1 Фессалоникадагыларга 1 - Јаҥы Кереес

¹ Павелдеҥ, Силуаннаҥ ла Тимофейдеҥ – Фессалоникада Ада Кудайдыйы ла Иисус Христос Кайракандыйы болгон серкпеге. Слерге бистиҥ Ада Кудайыстаҥ ла Иисус Христос Кайраканнаҥ јакшылык ла амыр јетсин.

Фессалоникадагы бӱдӱп тургандардыҥ јозогы

² Мӱргӱбисте слерди эске алынып, ончогор учун Кудайга јаантайын алкыш јетирип јадыбыс.

³ Кудайга бӱдӱп, эдип јӱргенигерди, сӱӱшке болуп иштеп, јобоп јӱргенигерди, Иисус Христос Кайраканыска иженип, турумкай болгоныгарды Кудайдыҥ ла Адабыстыҥ алдында туркаары сагыжыста алып јӱредис.

⁴ Кудай слерге карузып јат, карындаштар, Ол слерди талдап алганын билерис.

⁵ Сӱӱнчилӱ Јар слерге јаҥыс та сӧслӧ эмес, је кӱчле, Агару Тынла, толо бӱдӱндирӱле јарлалган. Ортогордо слерге болуп канайда јӱргенисти бойыгар да билеригер.

⁶ Слер бистеҥ ле Кайраканнаҥ тем алдыгар; кӧп кыстадып, Агару Тыннаҥ берилген сӱӱнчиле сӧсти јараттыгар.

⁷ Оныҥ учун Македонияда ла Ахаияда бӱдӱп турган ончо улуска тем боло бердигер.

⁸ Слердеҥ Кудайдыҥ сӧзи јаҥыс та Македонияда ла Ахаияда угулган эмес, је Кудайга бӱдӱп турганыгардыҥ табыжы ончо јерлерге јайылган. Оныҥ учун биске мыны айдары керек јок.

⁹ Слерге барып келгенисти улус бойы айдыжат ине, анайда ок чалулардаҥ Кудайга канайып бурыганарды, тирӱ ле чын Кудайга кулга јӱргенигерди,

¹⁰ теҥеридеҥ Оныҥ Уулын, тиргизилген Иисусты сакып турганыгарды. Ол бисти келип јаткан чугулдаҥ айрып јат.