Kaada ti Pool wa kyel Som i Rom 11 - Findel i DeeƁwe Ti Alis i Ron

Anggum i Ɗufal i Isar'ila

¹ I mati lul, DeeƁwe nggwes ti ɗufal ames ndai haa? Wayou! Yin ti haisun a maɗufal i Isar'ila, wash i Ibirai, ta gung i Benjamen.

² DeeƁwe nggwes ti ɗufal ames ima ben tasi bya' kwa. Ahun hu shang aɗeng ima worong lak si Iliya hai kwa waak? Ima ni, Iliya wa ti kawa ta kyel i DeeƁwe si Isar'ila hai, ni,

³ “A Deembai, si fwar som i shit amai ya, si nggwal kikyal i nyesh ti mal amai ya. Ayin andek je i kat na, si farsun ɓa si forun ya.”

⁴ DeeƁwe nyus amiya? “I ɓwaf haisun ɗufal nggal pyoron na (7,000), ima si shu i mafwaran ta wei i Ba'al kwa.”

⁵ Andi hwak, mwashi kati ɗufal ndyong ima si kat na, ima DeeƁwe ben ɓurti mal maɗesi ames.

⁶ Na a ti mal maɗesi, unai hum mute ii ta kyel i ro kwa. Na andi, mal maɗesi hum mute ii mal maɗesi kwa.

⁷ Ami ndai ya? Isar'ila si dun aɗeng ima si fari shishat mandu' si wisi kwa, anggum ima DeeƁwe ben si wisi, shini si njeng na hihai.

⁸ Fota ngga' ima si worong, “DeeƁwe kinus rin i maɓing hai, fas shishat ima ka si ɗing ti kyel kwa, hu mwal ima ka si hal ti findel kwa, yes kwai.”

⁹ Devid hwak ni, “Ɓa got ames u te ii hum, hu munggi' ima u sanggalus, hu afung ti bukat, hu ɓur wa kyel ames.

¹⁰ Naɗin shishat ames u tehus ti maɓing ɓa si mba ɗing ti kyel wet, Manggiring ames u lwish yes myan hu myan.”

Yit tima si Sok sinin Hai

¹¹ I ti lul ii hai, Isar'ila si bukat si fur ɓa si katus ta a vit haa? Wayou! Fo i mandi, a ɓurti mafwashi ames, bum yes kyel i Ramam ɓa Isar'ila si mas nadon ti sin.

¹² Na mafwashi ames kol naya ramwayat, ɗak to ames kol Ramam ramwayat hwak, mbe' hun mute hyang i ramwayati ma wa mute atini na si humkyel ya!

¹³ I ma findelsu a hun Ramam. Yin a mamuro wa kyel i Ramam, i pati ajin ti ro amen a mai.

¹⁴ Ti masi ati i kintiɓwi nyai, ɓa som amen Isar'ila si mas nadon ti shini, ɓa si wis bum.

¹⁵ Myan ima DeeƁwe nggwetus, fisel matɓu ɓa ɗufal i naya si shwai hu DeeƁwe. Na DeeƁwe mat som Ju hee? A wisti mupwet ta mot ndai kwa waak?

¹⁶ Na ɓwai i han ima si fa fota i bya' yis ti sapa, kof ndai hani shak mati sapa. Na sisyar i yit yis ti sapa, andi hwak shak rai mati sapa.

¹⁷ Hun Ramam, hu ma fota ra i fati i ya ima si sok tasi fati ti wur. Hu zan kyel i ra ima si tyal ya tasi yiti hai. A ɓurti mai, hu wo ham tasi sisyar i yiti hai.

¹⁸ Kan hu pa ajin nyai, hu ɓin ra ima si tyal ya ani kwa. Na hu pati ajin mbe' hun, a hun hu ɓweng ti sisyari kwa, a sisyari ma ɓweng su.

¹⁹ Ha wa nyai, “Ai si tyal rai ya ɓa si sokun tasi gungi.”

²⁰ Andi hwak, si tyalus ya tasi gungi hai a ɓurti si fa mwawei kwa, ha, ha mangra si gungi hai a ɓurti fati mulut ama. Ɓurti andi, kan ha pa ajin kwa, Teha ii ma myanat.

²¹ Ɓurti na DeeƁwe hon ra mundyasi si gungi hai kwa, ma wa honsa ha kwa hwak.

²² Ɗinga maɗesi i DeeƁwe hu mute kpesheshesh ames. Te kpesheshesh si som ima si fur, kof maɗesi ames yes kyel ama, na ha cu wei ta maɗesi ames wi. Na andi kwa, si wa telsa ya hwak tasi gungi hai.

²³ Na Isra'ila si cu wei ti fati mwawei, si wa soksus tasi gungi, ɓurti DeeƁwe ndok u humtus tasi gungi hai.

²⁴ Andi hwak, hun Ramam ima si telu ya tasi yit ti fati ti ya hai, ɗak si soku tasi fati ti wur hai, ma wa mute ti mbwesh ɓa u hum sok ti yit ti fati mundyasi tasi gung asut hai hwak.

Si wa Bum ti Isar'ila Shak

²⁵ A shunun, i ɓweti hu shang aɗeng ima mata mufot wi, a ɓurti kan hu ngye na hihai. Isar'ila si njeng na hihai ti ɓwayaiyi, ɗak hya i Ramam ima si wa mulang ta hya shak.

²⁶ Andi Isar'ila shak si wa wis ti bum. Fota ngga' ima si worong, “Ma abum ma wa yes ta Zayon, ma wa zan ti mafwashi ya ta kyel i Jakop!

²⁷ A mai mii dakwa amen tikul hu sin myan ima i zan mafwashi ames ya.”

²⁸ Ɗufal i Isar'ila hyang mwashi a som i ha' ti wei ti Muro Maɗesi, a yis kin Ramam si cu mwaiyi. Shak ta andi, sin a ɗufal ima DeeƁwe ɓwetus ɓurti ben washash mbayai ames Ibirai, hu Aizik, hu Jakop.

²⁹ Ɓurti DeeƁwe dwal mal hu lai ames ya kwa.

³⁰ Ai hun Ramam hu nggyu i hal ti DeeƁwe, myan ima Isar'ila si nggwes i hali, mwashi hun hu wis gu'ti ashur ɓurti munggwya i hali ames.

³¹ Andi sin hwak si nggwes i hali, ɓa sin hwak si mat gu'ti ashur, ɓurti gu'ti ashur i DeeƁwe yes kyel amu.

³² Ɓurti DeeƁwe no' ɗufal shak tasi munggwya i hali ames, ɓa u gu'us ashur shak.

Nakwai wa kyel i DeeƁwe

³³ Awinoo! Kinggyongat i ramwayat, hu piris, hu shangi i DeeƁwe! Ɓur ames ɓin njeng ɓa maɗufal u bene, fiselal i masti ɗamam ames si ɓin njeng i shangi!

³⁴ “Awe shang ambe' i Deembai ya? Ahun, awe mii mwes i taɓak ya?”

³⁵ “Awe fa DeeƁwe ahof i ɗama ima ma ɓweti DeeƁwe u humus ti kyel ya?”

³⁶ Shak ɗamam si yes ii ta kyel i Deembai, si mas shak ɗamam a ɓursus, si wa muhumkyel ta kyel ames. Cinjangat i myan hu myan wa kyel ames! Aandi.