Titus 1 - Findel i DeeƁwe Ti Alis i Ron

¹ Kaada moti ii ta kyel Pool, yere i DeeƁwe, hu mamuro i Yeso Kristi. DeeƁwe tukun ɓa i yes i mba findel i fati mulut wa kyel som ima DeeƁwe benus, hu shang ti mwawei ima yes ti myanat ti DeeƁwe fo.

² Fati mulut hu shangi si mute mangra si kintiɓwi hai i mupwet i myan hu myan, ima DeeƁwe lak, yis ima lak fyarat kwa. Ayis fa kintiɓwi kaciwa' si fur myan.

³ Mwashi si myan hai kiga' lang ya ti findel ames na kweneng wi, ima ni mba ti ɗufali shak. A ti laki i DeeƁwe Mabum amukan, si fan ro mai na ra ɓursus.

⁴ I ma worong wa kyel Titus, al amen i mwawei saa ti fati mulut tima ka mati shak. Mal maɗesi hu cala ta kyel i DeeƁwe Dee, hu Kristi Yeso Mabum amukan.

Ro i Titus ta Kiret

⁵ Aɗeng ima kin i hona ta Kirit ɓa ha tas aɗeng ima kat kaciwa' mbiti, hu no' ti tabwa'a' ta shak ashwaha fota ngga' ima i laka ta.

⁶ A kpak tabwa' u te kaciwa' afol, ma mbor andek, maɗufal ima fe ames si fa mwawei, si shangus ti mute ii fe se hu njeng na hihai kwa.

⁷ Tabwa' a maɗing ti ro i DeeƁwe fo, a kpak u te kaciwa' afol. A kpak ma wa mute ii ma nggye na hai hu ma futut kang kwa. A kpak u te ii ma woti likit u fil kwa, hu maɓin ahun a mambwa si cef hai kwa.

⁸ Fo i mandi, a kpak u te ii ma mat ti mwalmwat, hu maɓweti maɗesi, hu ma ka'ti haisus, hu manderei, hu masapa, hu munung.

⁹ A kpak u ka' muro i ngyeng gbwenjeng ima si kofus ti, ɗak a yis nai wis njeng i fati shini njeng i mulut ti kofiti manderei, hu ɓor ti lelli ya i som ima si zan ti wei ti kofiti manderei ya.

¹⁰ Som njeng na hihai si mana hyang, ima sima findelal i gbya', hu dang ti ɗufal. Findeli wa kiga' si ima si lwesheshat si findel nyai, maɗufal wis bum ta fisel ti mukwen.

¹¹ A kpang si te cakat, ɓurti si hatat ti wurai ya hyang tasi mwawei hai, ta fisel ti kofiti i fyarat. Si masi andi ɓurti ɓa si wis cef.

¹² Kol ima andek ta saa ti som shit ames lak ni, “Som Kirit ngang si lak ti fyarat, a loha i ya mufwashani, a njwangash som i lok ti cwa.”

¹³ Findel mai a awei. Ɓurti andi, lakayus ɓin fwet, ɓa si te ti njeng si fati mulut hai.

¹⁴ A kpak si hon hal ti findelal i tang ti tang i som Ju, hu anggutat i ɗufal ima si nggwes ti mwawei.

¹⁵ Ɗamam shak si ti sapa ta kyel i som sapa. Ɗama nin mati sapa ta kyel som zuruk, hu ima si nggwes i fati mwawei kwa, ɓurti ambe' hu mulwat ames shak si rafatus.

¹⁶ Musut i ɗufal mii, a ti fwai si ni si shang DeeƁwe, mute naya asus ti ɓwinggil shangsus. Si yus ii zuruk, hu som njeng na hihai, hu si ndok masti ro maɗesi nin kwa.