Titus 2 - Findel i DeeƁwe Ti Alis i Ron

Kofiti i Mwawei

¹ A Titus, mwashi a kpak ha kof aɗeng ima wa kiga' si kofiti i mwawei.

² Kofa kaya muryai si ka' haisus ya, si mas mute ima si wis ngye, si mas mute ti shingat. A kpak fati mulut amu u te ti cala, saa ti ɓweti hu ka'ti agung.

³ Andi hwak, kofa kaya murwafi si mas mute i fati DeeƁwe ngye. Ka si rafat asum i shini ya kwa, ka si te ii som i woti likit si fil kwa. Fo i mandi, ɗat si kof ɗufal aɗeng ima ɗat.

⁴ Unai sin arof ima si kaya mii, a kpak si kofti arof muyayi nyai, ɓa si ɓwet arya ames hu fe ames,

⁵ si te ti ka'ti hai ya, hu mute ti sapa, si te ii som ro ta wurai ames, si fa hihai ta kyel i arya ames. Kan ndok si yes ti ɗama i shusho si findel i DeeƁwe hai.

⁶ Andi hwak, taɓaka zalang si ka' haisus ya.

⁷ Saa ti ɗamam shak, tya ii ɗama i kaani wa kyel ames ta fisel ti masti ɗamam maɗesi. Saa ti kofiti ama, kofayus mute manderei, hu muni mwat,

⁸ hu muro maɗesi ima ɓa si se'i kwa. Ɗak ima si zansa ti wei, si wo shusho si far ɗama mafwashi ima ɓa si lak sikan hai wet.

⁹ Kofa yarai si hal aɗeng ima som wurai ames si laksus ngang, si fa hai masus ɗamam i ɗat si ɓwi fwet. Ka si werusi ti findelal kwa,

¹⁰ ka si shirus ɗama kwa. Fo i mandi, si kof haisus sin a som mwawei, hu som hyai ta, ɓa kofiti si DeeƁwe Mabum amukan hai u te ii ɗama i gwel.

¹¹ Ɓurti andi, mal maɗesi i DeeƁwe ima yes ti bum matkof wa kyel ɗufal shak.

¹² DeeƁwe ta fisel ti mal maɗesi ames ma kof sikan ɓa ka ni, “Wayou” si mute i kaciwa' myanat ti DeeƁwe fo, hu i hya ti gwel i mute naya. Ka mas mute na naya ti murak na hai, hu mute manderei, hu mute i myanat ti DeeƁwe fo na waya ti mwashi moti.

¹³ Myan ima kan shwaiti shishat si mwen muɗesi si kintiɓwi i mupwak ya i cinjangat i DeeƁwe mbai amukan hu Mabum, Yeso Kristi.

¹⁴ Ayis fa mupwet asus ɓa si cat kan ii ra ta shak mafwashi wi, ɓa kan ima ka mii ɗufal ames gbum u sapa kan ya, kan ɓweti masti aɗeng ima mii maɗesi.

¹⁵ A kpang ha kof ɗamam mii, ha fa som koltifai njeng i mulut si masus. Ha mati mbaitat ɓa ha ɗak tus. Ka ha ɓwet ɗeng u koma aɗeng ima ha laki ya kwa.