Kaada ti Pool wa kyel Som i Rom 1 - Findel i DeeƁwe Ti Alis i Ron

¹ Kaada moti ii ta kyel i Pool, yere i Yeso Kristi, mamuro ima DeeƁwe laiyus, kangus ya hwak ɓa u but Muro Maɗesi i DeeƁwe

² ima ai hwer fas kintiɓwi ii hai ta fo i som i shit ames saa ti Worong Masapai.

³ Muro Maɗesi ani, a tasi Al ames hai, ima na lo' yis a wash i Devid,

⁴ hu a tasi Rin i masapai, si koftus ti andok ɓa u te ii Al i DeeƁwe ti muluk fit ames ta mot wi, Yeso Kristi Deembai amukan.

⁵ Ta fisel ames hu ɓurti asum ames hwak, ka mat mal hu mute ii som muro, ɓa ka lai ɗufal ta saa ti Ramam shak, wa kyel i murak ti hai ima yes ta kyel i fati mulut.

⁶ Hun hwak hu mata saa ti som ima si laiyus ɓa si te ii ɗufal i Yeso Kristi.

⁷ I worong wa kyel i som Rom, shak hun ima DeeƁwe ma ɓwetsu, laiyu ɓa hu te ii ɗufal ames musapai. Mal maɗesi hu mute cala wa kyel amu ta kyel i DeeƁwe Demukan, hu Deembai Yeso Kristi.

Pool ma Ɓweti wa Ɗing ti Ɗufal i Rom

⁸ Ti bya' i ma palang ti DeeƁwe amen saa ti Yeso Kristi ɓursu shak, ɓurti sima but ti findel si hai i fati mulut amu na naya shak.

⁹ DeeƁwe a shit amen si ngga' ima i mbya'ansus ta ngang, yin koltifai asussi ti mulut andek, yin but ti Muro Maɗesi i Al ames.

¹⁰ I fwal ti DeeƁwe ngang, ɓa u ɓun fisel ya i yes kyel amu, ta saa ti ɓweti ames.

¹¹ I gwel ɗingsu gɓwum, ɓa i fu mal i Rin, ɓa u fu njeng.

¹² Aɗeng ima i laki nanati a yis nai, hun hu yin ka cu mwai saa ti fati mulut i ɗiyai.

¹³ A shunun, i ɓweti hu te ta maɓing wii kwa, shak myan ima i kin ɓa i yes kyel amu, (unai ɗama u ryangun ya, yes mwashi) ashang ɓa i wis karat na saa yuti, fota ngga' ima i wisi ta saa ti anggum i Ramami wi.

¹⁴ I mati wufer i som Girik hu Ramam, hu som i shingat hu halyang shak.

¹⁵ Ayis nai kin i cwai ti ra ya ɓa i laku Muro Maɗesi hwak, hun ima hu mata Rom.

¹⁶ I ti shusho i Muro Maɗesi kwa, ɓurti a andok i DeeƁwe ɓurti bum i shak maɗufal ima fa mwawei, ti bya' wa kyel i Ju, ɗak Ramam.

¹⁷ Ɓurti a saa ti Muro Maɗesi, mute manderei ta kyel i DeeƁwe pwak ya, a manderei ima mii ta fati mulut tasi bya' wa dala, fota ngga' ima si worong ta nyai, “Maɗufal manderei ma wa mupwet ii ta fati mulut.”

Futut i DeeƁwe si Hai i Ɗufal

¹⁸ Futut i DeeƁwe pwak ya ta fit si hai shak ɗufal ima wa' si mwen DeeƁwe fo, hu shi' ti mafwashi i ɗufal ima si mbo' ti mwawei ya ta fisel ti mafwashi ames.

¹⁹ Si shang shak aɗeng ima ɗat ɓa si shangi si DeeƁwe hai, ɓurti DeeƁwe kofus ti rasman.

²⁰ Mute i DeeƁwe hu andok ames i myan hu myan ka ɗyangus kwa. Shak ta andi, matkof rasman tasi myan ima si lan naya, ka shangus tasi aɗeng ima masi. Ayis nai ɗufal si kat kaciwa' fo i findel.

²¹ Shak ta ngga' ima si shang DeeƁwe ta, si nggwes i fati DeeƁwe ngye, ahun si palangus, ambe' ames hatat tehus ii gbya', mulwat i halngyat ames tehus kpwikirik.

²² Shak ta ngga' ima si ɗing ti haisus a som i shingat, taa a halyang.

²³ Si shen cinjangat i DeeƁwe ima mwat kwa, ti harkyel ima si masi ɓa si te fota maɗufal ma mot, hu avyash, hu loha i ya, hu ɗamam ima si ɗa'at ti ɗarai.

²⁴ Ɓurti andi, DeeƁwe honus catus ii ra tasi gwel i lo' ima mulwat ames ma ɓweti. Ti masi andi, si mas zuruk hu ɗamam i shusho ti lo'a' i ɗiyai ames.

²⁵ Si shen mwawei ti DeeƁwe ya ti fyarat, hu cwai ti afut sin koltifai ti ɗamam ima DeeƁwe lan, ii fo i DeeƁwe ima lanus. Ayis ka wa cwaisus afut myan hu myan. Aandi.

²⁶ Ɓurti andi, DeeƁwe honus catus ii ra tasi ɗamam i shusho wi, musut ti i yok. Arof ames si shen mute tima DeeƁwe lu'us ti ti mumwai yi nin.

²⁷ A andi hwak, arya si hon mute hu arof si langus mute hu ɗiyai ames. Arya si mwat arya hai ti gwel mametti ames, ta saa yusti si mat andash kiga' si mafwashi ima si masi.

²⁸ A andi hwak, ngga' ima si nggwes i masti ambe' maɗesi ɓa si ka' shang ti DeeƁwe ra apil, unai DeeƁwe honus catus ii ra tasi ambe' mafwashi i gbya', ɓa si cu wei ti masti aɗeng ima ɗat masi kwa.

²⁹ Si hya ti shak musut i mafwashi, hu gbaf, hu yok hu mute i gbya'. Si hya ti nadon, hu for ti ɗufal, hu shaal, hu dang, hu ka'ti ɗiyai ta mulut. Sinyi a som i mwana,

³⁰ hu rafat ti asum i ɗiyai ya, zan ti wei si DeeƁwe, hu ngye na hihai, hu zan ti hihai fit, hu nggwak ti ajin, si ɓu fiselal i masti gbaf ya, si hal hu dee kwa,

³¹ si mati ambe' kwa, si mati fati mulut kwa, si mati mulut kwa fweng, si mati wuwish.

³² Si shangi nyai, DeeƁwe ni maɗufal ima mas musut i ɗamam mii kol ɓa si for ya, si cu wei ti masti a mii ɗamami je kwa, si fa shini njeng i fwaran ɓa si masi hwak.