Kaada ti Pool wa kyel Som i Rom 13 - Findel i DeeƁwe Ti Alis i Ron

Fati Hai tasi Kaitat

¹ A kpang shak ɗufal si fa hai si som i kaitat, ɓurti kaitat ti tyai na kaciwa' DeeƁwe fa kwa. Shak kaitat ima si na a DeeƁwe no'.

² Ɓurti andi, maɗufal ima nggwes i masti aɗeng ima som i kaitat si lak, nggwes ti aɗeng ima DeeƁwe no' ndai. Som ima si masi andi, si dul ti a haisus ɓur hai.

³ Ɓurti som ima si mas maɗesi si myan som i kaitat fo kwa, a som ima si mas mafwashi si myanus fo. Na ha ɓweti ha mwen makaitat fo kwa, masa maɗesi ma wa palangsa.

⁴ Ɓurti yis a yere i DeeƁwe ima ma wa masa maɗesi. Na ha mas mafwashi, ha wa myanat, ɓurti awal ames ii gbya' kwa. A yere i DeeƁwe, ma ro i futut ɓa u ndash som i masti mafwashi.

⁵ Ɓurti andi, a kiga' hu fa hai wa kyel i som i kaitat. A ɓurti tital ti futut i DeeƁwe fo kyek kwa, a ɓurti ɓa hu te kaciwa' mafwashi.

⁶ Ayis kin hu talan ti cef i wufen, ɓurti som i kaitat a yarai i DeeƁwe ima si fa myan ames shak si ro i kaitat.

⁷ Tal hun ɗufal shak wufyar ames. Na ii cef i wufen, tal hun, na ii kyel woor, tal hun, na ii fati ngye, fahun ngye, na ii fati mbaitat, fahun mbaitat.

Kof hun Matɓwet Ɓurti Mwen ti Kat Ndyong

⁸ Kan ha kol wufer i ɗama i ɗeng kwa, ii ɓweti ɗiyai je. Ɓurti maɗufal ima ɓwet nusus, hya anggut ndai.

⁹ Anggut ni, “Kan ha mas arak i zuruk kwa, kan ha for ɗeng kwa, kan ha shir shir kwa, kan ha yok kwa,” hu shak anggum i anggut ima si mata, si nggi' shak si anggut andek moti hai, “Ɓweta ima hu ɗiyai hai fota haisa.”

¹⁰ Matɓwet ti kyan ima si ɗiyai hai afol kwa. Ɓurti andi, matɓwet a hya ti anggut.

¹¹ Mas hun mai, ɓurti hu shang musut i myan ima ka mana mwashi. Myan si ru ɓa hu ɓusho ta arak, ɓurti bum amukan ma anggasi mwashi, ɓin i myan ima ai ka mat mwawei.

¹² Fo' katndyong i mulang ta, mwen ti katndyong i ɓwai. Ɓurti andi, ka wak ro i maɓing ya, ka ru' ɗam i ɓwol i kweneng.

¹³ Ka mas mute maɗesi, fota mute i kweneng, kaciwa' woti ɗamam met-met hu filal, kaciwa' arak i zuruk, hu masti ɗamam i shusho, kaciwa' shaal, hu nadon.

¹⁴ Fo i mandi, zan hun mute i Deembai Yeso Kristi fota arom amu, kan hu mas ambe' ima gwel i lo' i maɗufal masi kwa.