Matkof i Yeso Ta Kyel i Jwon 4 - Findel i DeeƁwe Ti Alis i Ron

Kunggul i Kaitat ta Fit

¹ Takfai ti mai, i ɗing fo i mahom nin mangra ta fit awuri. La tima i tong hali ti kawa fota ngyef ti nyun, “Ya na fit nati, i wa kofsa ti aɗeng ima a kpang ma wa mufur takfai ti mai.”

² Fo abet yin ta Rin wi, i ɗing kunggul i kaitat nin ta wei yunti ɗeng yis amun i hai.

³ Yis ima te amun ni, ma fota ugbwirik ima si lai ii jaspa hu kanelyan. Munggargaɗing nin fota ugbwirik ma asum emeral, ti nggar kunggul ti kaitati ya.

⁴ Kunggwal i kaitati hure apil tau ɓaras si nggarus ya, tabwa'a' hure apil tau ɓarasi si te amunan tasi kunggwali hai. Si ru' arom mapelani hu rurwan i ugbwirik mujuwi ta hihai ames.

⁵ Tasi kungguli kyel yit ka'ti nzilwyatan, yit ndurum yit taɗassan. Ta wei i kungguli, pitilaha pyoron sin ɗamat. Mii a rin pyoron i DeeƁwe.

⁶ Ta wei i kungguli hwak, ɗama nin fota yiir i gilas, nzyu ya fota kaper tima ha wa ɗing ti kyel ya ta. Ta saa, si nggar kunggul i kaitat ya, lu'a' mupweti shini ɓaras, shishat si vohus ya wei ta takfaiyi.

⁷ I bya'i ma fota kukum, hu mapili ma fota akot, hu mataati mati shishat fota i maɗufal, ma ɓarasi ma fota wool.

⁸ Shak lu'a' mupweti ɓaras mii, si ti kurya taan-taan, shishat vohus ya ta kurya ames shak. Fo' ta reni si kaat ya tasi nyai, “Sapa, sapa, sapa a Deembai DeeƁwe Mambaitat, ima mii tasi a ai, hu i mwashi, hu i myan i yes kwa.”

⁹ Shak myan ima lu'a' mupwetani mii si ha' asum i DeeƁwe fit ti ador i fasus ngye ta palangi wa kyel ima ma amun si kunggul i kaitat hai, ima mati mupwet myan hu myan,

¹⁰ tabwa'a' hure apil tau ɓarasi si shu i mafwaran ta mabel ames yis ima ma amun si kunggul i kaitati hai, si cus afut. Yis ima mati mupwet i myan hu myan. Si jak rurwan ya ta hihai ames ta wei i kunggul i kaitati, sin nyai,

¹¹ “Deembai DeeƁwe aminin, ha ndok, ha mati cinjangat, ta mbaitati, ta kaitati, a ha ha lan ɗamam shak, a ti ɓweti ama si lanus, sima mute i kinsa ɗat si ɓwi.”