Matkof i Yeso Ta Kyel i Jwon 9 - Findel i DeeƁwe Ti Alis i Ron

Ngyef Muhara

¹ Malu' maharai fu' ngyef asus. Unai i ɗing ɓyar nin, tima ti ndak ta fit yes naya, si fa ɓyari mbaitat si hum manggyongi hai ma kaciwa' anggwe'.

² Myan ima ɓyari ti ɓu humi ya, kikis rangya ta fota kikis i kyel i lan mbai. Kikis ima lang ya ta hum manggyongi kin ɓwe hu ri' si masus maɓing.

³ Tuwal si rangya ta wii i kikisi si ɗor na naya, si fas andok fota mategereng i naya.

⁴ Si nyus ka si kan falan, hu yitat hu ɗamam ima si sa na fisha kwa, si honus kaciwa' masus ɗama. Si fa a ɗufal ima si yus kaciwa' bong i DeeƁwe ta ɓosas ames shum je.

⁵ Si fas andok i for ti ɗufali kwa, si fas ii ma ɓa si kofus ya ti kanan kyek i turyan hara. Hanat i kanani ma fota kanan i mategereng myan ima ti kan maɗufal.

⁶ Saa ti turyan hara mii, ɗufali si wa far ti mot, si wisi kwa, si wa ɓweti ɓa mot ti yes, motti ti nggwet i yes.

⁷ Tuwali si te fota mbarai ima si sinzam haisus ɓurti wa ɓwol. Sin ti ɗama nin ta hihai ames fota rurwan i ugbwirik mujuwi, shishat ames te fota i maɗufal.

⁸ Syahai ames ma fota syahai i arof, anggurai ames fota anggurai i kukum.

⁹ Si vohus ajyan ya ti fata', fota fata' i shitam, kawa i kurya ames fota i mbarai hu mbarai i huhwi ima si tital vwelelel wa ɓwol.

¹⁰ Si ti fyalal sin ti kanan ti kyel fota mategereng, tasi fyalal ames hai, si ti andok i kofti ɗufal ya i turyan hara.

¹¹ Makai ames a malu' ima si fas mbaitat si hum manggyongi ma kaciwa' anggwe'. Asum ames ti alis i Ju a “Abadon,” ti alis i Girik a “Apolyon” nyai, “Ma rafati ya.”

¹² Mwe i bya' lang ta ndai, mwe apilal si ɗiri yes.

¹³ Malu' mataani fu' ngyef asus. I hal la nin ti lang ya ta shwamam i kyel i kuna i ugbwirik mujuwi ima mata wei i DeeƁwe.

¹⁴ Lai ti lak malu' mataan ima mati ngyefi, ti ni, “Cata som i lu' ɓaras ani ii ra ima si ta mano' wi ta ɗara mbai i Yufiretis!”

¹⁵ Si cat som lu' ɓarasi ii ra ima si sinzamus ɓurti mai myani hu mweni, hu ture, hu wil. Si catus ii ra ɓa si fwar nggwa andek ta saa ti ataat i ɗufal ya.

¹⁶ I hal mute hyang i som ɓwol ti mbarai, si kol lyon ndik apil (200,000,000).

¹⁷ I ɗingi ti shit i rin, mbarai hu som langsus si ru' arom i fata'a' i shitami sin ii mujuwani fota man, fota ham i ri' fota safaya musut ti afung nin, hu fota ham i ho' maruti. Hihai i mbaraiyi si te fota hihai i kukum, kikis hu man mapeli maɗui yis murangya ta fwai ames.

¹⁸ Ti worowa mataati si fwar andek ta saa ti ataat i ɗufal ya na naya ti man, hu kikis, hu man maɗui ima rangya ta fwai ames.

¹⁹ Andok i mbaraiyi mii ta fwai hu fyalal ames. Fyalali sima fota ɗamafwashi, sin ti hihai ima si ti nggwaran ti ɗufal.

²⁰ Anggum i ɗufal ima worowa mafwashani mai fwarus ya kwa, si nggwes i hatat ɓa si fwal shwaiya tasi ɗamam ima si masi ti ra ames. Si nggwes i honti cwai ti afut wa kyel rinan mufwashani, hu harkyel i ugbwirik mujuwi, hu i mupeli, hu i shitam, hu i afyai, hu i kunggwal ima si ti shishat kwa, si hali kwa, si ɗa'at kwa.

²¹ Si nggwes i fwal ti shwaiya tasi ro i fwaran ti ɗufal ima si masi, hu roha i sukuyat, hu i arak i zuruk, hu i shir ames.