Matkof i Yeso Ta Kyel i Jwon 6 - Findel i DeeƁwe Ti Alis i Ron

Bongang

¹ I ɗing Al Marai ɓu bong i bya' ya ta saa ti bongang pyoroni. Unai i hal andek ta saa ti ɗamam mupwetani ani taanja ti la mbai fota bara ni, “Ya!”

² I ɗing kyel ta wei yunti, i ɗing mbiri mupeli nin! Maɓussi ka' datum, si fas rurwan i kaitat, ɓus mbirii lang ti ya ɓa cu ɓwol, yis muni gbuk ɓa u cu ɓwoli.

³ Myan ima Al Maraiyi ɓu bong mapili ya, i hal lu' mapweti mapili ti ni, “Ya!”

⁴ Unai mbiri nin ti pwak ya, ii mujuwi jwe' fota man. Maɓussi yi, si fas andok i ha' ti mute cala ya na naya, ɓa u kin ɗufal si fwar ɗiyai. Si fas mbai awal hwak.

⁵ Myan ima Al Maraiyi ɓu bong mataat ya, i hal lu'a' mupweti mutaat ti ni, “Ya!” I ɗing mbiri mukyawi nin ta wei yunti! Maɓussi yi, yis ti ɗam i mamba ta ra yusti.

⁶ Unai i hal ɗama nin fota la ti findel saa ti ɗamam mupwetani ɓaras ani ti ni, “Ɓeleng i mba ti i alkama wis kiga' si cef i ro i mufi, ɓeleng ataat i yanggon wis kiga' si cef i ro i mufi, ka hu rafat mbar hu ham i manggɓu' ya kwa.”

⁷ Myan ima Al Maraiyi ɓu bong ma ɓaras ya, unai i hal la ti lu' mapweti ma ɓarasi ni, “Ya!”

⁸ I ɗing mbiri nin tima ti fota mayel! Maɓussi yi asum ames a Mot, Fiyai hwak yis koltifai asussi ta takfai. Si fas andok si nggwa ma ɓarasi naya hai, ɓa si for ti awal, hu hwem, hu mwatanan, hu loha i ya i naya hwak.

⁹ Myan ima Al Marai ɓu bong maharai ya, i ɗing mupwet i ɗufal ima si lyafus ɓurti findel i DeeƁwe hu mute ti mwawei tima si ka'ut kpwereng ta fisha i kyel i kuna.

¹⁰ Si taanja ti la mbai si ni, “Anggi myani ya? A Deembai Mambaitat, masapa hu ma mwawei. A tami ha wa tot ti ɓur si ɗufal i naya, ha wer nin wash ima si shunin ni ya ya?”

¹¹ Unai si fas faginan mupelani shak asussi, si lakus ɓa si yash vaat, mute hyang i myayus i ro hu shunus ima si wa fwaransus ya, fota ngga' ima si masus sini ta si hya.

¹² I ɗing ngga' ima ma wa ɓwai ti bong mataan ya. Si mas muro i fisha manjengi nin. Ɓwe ti hatatut ii mukyawi fota godo ima si masi ti sya i shiken, ture shak hatatus ii majuwi jwe' fota wash,

¹³ ɓyarai si ndaak ta fit yes fisha, fota ngga' ima sai manjengi fu' fe i yit i makambong ima si kaya si waya.

¹⁴ Fit manggi'us fota nggi' ti lapan, mbayai anggashash hu rusas si her ya ta kikyal ames.

¹⁵ Unai kaya i naya, hu som kaitat, hu mbayai i som ɓwol, hu som ramwayat, hu som mbaitat, hu shak yarai, hu shak ɗufal si fwat ta tonan hu wii afyai i anggash.

¹⁶ Si lai anggashash hu afyai nyai, “Fwar hun nin hai ɓa ni fot na shishat i yis ima mamute si kunggul ti kaitat hai, hu ta futut i Al Maraiyi,

¹⁷ ɓurti mwen ndyii ti futut ames ti yes, awe mati njeng u te mangra ya?”