Kaada ti Pool wa kyel Som i Rom 12 - Findel i DeeƁwe Ti Alis i Ron

Kuna Mapweti

¹ A shunun, DeeƁwe a ma gu'ti ashur fwet. Ɓurti andi, i fwalsu fahun haisu ɓa hu te ii kuna mapweti, masapai ima DeeƁwe ma ɓweti, a yis mii cwai ti afut i mwawei i rin amu wa kyel i DeeƁwe.

² Kan hu ɓwet mulwat amu u mas aɗeng ima naya moti ti masi kwa, fo i mandi, shen hun ti mute ii mumwayani ta ambe' amu. Ani ma wa kini hu mba, ɗak hu ha' aɗeng ima DeeƁwe ma ɓweti maɗesi, i ɗat si ɓwi hu ma nggya-nggyai.

³ Ti mal maɗesi ima DeeƁwe fan, i ma laksu ti andek-andek, kan hu zan haisus u ɓin ngga' ima hu mata kwa, fo i mandi, mas hun mwawei si bene ti haisu, kiga' hu amba i fati mulut ima DeeƁwe fu.

⁴ Fota ngga ima kati ɓwayai hyang na lo' amukan andek, si ti a ro musut andek kwa.

⁵ Andi hwak, kan ɗufal ka hyang ima ka ta wii i Kristi. Ka tekan ti lo' andek ta wii i Kristi, shak a sikani ka te ii ɓwayai i lo' i ɗiyai.

⁶ Ka mati malal akat-akat, ta ngga' ima si fakan mal maɗesi ta. Na mal i maɗufal a laki i mashit, u masti ro kiga' si fati mulut ames hai.

⁷ Na ii masti ro, u masi, na ii kofiti u kofti,

⁸ na ii fati ɗufal njeng na mulwat, u fas, na ii tal ti myatat i shini, u fa gilik, na ii kolti ɗufal, u fa hai si kaitati ndere, na ii gu'ti ɗufal ashur, u masi ti jakak.

Matɓwet

⁹ Matɓwet amu a kpak u te ii mwawei. Hu nggyu ti aɗeng ima mii mafwashi, hu ka' maɗesi gbwenjeng.

¹⁰ Fahun haisu si matɓwet ima hun a shunus i ɗiyai. Fahun ɗiyai ngye u ɓin ngga' ima hu fati haisu ta.

¹¹ Kan hu njwangat kwa, kukush hun, kin hun hai ti mulut andek saa ti rin amu hun masti Deembai ro.

¹² Jakak hun saa ti Kintiɓwi, ka' hun agung saa ti shum, fahun mulut si fwal ti DeeƁwe.

¹³ Kaar hun ɗamam ima huti hu ɗufal i DeeƁwe ima si ti kwa. Hu mat mwalmwat ra apil.

¹⁴ Kin hun som ima si kofsu ya maɗesi, kin hun yus maɗesi, kan hu kinus ɗor hai kwa.

¹⁵ Jakak hun akul hu som ima si jakak, kawa hun akul hu som ima si kawa.

¹⁶ Mas hun mute i cala akul ti ɗiyai. Kan hu ngye na hihai kwa, mas hun myatat hu som ima si mii fo i ɗama kwa. Kan hu zan haisu fota hu ɓin anggum i ɗufali kwa.

¹⁷ Kan hu wer ɗeng mafwashi ti mafwashi kwa. Tehun mweret hu mas aɗeng ima ma kiga' ta shishat i ɗufal shak.

¹⁸ Na yis wa mas, masa shak aɗeng ima ha wa masi, hu te cala hu ɗufal shak.

¹⁹ A myayun, kan hu wer kwa, hon hun DeeƁwe u werui ti futut ames. Ɓurti si worong nyai, “A wer amen, i wa weri,” Deembai lak.

²⁰ Fo i mandi, “Na ma ha' ti wei ti ha yis ti hwem, Faha yus cwa, na yis myaf, Faha yus ham u wo. Ti masi andi, ha suɓut sus a man i mangyesh hai.”

²¹ Kan hu hon mafwashi u ɓin njeng amu kwa, fo i mandi ɓin hun njeng i mafwashi ti masti maɗesi.