Kaada ti Pool wa kyel Som i Rom 4 - Findel i DeeƁwe Ti Alis i Ron

Mute Manderei i Ibirai ta Fisel ti Fati Mulut

¹ Unai ami ka wa laki si Ibirai Dees i washash amukan hai, si ɗamam ima wisi mii ya?

² Na Ibirai wis mute manderei ta wei i DeeƁwe ɓurti ro ames, mati ɗama i pati ajin. Shak ta andi, ma wa pati ajin ta wei i DeeƁwe kwa.

³ Ami Worong lak ya? “Ibirai fa mwawei si DeeƁwe hai, si mbe'us ta saa ti som munderei ɓurti fati mulut ames.”

⁴ Mwashi na maɗufal mas ro, talal ames ma wa mute fota mal kwa, a cef i ro ames.

⁵ Shak ta andi, maɗufal ima mas ro kwa, ɗak kinɓwi si DeeƁwe ima kyan som mufwashi si te ii munderei, si mbe'us ta saa ti som munderei ɓurti fati mulut ames.

⁶ Devid lak ɗama andek myan ima findel si maɗesi i maɗufal ima DeeƁwe mbe'us ta saa ti som munderei kaciwa' masti ro.

⁷ “Disyo' ma si som ima si shuhus mafwashi ames ya, si nitima.

⁸ Disyo' ma si maɗufal ima Deembai ma wa muhum mbe'sus mafwashi ames hai kwa.”

⁹ Maɗesi mai ma si a som i mukwen kyek, ahun a si som ima si kaciwa' mukwen hwak ya? Yukwe', ai kan laki nyai si mbe' Ibirai ta saa ti som munderei ɓurti fati mulut ames.

¹⁰ Si ni yis a manderei a tami ya? A takfai tima si masus mukwen, ahun a kaciwa' ti si masusi ya? A kaciwa' ti si masusi.

¹¹ Ɗak mat mameer i mukwen, a bong i manderei ima mati ta fisel ti fati mulut, myan ima yis kaciwa' mukwen. Ɓurti andi, Ibirai te ii dee i shak som ima si fa mwawei kaciwa' ti si masus mukwen, ɓa si mbe'us ta saa ti som munderei.

¹² Andi hwak Ibirai te ii dee i shak som ima si mas mukwen ɗak si ti fati mulut si DeeƁwe hai, fota ngga' ima ai Ibirai masi ɗak si masus mukwen.

¹³ Ibirai hu washash ames si mat kintiɓwi i cwai ti kop i naya ii ta fisel ti anggut kwa, ii ta mute manderei ima yes ta fisel ti fati mulut.

¹⁴ Ɓurti na a som i hya ti angguti si wa cwai ti kop i naya, fati mulut i maɗufal tes ii gbya', kintiɓwi ima DeeƁwe fa kan te ii fo i ɗama kwa.

¹⁵ Ɓurti anggut ti dwal futut i DeeƁwe, ɗak kyel ima anggut mata kwa nggyel ti anggut ya tyai ta kwa.

¹⁶ Ɓurti andi, kintiɓwi mai yes ii ta fisel ti fati mulut, ɓa u te ii mal u fa njeng wa kyel i shak washash i Ibirai, a som i hya ti anggut kyek kwa, a som ima si fa mulut fota Ibirai hwak. Yis a demukan shak.

¹⁷ Fota ngga' ima si worong, “I kina ha te ii dee i ramam hyang.” Yis a demukan ta ɓwai i DeeƁwe, ima ka fa mwawei ii hai, DeeƁwe ima fai som ima si mot mupwet, ima lai ɗamam ima si na kwa si yes.

¹⁸ DeeƁwe fa Ibirai kintiɓwi i washash hyang. Myan ima ɗingi fota si wa hyai shak kwa, shak ta andi, Ibirai fa mulut si DeeƁwe hai. “Ɗak te ii dee i ramam hyang.”

¹⁹ Fati mulut i Ibirai tiɗya kwa, shak ta ngga' ima ɗing njeng ames mbit ta ɓurti kayaat, mati wilyal ima si kol ndik andek, Usara hwak ti lang wilyal i al ii hai.

²⁰ Shak ta andi, ha' fati mulut ames ya tasi kintiɓwi i DeeƁwe kwa, cuhus wei ti wis ti njeng si fati mulut ames hai, yis fati DeeƁwe ngye,

²¹ te ti njeng i mulut nyai, DeeƁwe mati andok i hya ti kintiɓwi ames.

²² A aɗeng ima kin nai, “Si mbe'us ta saa ti som munderei.”

²³ Findelali si ni, “Si mbe'us ta saa ti som munderei” a ɓursus kyek si worong kwa,

²⁴ a ɓur sikan hwak, kan ima DeeƁwe ma wa mbe' sikan ta saa ti som munderei, kan ima ka fa mwawei si DeeƁwe ima ha' Yeso Deembai amukan fit ta mot wi.

²⁵ A ɓurti mafwashani amukan si fa Yeso ta ra i mot, si ha'us fit ti mupwet hwak, ɓa ka wis mute manderei ta mabel i DeeƁwe.