Kaada ti Pool wa kyel Som i Rom 6 - Findel i DeeƁwe Ti Alis i Ron

Mot ta Mafwashi Wi, Mupwet saa ti Kristi

¹ Ka wa nyai amiya? Ka wa cwai ti wei ti masti mafwashi, ɓa mal i DeeƁwe u cu wei ti hya haa?

² Wayou! Ti ka mot kan ta mafwashi wii. Ami ma wa kini ka cu wei ti mute ta wi hwak ya?

³ Ahun hu shangi nyai shak a sikani ima si mas kan batisma saa ti Yeso Kristi, si mas kan batisma ii ta mot ames kwani?

⁴ Ɓurti andi si laikan akul hu Kristi ta fisel ti batisma saa ti mot, ɓa ka mas mute mumwayi hwak, fota ngga' ima Kristi luk fit ta mot ta fisel ti cinjangat i Dee.

⁵ Naɗin ka te andek hu yis fota ati ta mot ames wii, ka nin wa mute andek hu yis hwak ta saa ti muluk fit ames ta mot wii.

⁶ Ɓurti ka shangi nyai, mute amukan ima ai si nggwak ya akul hu yis, ɓa si ɓel lo' i mafwashi amukan ya, a ɓurti kan ka cu wei ti mute ii yarai i mafwashi kwa.

⁷ Ɓurti shak maɗufal ima mot, wis cati ii ra ta mafwashi ndai.

⁸ Mwashi na ka mot akul hu Kristi, ka fa mwawei nyai, ka wa mupwet tikul hu yis hwak.

⁹ Ɓurti ka shangi nyai, Kristi luk fit ta mot wi, ma wa muhum mot kwa, mot ti mati andok si yis hai hwak kwa.

¹⁰ Myan ima Kristi mot, mot ta mafwashi wi sa andek ɗwyat, ɗak mupwet tima pwet, mwashi ma mute ii fut ti hai hu DeeƁwe.

¹¹ Andi hwak, mbe' hun haisu fota som ima si mot ta mafwashi wi, ɗak si yusti mupwet ta kyel i DeeƁwe saa ti Yeso Kristi.

¹² Ɓurti andi, kan hu hon mafwashi u mas kaitat ta wii i lo' amu ma mot, ɓa hu kolfai ti gwel mafwashi ames kwa.

¹³ Kan hu fa ɓwayai i lo' amu si masti mafwashi hai, fota ɗamam i ro i gbaf kwa. Fo i mandi, fahun haisu ta kyel i DeeƁwe fota som ima si re'us ya ta mot wi wa mupwet. Fahun ɓwayai i lo' amu ta ra i DeeƁwe fota ɗamam i ro munderei.

¹⁴ Ka hu hon mafwashi u mas kaitat si hun hai kwa, ɓurti hu mata ra i anggut kwa, hu mayu ta ra i mal i DeeƁwe.

Yarai i Mute Manderei

¹⁵ Atini ndai ya? Mwashi ima mal DeeƁwe cat kan ii ra tasi anggut hai, kof ka wa cwai ti wei ti masti mafwashi ndai haa? Andi kwa fweng!

¹⁶ Hu shangi nyai, na hu fa haisu ta kyel i ɗeng ɓa hu halus fota yarai, hun a yarai i maɗufal ima hu halsus. Na hun ii yarai i mafwashi gbaak, ma wa kolsu a mot, ahun a hal ti findel, ima kol mute manderei ya?

¹⁷ Palang wa kyel i DeeƁwe, shak ta ngga' ima ai hun ii yarai i mafwashi, mwashi hu mas ro ti shak ɗamam ima ni kofuti ti mulut andek.

¹⁸ Si catu ii ra ta mafwashi wi, hu te ii yarai i mute manderei.

¹⁹ I findelsu ii na saa ti lo' hu wash, a ɓurti hu ti to i lakan i haisu. Fota ngga' ima ai hu mana ti fati lo' amu si masti ɗamam i zuruk ta, hun cwai ti wei si mafwashi, andi hwak, fahun hai si mute ii yarai i mute manderei, ima yas ti sapai.

²⁰ Myan ima hun ii yarai i mafwashi, si catu ii ra ta mute manderei.

²¹ A mwai i mi hu karat ta myan ima hu mas ɗamam ima si fasu shusho mwashi ya? Ɗamam mii si kwal mot!

²² Mwashi ima si catu ii ra ta mafwashi, hu te ii yarai i DeeƁwe, mwai ima hu karat kolu ta mute ti sapai, dalai a mupwet i myan hu myan.

²³ Ɓurti talal i mafwashi a mot, ɗak mal i DeeƁwe a mupwet i myan hu myan ta kyel i Yeso Kristi Deembai amukan.