Kaada ti Pool wa kyel Som i Rom 16 - Findel i DeeƁwe Ti Alis i Ron

Too' i Haisun

¹ I mati ɗamam muɗesani i laki si tusikan Ufibi hai, yere ti som koltifai ta Kenkirya.

² Mat hu yut saa ti Deembai ta ngga' ima ɗat hu mat som musapai ta, fahun yut shak bum ima ti ɓweti ta kyel amu, ɓurti yit ti bum ɗufal hyang shak ta yin yi.

³ To' hun Uprisila hu Akila myayun i ro saa ti Kristi Yeso.

⁴ Si fa mupwet asus ɓursun. Ayin kyek kwa, shak ta suɓut i som koltifai i Ramami si palang ɓursus.

⁵ To' hun som koltifai ima si shwayan ta wur ames hwak. To' hun Afanitis, mwen manderei ima tong mati Kristi findel i DeeƁwe ti bya' ta shak ta' ti Asya.

⁶ To' hun Uryam tima ti mas ro fwet ɓursu.

⁷ To' hun Andaranikus hu Yuniya, shunun ima ni ta mano' akul. A som ima ɗufal hyang si fasus ngye ta saa ti fe muro, si mat Kristi ɗak yin i mat.

⁸ To' hun Amfiliyatus ima i ɓwetus saa ti Deembai.

⁹ To' hun Urbanus mwes i ro aminin saa ti Kristi, hu mwen manderei Sitakis.

¹⁰ To' hun Afalis ima si mba hus, ro ames manderei saa ti Kristi. To' hun som i wur i Aristobulus ta.

¹¹ To' hun nusun Herodiyon ta. To' hun ɗufal ima si ta saa ti Deembai ta wur i Nakisus.

¹² To' hun Utirayifina hu Utirayifisa, arof ima si mas ro fwet saa ti Deembai. To' hun camsun Ufarsis ta, a nin mbori hwak mu ro fwet saa ti Deembai.

¹³ To' hun Rufus ima Deembai benus, hu nasus, tima ti kolun fota al amet hwak.

¹⁴ To' hun Asinkiritus, hu Filigon, hu Hames, Patirobas, hu Hamas hu shak shunukan ima sima tikul.

¹⁵ To' hun Filologus, hu Ujuli, hu Neriyus hu tusus, hu Olimfas hu shak som musapai ima sima tikul.

¹⁶ To' hun ɗiyai ti too' i matɓwet masapai. Shak som koltifai ti Kristi si too' su.

¹⁷ A shunun, i fwalsu tehun mweret hu nggyu ti som i yes ti matgwyakan na saa yuti, si kinsu bukatan, sin ha' ti wei ti kofiti ima hu wisi. Mas hun maleng ti sin.

¹⁸ Musut i ɗufal mii si masti a ro i Deembai amukan Kristi kwa, a ɗar asus. Ti findelal i mimyat na fo hu fati ngye i fyarat, si dang ɗufal ima si yus ti ambe' i fe.

¹⁹ Shak ɗufal si hal ngga' ima hu hal ti findel ta, i hya ti jakak ɓursu. Ɗak i ɓweti hu te ti shingat si masti maɗesi hai, hu halngyat si masti mafwashi.

²⁰ DeeƁwe ma fati mute i cala mwash at Shatan, u fu mbaitat si yis hai. Ɓa maɗesi i Deembai Yeso amukan u te akul hu hun.

²¹ Timoti, mwen i ro ma too' su, andi Lushyos hwak, hu Jason, hu Sosipata ima a shunun.

²² Yin Tartiyas, ma worong ti kaada mai, i too' su saa ti asum i Deembai.

²³ Gayus ima matun ta wur ames, ima shak som koltifai hwak si shwayan ta wuri, ma too' su. Arastus, ma ɗak ti cef hu ɗamam i ashwa hu nusikan Kwatus si too' su.

²⁵ Shak cinjangat wa kyel i DeeƁwe, a yis ndok u kinu njeng ti Muro Maɗesi amen. A muro si Yeso Kristi hai ima kof aɗeng ima sinzam ɓursu hun Ramam. A findel ima ai si fot ti tasi ɓele,

²⁶ unai mwashi matkof ta fisel ti worong i som shit si laki i DeeƁwe ima mana tasi myan hu myan. Mas mai ɓa shak Ramam si fa mwawei, si mas aɗeng ima DeeƁwe ma ɓweti.

²⁷ Cinjangat i myan hu myan wa kyel i DeeƁwe ima a yis je mati piris saa ti Yeso Kristi! Aandi.