Matkof i Yeso Ta Kyel i Jwon 8 - Findel i DeeƁwe Ti Alis i Ron

Bong Mapyoron hu Ɓeleng i Ugbwirik Mujuwi

¹ Myan ima Al Marai ɓu bong mapyoron ya, si te cakat ta fit i nggas ti ɓwai i shitam andek.

² I ɗing som lu' i DeeƁwe pyoron ima sima mangrai ta wei i DeeƁwe, si fas ngyefaf pyoron.

³ Malu' nin ima mati ɓeleng i ugbwirik mujuwi yes te mangra ta kyel i kuna. Si fas yitat mafyongi hyang akul hu fwal i shak som sapa, ta kyel i kuna ima si masi ti ugbwirik mujuwi ta wei i kunggul i kaitati.

⁴ Kikis i yitat mafyongi akul hu fwal i som sapa, ima malu' mati ta ra ɗuya wa mabel i DeeƁwe.

⁵ Unai malu' i ha' ɓeleng i ugbwirik mujuwi yi, hyai ti man ta kyel i kuna, ɗak hwiti na naya, unai kyel ti lang taɗassan i bara, yit rumung, yit nzilwyatan, fisha yis muro.

Ngyefaf

⁶ Unai som lu' pyoron ima si ti ngyefaf pyoroni si sinzam haisus ɓa si fu' ngyefafi.

⁷ Malu' i bya' fu' asus ngyefi, unai siir hu man ima si yir ti wash, si shu yes na naya. Mani ti cu nggwa andek ta saa ti ataat i naya ya, ti cu nggwa andek ta saa ti ataat i yitat ya, shala' maɗyayi hwak cu man shak.

⁸ Malu' mapil fu' asus ngyefi, ɗama nin fota mbai anggash, shak yis cwai ti man, si hwiti ta yiir wi. Nggwa andek ta saa ti ataat i yiiri hatus wash.

⁹ Nggwa andek ta saa ti ɗamam ima si ta yiiri si mwat. Nggwa andek ta saa ti mbayai i kwang i ham si fot ndarak.

¹⁰ Malu' mataati fu' asus ngyefi, mbai ɓyar nin, yis mumat fota man i mukof, ndak ta fit yes fur ta si nggwa andek ta saa ti ataat i ɗaran hu kwarai i ham.

¹¹ Asum i ɓyari a “Maɓol.” Nggwa andek ta saa ti ataat i hami ɓolus, ɗufal hyang si mwat ɓurti ɓolat i hami.

¹² Malu' ma ɓarasi fu' asus ngyefi, pa nggwa andek ta saa ti ataat i ɓwe, hu nggwa andek ta saa ti ataat i ture, hu nggwa andek ta saa ti ataat i ɓyar hwak. Kin kweneng i nggwa andek ta saa ti ataat i ɗamam mii hatus maɓing. Nggwa andek ta saa ti ataat i mufi tehus kaciwa' kweneng, angga'i nai hwak nggwa andek ta saa ti ataat i fo' tehus kaciwa' kweneng.

¹³ Myan ima yin ɗingi, i hal wool nin tima ti luk ta fit si se hai, ti la mbai yit tutolat nyai, “Mwe asui! Mwe asui! Mwe asui hun ɗufal i naya, ɓurti anggum i som lu' i DeeƁwe ataat si wa fu' ti ngyefaf!”