Matkof i Yeso Ta Kyel i Jwon 7 - Findel i DeeƁwe Ti Alis i Ron

144,000 Si Kinus Bong Hai

¹ Takfai ti mai, i ɗing som lu' i DeeƁwe ɓaras sin mangrai ta nggwa ɓaras i naya, ɓa si sha se ta nggwa ɓaras i naya ima ma wa viling ta fisha, hu yiir, hu si yit nin hai.

² Unai i ɗing malu' i DeeƁwe nin yis muɗuya ta ɓwai i muɗu i ɓwe, yis ti bong i DeeƁwe mapweti. Lai som lu' i DeeƁwe mu ɓarasi ima DeeƁwe fas mbaitat ɓa si rafat fisha ya hu yiir.

³ Malu' i DeeƁwe ni, “Ka ha rafat fishai ya, hu yiir, hu yitat kwa, myan ima ni mbit kinti bong ta ɓosas i yarai i DeeƁwe tawe.”

⁴ Unai i hal mute hyang i som ima si kinus bongang hai, si kol ɗufal nggal ndik hure ta ndik hure ɓarasi tau ɓarasi (144,000) ta shak hwengang i Isar'ila.

⁵ Si kin hwengang i Isar'ila bong fota ati, ta kwap i Juda, nggal hure mulang apili (12,000), ta kwap i Ruben, nggal hure mulang apili (12,000), ta kwap i Gat, nggal hure mulang apili (12,000).

⁶ Ta kwap i Asha, nggal hure mulang apili (12,000), ta kwap i Naftali, nggal hure mulang apili (12,000), ta kwap i Manasi, nggal hure mulang apili (12,000).

⁷ Ta kwap i Simyon, nggal hure mulang apili (12,000), ta kwap i Levi nggal hure mulang apili (12,000), ta kwap i Isaka nggal hure mulang apili (12,000),

⁸ ta kwap i Zabulun, nggal hure mulang apili (12,000), ta kwap i Josep, nggal hure mulang apili (12,000), ta kwap i Benjamen, nggal hure mulang apili (12,000).

Male' i Ɗufal ta Rom Mapelani Wi

⁹ Takfai ti mai, i ɗing male' i ɗufal ima ɗeng ma wa mbe'i kwa, shak ramam, hu gung, hu ɗufal, hu alisasi, sin mangrai ta wei i kunggul i kaitat, hu ta wei i Al Marai. Si ru' arom mapelani sin ti ra i yitat i mbar ta raha ames.

¹⁰ Ti la mbai sin kawayai nyai, “Bum yes ii ta kyel i DeeƁwe amukan ima ma amun ta si kunggul i kaitat hai, hu ta kyel i Al Marai.”

¹¹ Shak som lu' i DeeƁwe sin mangrai si nggaar kunggul ti kaitati, hu tabwa'a', hu lu'a' mupweti ɓaras ani ya. Si fwar si ɗarai ames hai ta wei i kunggul i kaitati si cu DeeƁwe afut,

¹² Sin nyai, “Aandi! Nakwai hu cinjangat, piris hu palang hu ngye, mbaitat hu njeng wa kyel i DeeƁwe amukan myan hu myan. Aandi!”

¹³ Unai andek ta saa ti tabwa'a' lulun ni, “Ima si ru' arom mapelani mii, a hu we ya? Si yes ii ta leya?”

¹⁴ I nyus, “A dee, a ha ha shangi.” Yis nyun, “Mii a ɗufal ima si rangya ta saa ti shum mafwashi wi. Si sa arom ames ya ti wash i Al Marai, te ii mapelani.

¹⁵ A aɗeng ima kin, “si mata wei i kunggul i kaitat i DeeƁwe si masus ro fo' ta reni ta wii i wur ames, hu yis ima ma amun si kunggul i kaitat hai, ma wa ɓwai ti manjing ames si sin hai.

¹⁶ Si wa muhum hal ti hwem kwa fweng, si wa myaf kwa fweng. Ɓwe ti wa muhum ka'sus kwa, si wa muhum hal ti a o i ɓwe kwa fweng,

¹⁷ a ɓurti Al Marai ima mata saa ti kunggul i kaitati ma wa mute ii Maɗingsus, u kolus ta kyel i ham ma ɓwirik ma fati mupwet. DeeƁwe ma wa fyalsus filya ya shak ta shishat.”