Kaada ti Pool wa kyel Som i Rom 2 - Findel i DeeƁwe Ti Alis i Ron

Ɓur i DeeƁwe a Kiga'

¹ Ɓurti andi, ha kat ti fo i findel kwa, ha ima ha ɗing ti mafwashani i shini ha lefsus ɓur hai, myan ima ha ɗing ti mafwashi i shini ha lefsus ɓur hai, ha lefti a haisai hwak, ɓurti ha ma lefti ɓuri ha masani andi hwak.

² Mwashi ka shangi nyai ɓur i DeeƁwe ha' wei ti som ima si masti musut i ɗamam mii, a si hai mwawei.

³ Ɓurti andi, na a ha maɗufal kek, ha lefti ɗufal ɓur tasi musut i mafwashi ima ha masani hwak, ha ɗingi ha wa pis ti ɓur i DeeƁwe haa?

⁴ Ahun ha kom ti maɗesi mahyangi i DeeƁwe ya, hu fwang ti kyel, hu ka'ti agung ames, kaciwa' shangi nyai maɗesi i DeeƁwe ma dulsa ɓa u kola ta kyel ima ɓa ha hatat ta mafwashi ama ya?

⁵ Unai ɓurti njeng ti hai, hu mulut tima ti nggwet i hatat ta kyel i DeeƁwe, ha ma suɓut ti a haisa futut, yes mwen ti futut i DeeƁwe, myan ima ɓur asus munderei ti wa matkof.

⁶ DeeƁwe “ma wa tal ti ɗufal myatat kiga' hu roha ima si masi.”

⁷ DeeƁwe ma wa fati mupwet i myan hu myan, wa kyel i som ima si lweshesh si masti maɗesi hai si far cinjangat, hu ngye, hu mupwet i myan hu myan ti njeng na mulut.

⁸ Ɗak ma wa talsus ti futut muvwe'i, sin som ima si ɓweti haisus si nggwes ti mwawei, a mafwashi je.

⁹ Shak ɗufal ima si masti mafwashi, si wa wis ti shum hu kofi ya, ti bya' a Ju ɗak Ramam

¹⁰ Shak ɗufal ima si masti maɗesi si wa wis ti cinjangat, hu ngye, hu mute cala ta kyel i DeeƁwe, ti bya' a Ju ɗak Ramam.

¹¹ Ɓurti DeeƁwe mati ɓweti hai kwa.

¹² Shak maɗufal ima mas mafwashi kaciwa' shang ti anggut, ma wa rafat u fot kaciwa' anggut. Shak maɗufal ima mas mafwashi si anggut hai, si wa totsus puɓwar si anggut hai.

¹³ Ɓurti andi, a som ima si hal ti anggut je, si mii munderei ta mabel i DeeƁwe kwa, a sin ima si masti ro ti angguti, DeeƁwe ma wa nyai sin a munderei.

¹⁴ A andi, myan ima Ramam ima si kaciwa' anggut ɗak ambe' ames fas ta lo' ɓa si mas aɗeng ima mata anggut, kof nyai sin ima si kaciwa' anggut si te ii angguti haisus.

¹⁵ Ɗamam ima si masi kof nyai, aɗeng ima angguti lak si worong ta mulwat ames. Ambe' ames a shit ames hwak, nin myani, ambe' ames u kofus ti mafwashi ames, nin myani, ambe' ames u kofus nyai si masi kiga'.

¹⁶ Mai ma wa mufur tasi mwen tima DeeƁwe ma wa tot ti ɗufal ɓur, si ɗamam ima si ta ambe' ames wi ta fo i Yeso Kristi, fota ngga' ima Muro Maɗesi ames lak ta.

Som Ju hu Anggut

¹⁷ Mwashi ha nyai ha a ma Ju, ha fati njeng si anggut hai, ha pati ajin ti myatat ama hu DeeƁwe,

¹⁸ na ha shang aɗeng ima ma ɓweti ha masi, ha shang aɗeng ima ma ndyas, ɓurti anggut lak andi.

¹⁹ Na ambe' ama gana nyai ha a ma kofti manzyau fisel, hu kweneng i som ima si ta maɓing wi,

²⁰ makofiti wa kyel i halyang, makofiti wa kyel i fe muyayi, ɓurti ha mati anggut i shangi hu mwawei.

²¹ Unai ha ima ha kofti shini, ha kofti haisa kwani? Ha ima ha laki nyai kan si shir shir kwa, ha shiyaran ti shir kwa haa?

²² Ha ima ha nyai kan ɗufal si mas arak i zuruk kwa, ha masan ti arak i zuruk kwa haa? Ha ima ha nggwya ti harkyel, ha shir ɗama ta puk kwa haa?

²³ Ha ima ha pati ajin ti anggut, ha se' DeeƁwe ti lel ti anggut kwa haa?

²⁴ Fota ngga' ima si worong ta, “Asum i DeeƁwe wis se' ta saa ti Ramam ɓursu hun som Ju.”

²⁵ Mukwen ti mati ɗat, na ha mas ro ti anggut. Na ha nggyel angguti ya, te fota ha masi kwa fweng.

²⁶ Na som ima si mas mukwen kwa, si mas aɗeng ima angguti lak, DeeƁwe ma wa ha'sus fota som ima si mas mukwen kwa haa?

²⁷ Ramam ima si mas mukwen kwa, ɗak sin masti aɗeng ima anggut lak, si wa totsu ɓur hun som Ju ima hu mas mukwen ɗak hu mati anggut i DeeƁwe, shak ta andi, hu masti ro kwa.

²⁸ A ɓurti ha te fota ma Ju, hu ha mas mukwen, ma wa kinsa mute fota ma Ju gbum kwa.

²⁹ Wayou, maɗufal a ma Ju na yis ii ta wii i mulut, ɗak mukwen ti mwawei a mukwen ti mulut ta kyel i Rin, a ti anggut ima si worong kwa. Musut i maɗufal mai wyas ngye ii ta kyel i DeeƁwe, ii ta kyel i ɗufal kwa.