Titus 3 - Findel i DeeƁwe Ti Alis i Ron

Mute ima Ɗat ti Som Koltifai

¹ Mbe'a ɗufali ɓa si fa hai ta hal ti findel i som kunggul hu i som kaitat, ɓa si te ndere ngang sin masti shak ro ima mii maɗesi.

² Ka si lak findel mafwashi si ɗeng hai kwa, si mas mute i cala, si mas mute i hai muɗyayi, si kof ɗufal shak mute maɗesi.

³ Ai kan hwak a halyang, som njeng na hihai, hu som dang hu mute i yarai si shak gwel i lo' hu yok. Ka mas mute i ka'ti ɗiyai na mulut hu nadon, si nggwe ti kan, kan hwak ka nggwekan ti ɗiyai.

⁴ Myan ima maɗesi hu ɓweti i DeeƁwe Mabum amukan matkof,

⁵ unai DeeƁwe bum kan, a ɓurti ɗamam manderei ima ka masi kwa, a ɓurti gu'ti ashur ames. Bum kan ta fisel ti sasikan ya i muhum al sikan hu mute mamwai ta fisel ti Rin Masapai.

⁶ Shukan Rin Masapai hai gilik ta kyel i Yeso Kristi Mabum amukan.

⁷ A ɓurti mal maɗesi ames, fakan mute manderei hu wis ti kintiɓwi i kop i mupwet i myan hu myan.

⁸ Mai a kyas i findel. I ɓweti ɓa ha lak ɗamam mii ti njeng fwet, ɓa som ima si fa mulut si DeeƁwe hai, si kami loo, si fa hai si masti ro maɗesi. Ɗamam mii si ti ɗat ii calai kwa, si ti ro ta kyel ɗufal shak.

⁹ Titala uɓet i halngyat i gbya' fo, hu mbe' ti manzor i asumam i washash, hu matkaran, hu shaal ngang si anggutat i som Ju hai. Mii a ɗamam i gbya' hu i rafat ti myan ya.

¹⁰ Maɗufal ma kinti matkaar na saa yuti mai, ti'a yus ra, ha hum i hai. Takfai ti andi, ha lang ya ta fisel asus.

¹¹ Ha shangi nyai musut i ɗufal mii si welus tasi mwawei hai, mafwashi ames lefus ɓur hai.

Findel i Dala

¹² Myan ima i ro Artimas ahun a Tikikus ɗak yes kyel ama, nya gbuk ha yes kyel amen na Nikopolis, ɓurti i zan na mulut i wa mbiti humbil ta kyeli.

¹³ Nya gbuk ha bum Zenas manderet ani, hu Apolos ha ti'us ta fisel, masai ngga' ima ha talus myatat ndere shak.

¹⁴ A kpang som mukan si fa haisus si masti ɗama maɗesi, ɓa si shang tal ti myatat i kwai hu wasan, ka si mas mute i gbya' kwa.

¹⁵ Shak ima si akul hu yin, si tuksa too'. To'a som ima si ɓwet nin saa ti fati mulut ta. Mal maɗesi i DeeƁwe u te akul hu hun shak.