥ Каандыгына ла магына кычырат.

¹³ Оныҥ учун бис те Кудайга туркаары алкыш јетирип јадыбыс. Бистеҥ Кудайдыҥ сӧзин угала, јараткан эдигер; оны кижиниҥ сӧзин чилеп эмес, је Кудайдыҥ сӧзин чилеп јараттыгар. Бу сӧс чындаптаҥ андый. Ол слерде, бӱдӱп турган бойыгарда, ижин эдет.

¹⁴ Иудей јеринде Христос Иисустыйы болгон Кудайдыҥ серкпелериле чилеп, слерле база андый болгон ине, карындаштар. Олор иудейлердеҥ чилеп, слер де бойыгардыҥ јерлештеригердеҥ шыра кӧрдигер.

¹⁵ Иудейлер Иисус Кайраканды ла јарлыкчыларды ӧлтӱргендер, бисти сӱргендер, Кудайга јараарыла этпейдилер, ончолорына удурлажадылар;

¹⁶ ӧскӧ калыктар аргадалзын деп, сӧс айдарга турзабыс, буудактап јадылар. Бу ажыра кинчектериниҥ кемин јаантайын толтырадылар. Је учы-тӱбинде олорго чугул јеткен.

Павел серкпеге ойто келип барарга јӱткийт

¹⁷ Бис дезе, карындаштар, кезек ӧйгӧ слердеҥ айрыдып койгоныс, слерди кӧрбӧй, је јӱрегисле айрытпай јӱргенис. Слерге тартылып, алкы бойыгарды кӧрӧргӧ там кӱӱнзегенис.

¹⁸ Оныҥ учун слерге келерге кӱӱнзегенис; мен, Павел, кӧп катап келерге кӱӱнзегем, је бисти сатана буудактаган.

¹⁹ Иисус Христос Кайраканыс алдында ижемјибис кем, сӱӱнчибис кем, мактанып турган кайралыс кем болды? Оныҥ келгенинде слер эмес бедигер?

²⁰ Эйе, слер бистиҥ магыбыс ла сӱӱнчибис.