Kaada ti Pool wa kyel Som i Rom 15 - Findel i DeeƁwe Ti Alis i Ron

¹ Kan ima ka ti njeng ɓa ka ka' agung ti mufur i som ima si to, ɓa kan ka ɓwet hai asikan kwa.

² Shak a sikani ka mas aɗeng ima u kin nusikan ɗat si ɓwi, ɓurti maɗesi ames, ɓa ka ta'us.

³ Ɓurti Kristi mas a ɗama i ɗat si ɓwi i haisus kwa, fota ngga' ima si worong, “Se' ima si sya'a fur nasi hai yunti.”

⁴ Shak ɗamam ima si worong ta si ɓele, si worong ɓa u kof kan shangi, ɓa ka ka'ti agung, hu njeng na mulut ima ka wisi ta Worong, ka te ti kintiɓwi.

⁵ Ɓa DeeƁwe ma fati ka'ti agung hu njeng na mulut u fu rin i fut ti hai ta saa yuti, myan ima hun koltifai ti Yeso Kristi,

⁶ ɓa shak asui mulwat amu u te andek, fo amu andek hun fati DeeƁwe ngye, Dee i Deembai amukan Yeso Kristi.

⁷ Mat hun ɗiyai ra apil fota ngga' ima Kristi matu ta ra apil, ɓa hu kin si ha' DeeƁwe fit.

⁸ I laksu, Kristi te ii yere i som Ju ii fo i mwawei i DeeƁwe, ɓa u kof nyai hya kintiɓwi ima fa washash mbayai,

⁹ ɓa Ramam si fa DeeƁwe ngye ɓurti gu'ti ashur ames, fota ngga' ima si worong, “Ɓurti andi, i wa ha' ti asum asa fit na saa ti Ramam, i wa tong ti nakwai wa kyel i asum ama.”

¹⁰ Hum nyai, “A Ramam, jakak hun akul hu ɗufal ames.”

¹¹ Si hum nyai, “A Ramam shak, ha' hun asum i Deembai fit, a alisas shak, ha' hun asum asus fit.”

¹² Ishaya hwak lak ni, “Siir i Yese ma wa ɓwirikya, ma wa muluk fit u mas kaitat si Ramam hai, Ramam si wa kinsus ɓwi hai.”

¹³ Mwashi, ɓa DeeƁwe i kintiɓwi u hya hu ti mbai jakak, hu mute i cala, myan ima hun kinti mulut si yis hai, ɓa hu hya ti kintiɓwi yis kukwol ya ti mbaitat i Rin Masapai.

Ro i Pool wa Kyel i Ramam

¹⁴ A shunun, yin ti haisun i ma nyai, hun ti haisu hu ti maɗesi kyalak, hu ti shangi hwak shak, kol ima hu ndok hu kofti ɗiyai,

¹⁵ I worong findelal munjengani si ɗamam shini, fota ɓa i hum mbe' sui, ɓurti mal maɗesi ima DeeƁwe fan,

¹⁶ ɓa i te ii maro i Kristi Yeso wa kyel i Ramam. Yin ro i makocok ma lak ti Muro Maɗesi i DeeƁwe, ɓa Ramam si te ii mal i ngyeshi ima DeeƁwe maat, ima si sapa ya ti Rin Masapai.

¹⁷ Ɓurti andi, i pati ajin ti Yeso si ro ima i masi wa kyel i DeeƁwe.

¹⁸ I wa pati ajin ti aɗeng ima Kristi masi ti yin je, yin kofti Ramam fisel i mas ti aɗeng ima DeeƁwe ma ɓweti ti hal ti findelal ima i lakus, hu ɗamam ima i masus,

¹⁹ ti andok i ɗamam i lum ti fo hu i shok na fo, saa ti andok i Rin. Ta Yerushalima wa Ilirikum, i hya ro i but ti Muro Maɗesi i Kristi shak.

²⁰ Ngang i gwyal but Muro Maɗesi i Kristi ta kyel ima wa' si shangus ta, ɓurti kan i cu wei ti ta' tasi mahuhur i ɗeng.

²¹ Fo i mandi, ta ngga' ima si worong ta, “Som ima si lakus kwa si wa ɗingi, som ima si hali kwa si wa shangi.”

²² Ayis kin si shahun yes kyel amu ngang.

Pool Sinzam Haisus ɓa u wa Rom

²³ Mwashi i kat ti kyel i ro na ta' moti kwa. Ɓurti wilyal hu wilyal yin cwai ti ra ya ɓa i yes i ɗingu,

²⁴ i sinzam haisun ɓa i masi andi, myan ima yin wa Sipen. I kinɓwi i yes too' su myan ima yin musata ti fisel. Takfai tima i hal ɗat si ɓwi i mute akul si hun i myan ndyong, ashang hu bumun ɗak i ka' fisel.

²⁵ Mwashi i ma fisel i wa Yerushalima ɓa i kol som musapai mal ames.

²⁶ Som i koltifai ta Makidonya hu Akaya si hal ɗat si ɓwi si fa malal i bum ti som i jyel ta saa ti som musapai ta Yerushalima.

²⁷ Ɗatus masi andi, ti mwawei a wufer ta kyel ames. Ta ngga' ima Ramam si wis maɗesi i Rin ta kyel i som Ju, tehus hai ii wufer si bum som Ju ti maɗesi i ɗama i ra.

²⁸ Myan ima i mbit ro mai, i ɗingi nyai si mat malal mii, i wa yes i ɗingu myan ima yin wa Sipen.

²⁹ I shangi na i yes kyel amu, i yes ti maɗesi i Kristi kyalak.

³⁰ A shunun, i fwalsu ɓurti Deembai Yeso Kristi amukan hu matɓwet i Rin Masapai, wis hunati saa ti taksan amen hu fwalun DeeƁwe ta.

³¹ Fwal hun ɓa DeeƁwe u re' un ya ta ra i som ima a som koltifai kwa, i kyel ta ta' ti Judya, hu ɓa bum ima i wa ti Yerushalima hwak u wis mumat ta kyel i som sapai.

³² A ti andi, ti ɓweti i DeeƁwe, i wa muru kyel amu ti jakak ka lafos tikul.

³³ Ɓa DeeƁwe ma fati mute i cala u te akul hu hun shak. Aandi.