Kaada ti Pool wa kyel Som i Rom 3 - Findel i DeeƁwe Ti Alis i Ron

A DeeƁwe je Ka wa Kintiɓwi si Yis Hai

¹ Ami a ɗat i mute ii ma Ju ya, ahun anggi ɗati mukwen mati ya?

² Hei angga'i nai, mute ii ma Ju mati ɗat ta fiselal hyang! Ti bya', DeeƁwe fa a som Ju muro ames ta ra.

³ Na shini sin ti fati mulut kwa hee? Kof ndai ɓurti si ti fati mulut kwa, ka kinɓwi si DeeƁwe kwa haa?

⁴ Wayou! DeeƁwe a ma mwawei, ɗufal shak a som i fyaratat. Fota ngga' ima si worong ta nyai, “Ɓurti na si mba ha si wisa kiga' ta findel ama, ha wis mulangya ta puɓwar wi.”

⁵ Na to amukan kof nyai DeeƁwe a manderei rasman, ka wa nyai amiya? Ka ni DeeƁwe masi a ndyas kwa, ima yes ti futut ames na hai kan ti haa? (I ma findel ti a ambe' i maɗufal.)

⁶ Andi kwa fweng! Na yis a andi, DeeƁwe ma wa tot ti naya moti puɓwar atini ya?

⁷ Ɗeng ma wa masti uɓet, “Na halngyat amen kin mwawei ti DeeƁwe ti ngye, ɗak cinjangat ames ngye hwak, ami kin si lef sun ɓur hai fota ma mafwashi ya?”

⁸ Hu ɗufal shini hwak si rafat kan asum ya ti nyai, ka ni, “Ka cu wei ti masti mafwashi ɓa maɗesi u ngye!” Som ima si lak musut i ɗamam mii asus ti pun.

Ɗeng a Manderei Kwa

⁹ Ka wa dala ti findeli atini ndai ya? Kan Ju ka ɓin anggumi ani? Andi kwa fweng! Ti ka kof nyai, Ju hu Ramam shak si mata ra i mafwashi.

¹⁰ Fota ngga' ima mata worong, “Ɗeng a manderei kwa, si wis andek kwa fweng.

¹¹ Ɗeng ames ka'i kwa, ɗeng far DeeƁwe kwa.

¹² Shak si hat DeeƁwe ti mas, shak si tehus ii ɗama i gbya'. Ɗeng mas maɗesi kwa, si wis andek kwa fweng.”

¹³ “Woorong ames a fiyai ima ma awuri alisas ames ma shang ti ro i dang.” “Mwatan i anggor i ɗamafwashi mata fwai yusti.”

¹⁴ “Fwai ames hya ti findel i ale' hu maɓol.”

¹⁵ “Sisai ames te randal si shwaiti wash ya.

¹⁶ Rafati ya hu shum kwalfai asussi ngang.

¹⁷ Si shang fisel ti mute cala kwa.”

¹⁸ “Si mwen DeeƁwe fo kwa fweng.”

¹⁹ Mwashi ka shang aɗeng ima anggut lak, lak a som ima si ta ra i anggut, ɓa fwai i som shak si kat cakat, hu shak naya ti fa ambe' ta wei i DeeƁwe.

²⁰ Ɓurti andi, ɗeng ma wa mute ii manderei ta shishat ames ta fisel ti masti ro ti anggut kwa, fo i mandi, tasi anggut hai ka shang mafwashi.

Mute Manderei ta Fisel ti Fati Mulut

²¹ Mwashi si kof kan ti mute manderei ta kyel i DeeƁwe, kaciwa' masti ro ti anggut, ima Anggut hu worong i som shit i DeeƁwe si lak.

²² Mute manderei mai yes ii ta kyel i DeeƁwe, ta fisel ti fati mulut saa ti Yeso Kristi wa kyel shak som ima si fa mwawei. Kaciwa' ɓweti hai,

²³ ɓurti shak ɗufal si mas mafwashi, si to ta cinjangat i DeeƁwe.

²⁴ DeeƁwe kinus mute manderei ti mal ames, ta fisel ti dumi ya, ima yes ta kyel i Yeso Kristi.

²⁵ DeeƁwe fa Yeso ɓa u te fota kuna i ha' ti mafwashani ya, ta fisel ti fati mulut saa ti wash ames. Mas mai ɓa u kof mwawei ames, ɓurti saa ti ka'ti agung ames hon mafwashi ima si masi kaciwa' andash.

²⁶ Masi andi ɓa u kof mwawei ames nasi myan ti mwashi, ɓa yis u mas mwawei hu ima cat sin ima si fa mulut si Yeso hai ii ra.

²⁷ Ka wa pati ajin nyai ka mas ɗama nin ima DeeƁwe ma ɓweti haa? Wayou, ɓurti DeeƁwe mat kan ii ta fisel ti masti ro ti anggut kwa, ii ta fati mulut.

²⁸ A ɓurti ka ka'i kporong nyai, DeeƁwe kin maɗufal mute manderei ii ta fisel ti fati mulut kaciwa' masti ro ti anggut.

²⁹ DeeƁwe a DeeƁwe i som Ju je haa? Ayis a DeeƁwe i Ramam hwak kwa haa? Hei, ii Ramam hwak.

³⁰ Ɓurti DeeƁwe ma andek je, ma wa masti mwawei wa kyel i som ima si masus mukwen ta fisel ti fati mulut, hu ima si masus mukwen kwa ta si i fati mulut ani.

³¹ Ka wa fot ti angguti ya ndai ɓurti fati mulut si mai haa? Andi kwa fweng! Fo i mandi, ka wa hya ti angguti.