Matkof i Yeso Ta Kyel i Jwon 5 - Findel i DeeƁwe Ti Alis i Ron

Kaada hu Al Marai

¹ Unai i ɗing kaada tima si nggi' ya si mas worong ta takfaiyi, si lyas ya ti bong kikyal pyoron, ta ra i ucwa i yis ima mata si kunggul hai.

² Unai i ɗing mbai malu' nin yis taanja ti la mbai nyai, “Awe ndok ɓa u rya' bongang mii ya u ɓu kaadai ya ya?”

³ Si wis ɗeng ta fit hu na naya hu wii fisha ima ndok ɓa u ɓu kaadai u ɗing kyel ta wii kwa.

⁴ I kawa shishat si cujwu ɓurti si wis ɗeng ima ndok u ɓu kaadai u ɗing kyel ta wii kwa.

⁵ Unai andek ta saa ti tabwa'a' ani nyun, “Ka ha kawa kwa! Ɗingai! Kukum i gung i Juda, Sisyar i Devid, cu uges. Mati andok i ɓwai ti kaadai ta bongang pyoroni hwak.”

⁶ Unai i ɗing Al Marai nin, te fota ai si forus, yis mangra ta saa ti kyel i kungguli, lu'a' mupweti shini ɓaras hu tabwa'a' ani si nggarus ya. Mati shwam pyoron hu shishat pyoron ima a rinan pyoron i DeeƁwe ima rohus na naya shak.

⁷ Unai yes mat kaada ima si nggi' ya ta ra i ucwa i yis ima ma amun tasi kunggul i kaitati hai.

⁸ Myan ima mat, ɗamam mupwetani ɓaras hu tabwa'a' hure apil tau ɓarasi ani, si shu i mafwaran ta mabel i Al Maraiyi. Shak asussi sin ti ɓengang, sin ti lungai i ugbwirik mujuwi si hya yitat i ngyeshi mafyongi ta, ima a fwal i som sapa.

⁹ Si tong nakwai mumwai nyai, Ha ndok ha mat kaada ima si nggi' ya ha mbwak bongangi ya, ɓurti ai si fora ya, ti wash ama ha juwil DeeƁwe ɗufal ta gungai wi shak, hu alisas, hu ɗufal, hu ramam.

¹⁰ Ha hatatus si te ii kaitat hu kocokak i masti DeeƁwe ro, si wa masti kaitat na naya.

¹¹ Unai i ɗingi i hal laha i som lu' shini hyang, ima si ɓin njeng i mbe'i. Ɗamam mupwetani, hu tabwa'a' ani si nggar kunggul i kaitati ya.

¹² Si tong nakwai ti la mbai nyai, “Al Marai ima si for ya ani, ndok ɓa u mat andok hu ramwayat, hu piris hu njeng, hu ngye, hu cinjangat, hu palang!”

¹³ I hal shak ɗamam i kyel fit, hu i naya, hu i wii fisha, hu i wii yiir, hu ima si mata wii yusti shak, sin nakwai nyai, “Yis ima ma amun ta si kunggul i kaitat hai, hu yis Al Marai ɓa palang, hu ngye, hu cinjangat, hu andok, u te ii ames myan hu myan!”

¹⁴ Ɗamam ɓaras ani si ni, “Aandi,” tabwa'a' ani si shu i mafwaran si cus afut.