Kaada ti Pool wa kyel Som i Rom 10 - Findel i DeeƁwe Ti Alis i Ron

¹ A shunun, aɗeng ima mulut amen ma gweli hu fwal amen wa kyel i DeeƁwe, a ɓurti ɓa Isar'ila si wis bum.

² I shangi nyai, si mati nadon si DeeƁwe hai, ɗak nadoni mayus kaciwa' shangi.

³ Ɓurti si nggwes i shang ti mute manderei ima yes ta kyel i DeeƁwe, si kin hai masti ii haisus, si fa hai si mute manderei i DeeƁwe kwa.

⁴ Kristi a dala i anggut, ɓa shak maɗufal ima fa mwawei u wis mute manderei.

⁵ Mosis worong fisel i mute manderei ima mii ta kyel i anggut ni, “Shak maɗufal ima mas ɗamam mii, ma wa mupwet ɓursus.”

⁶ Ɗak mute manderei ima mii ta saa ti fati mulut ni, “Kan ha lak ta mulut ama nyai, ‘Awe ma wa muɗu ta fit ya?’ ” U ɗor ti Kristi ya

⁷ “ahun, ‘Awe ma wa muɗor ta hum manggyongi ya?’ ” U ɗu ti Kristi ya ta mot kwa.

⁸ Unai ma nyai amiya, “Findel i DeeƁwe ma anggasi ti ha, mata fo ama, hu mulut ama.” Ayis a findel i fati mulut ima ni buti.

⁹ Na ha lak ti fo ama nyai, “Yeso a Deembai,” ha fa mwawei ta mulut ama nyai, DeeƁwe luktus fit ta mot, ha wa wis ti bum.

¹⁰ A ti mulut si fai mwawei si wis mute manderei, a ti fo si lak si wis bum.

¹¹ Fota ngga' ima Worong ni, “Shak maɗufal ima fa mwawei wa kyel ames ma wa woti shusho kwa.”

¹² Ɓurti Ju ma akat hu Ramam kwa. Andi Deembai a Deembai i shak hu ma kinti maɗesi hyang wa kyel shak ima si laiyus.

¹³ Ɓurti, “Shak maɗufal ima lai asum i Deembai ma wa wis ti bum.”

¹⁴ Si wa masi atini si lai ima wa' si fa mwawei si yis hai ya? Si wa masi atini si fa mwawei si ima wa' si halus ya? Si wa masi atini si hali kaciwa' ɗeng lakus ya?

¹⁵ Si wa masi atini si wa si but kaciwa' ɗeng rohus ya? Fota ngga' ima si worong ta, “Sisai i som ima si yes ti Muro Maɗesi mati ɗat fwet!”

¹⁶ A shak som i Isar'ila si mat Muro Maɗesi mai kwa. Fota ngga' ima Ishaya ni, “A Deembai, awe fa mwawei nasi muro aminin ya?”

¹⁷ Ɓurti andi, fati mulut ii tasi hal ti muro, ɗak hal ti muroi ii ta findel i Kristi.

¹⁸ I mati lul, a awei si hali kwa haa? Hei si hali. “La ames at na naya shak, findelal ames ru ta nggwe' i naya.”

¹⁹ I ti lul hwak ii hai, Isar'ila si shangi kwani? Ti bya' Mosis ni, “I wa kinsu nadon si som ima si mii ɗama kwa, i wa kinsu futut ta kyel i ramam ima si mii halyang.”

²⁰ Ishaya lak kaciwa' myanat ni, DeeƁwe ni, “Som ima wa' si farun a sin si wisun. I kof haisun wa kyel i som ima wa' si lulun.”

²¹ Shak ta andi, tasi Isar'ila hai, DeeƁwe ni, “I fi ti' ti ra amen wa kyel i som ima si nggwes i hal ti findel hu ima si njeng na hihai.”