Kaada ti Pool wa kyel Som i Rom 7 - Findel i DeeƁwe Ti Alis i Ron

Kaani Tasi Mute i Kunggo

¹ A shunun, hun a som ima si shang anggut. Hu shangi nyai, anggut mati andok tasi a maɗufal ima mati mupwet je kwa haa?

² Ma fota ati, anggut ni, mbor ti kunggo ti mano' si kunggo amet hai shak myan ima re amet yis ti mupwet. Na remet motus, ti wis mute i haisut ta anggut i kunggoi.

³ Unai na ti kunggo ɗeng remet yis ɗiri na naya ti mupwet, ti mii mu arak i zuruk. Na remet mot, ti wis cati ii ra ta anggut i kunggoi, na ti kunggo ɗeng, tima a arak i zuruk kwa.

⁴ A shunun, andi hun hwak hu mot ta anggut wi akul hu Kristi, mwashi ɓa hu te ii ames, yis ima si luktus fit ta mot wi, ɓa ka fa ma al maɗesi wa kyel i DeeƁwe.

⁵ Myan ima ai mafwashi yis kof sikan fisel, gwel mafwashi luk fit tasi anggut hai yis masti ro na lo' kanti, ɓa ka fa ma al ima kwal mot.

⁶ Mwashi, nasi mot tima ai ti fut kan, ka wis cati ii ra nasi angguti hai, ɓa ka mas ro na fisel i Rin mumwai, a si fisel muwili tima si worong tasi angguti hai kwa.

Makutuk Ti Mafwashi

⁷ Ka wa nyai ami ndai ya? Angguti a mafwashi haa? Wayou, andi kwa fweng! A ɓurti anggut kwa naɗin i shang mafwashi kwa. Naɗin wa' anggut ti ni, “Kan ha te ii ma yok kwa,” naɗin i shang aɗeng ima si nitus a yok kwa.

⁸ Ɓurti mafwashi mas ro ti anggut nasi yin hai, kinun shak musut i gwel, ɓurti na anggut yit na kwa, mafwashi a mot.

⁹ Ai yin ti mupwet kaciwa' shang ti anggut, myan ima anggut yes, unai mafwashi luk fit ti mupwet, yin i motun.

¹⁰ I wisi nyai, anggut ima nin wa yes ti mupwet, hat yesus ti a mot.

¹¹ A mafwashi mas ro ti anggut ɗak dangun, ii ta fisel ti anggut kin i mot.

¹² Ɓurti andi, angguti a musapai, a munderei, a muɗesi.

¹³ Unai ɗama maɗesi ani tehus ii mot na kyel amen haa? Wayou! Fo i mandi, ɓa ka shang mafwashii fota mafwashi, ti kol mot na wi yunti ta fisel ti aɗeng ima mii maɗesi, ɓa ta fisel ti anggut, mafwashi u matkof rasman ii mafwashi.

¹⁴ Ka shangi nyai angguti tima ti rin, ɗak yin i yun kaciwa' rin, si juwilun ya fota yere ta ra i mafwashi.

¹⁵ I shang aɗeng i masi kwa. Ɓurti aɗeng ima i ɓweti masi i masus kwa, aɗeng ima i nggwenti, ayis i masi.

¹⁶ Na i masti aɗeng ima i ɓweti masi kwa, i ɓwet ndai nyai angguti ma ndere.

¹⁷ Fota ngga' ima mata, ayin ti haisun i masi kwa, a mafwashi ima mana wii yunti.

¹⁸ I shangi nyai gwel i ɓweti hai amen ma wa honsun i mas ɗama maɗesi kwa. I gwel masti maɗesi, shak ta andi pwanun.

¹⁹ Aɗeng ima i ma masi, a maɗesi ima i ɓweti masi yi kwa, a mafwashi ima i nggwenti, ayis i cuhun wei ti masi.

²⁰ Mwashi na i mas aɗeng ima i ɓweti kwa, kof ndai ayin i masi kwa, a mafwashi ima mana wii yunti ma masi.

²¹ A andi i wis anggut moti yit ro, na yin ɓweti masti maɗesi, unai i wis haisun yin yun masti a mafwashi.

²² I jakak ti anggut i DeeƁwe fwet na mulut amen.

²³ Shak ta andi i ɗing anggut nin yit ro na ɓwayai i lo' amen, yit masti ɓwol ti anggut i mbe' amen, ti kinun i te ii yere i anggut i mafwashi tima ti ro na ɓwayai i lo' amen.

²⁴ Worowa! Awe ma wa bumsun na lo' ma kolti mot mai ya?

²⁵ Palang wa kyel i DeeƁwe, ɓurti bumun saa ti Yeso Kristi Deembai amukan! Unai yin ti haisun na ambe' amen, i mii yere i anggut i DeeƁwe, ɗak na lo' i maɗufal ma masti mafwashi, i yun ii yere i anggut i mafwashi.