Matkof i Yeso Ta Kyel i Jwon 3 - Findel i DeeƁwe Ti Alis i Ron

Woronga Wa Kyel i Malu' i Suɓut i Som Koltifai ta Sardis

¹ “Woronga wa kyel i malu' i suɓut i som koltifai ta Sardis, Muro mai ii ta kyel i yis ima mati Rinan pyoron i DeeƁwe hu ima mati ɓyar pyoron. I shang aɗeng ima ha masi, si ɗingsa fota ha mati mupwet, mwawei ndai ha ya ii ma moti.

² Ɓusho ha! Fwanga al i aɗeng ima kat na mayus ta fisel i mot, ɓurti i wis ro ama hya ta mabel i DeeƁwe amen kwa.

³ Mbe'a kofiti ima ai ha mat, hu ima ha hali. I ma nyai hala findeli, ha hatat ta mafwashi ama. Na ha ɓusho kwa, i wa yes fota asher, ha wa shang ti myan ima i yes i wa kyel ama kwa.

⁴ Shak ta andi, ha mati ɗufal ndyong na Sardis ima si kin haisus ta zuruk wi kwa. Si wa ɗa'at akul hu yin, si ru' arom mapeli, ɓurti si ndok.

⁵ Shak maɗufal ima cu uges fota sin, si wa ru'sus arom mapeli. I wa fot ti asumam ames ya ta kaada i mupwet kwa. I wa ɓwengsus sai ta kyel i Deen hu som lu' ames.

⁶ Mamwal i hali, u hal aɗeng ima Rin ma lak ti suɓut i som koltifai.

Worong Wa Kyel i Suɓut i Som Koltifai ta Filadelfya

⁷ “Woronga wa kyel i malu' i suɓut i som koltifai ta Filadelfya, Muro mai ii ta kyel i yis ima mati sapa hu mwawei, ima mati mbaitat si kaitat i Devid hai. Na ɓu fo i mahom ya ɗeng ndok u vo ya kwa, na vo ya ɗeng ndok u ɓui ya kwa.

⁸ I shang shak aɗeng ima ha masi. Ɗingai, i ɓu ha fo i kwap ya ima ɗeng ndok u vo ya kwa. I shangi ha mati al njeng, shak ta andi ha mas ro ti findel amen ha ɓwingil asum amen kwa.

⁹ I wa kinti ɗufal ima si mii mare i Shatan, ima si ni sin a som Ju, mwawei ndai a fyarat, i wa kinsus si yes si shu i mafwaran ta mabel ama ɓa si shangi nyai i ɓweta.

¹⁰ Tun tya ha ka' anggut amen gbwenjeng ti agung, yin hwak i wa fwangsa ya ta amba ima mayu wa yes hai na naya shak.

¹¹ I ma yes ndai. Ka'a aɗeng ima ha mati gbwenjeng, ka ɗeng zana rurwan ama ya kwa.

¹² Maɗufal ima cu uges, i wa kinsus u te ii teres i wur i DeeƁwe amen. Ma wa muhum honti kyeli kwa fweng. I wa worong ti asum i DeeƁwe amen hu i ashwa i DeeƁwe amen ta hai yusti, a Yerushalima mumwai tima ti yes ta kyel i DeeƁwe amen. I wa worong ti asum mamwai amen ta hai yusti.

¹³ Mamwal i hali u hal aɗeng ima Rin ma lak ti suɓut i som koltifai.

Worong Wa Kyel i Suɓut i Som Koltifai ta Lawudikya

¹⁴ “Woronga wa kyel i malu' i suɓut i som koltifai ta Lawudikya, Muro mai a findel ta kyel i Aandi, shit amen ma mwawei, makaitat si lan i DeeƁwe.

¹⁵ I shang aɗeng ima ha masi. Ha mii maɗyayi kwa, ha mii ma oi kwa. Mbwesh naɗin ha mii maɗyayi ahun ha mii ma oi yo!

¹⁶ Ɓurti andi, ha ya na saa ɓumɓum, ha mii ma oi kwa, ha mii maɗyayi kwa, i wa tufsa ya na fo amen.

¹⁷ Ha ni, ‘I mati ramwayat, i suɓut sufat, i ma ɓweti ɗama kwa.’ Ha shangi kwa, ha ya ii majyel, mashum, maduni, manzyau, hu ha ya ambwiriti.

¹⁸ I fasa fo juwila ugbwirik mujuwi na kyel amen tima si sapa ya ti man, ɓurti ɓa ha wis ramwayat. Juwila arom mapeli ɓa ha gu' haisa ashur i mute ambwiriti. Juwila manda i shishat na kyel amen, ha shu ta shishat ɓurti ɓa ha ɗing ti kyel ndere.

¹⁹ Som ima i ɓwetus i taɓakus, i lakus ɓin. Ɓurti andi nya gbuk ha hatat ta mafwashi ama wi.

²⁰ Yin mai mangra na fo i kwap i ma kunggwaki. Na ɗeng hal la asun ɓu fo i kwapi ya, i wa mulang ta, i cu akul hu yis, yis akul hu yin.

²¹ Shak maɗufal ima cu uges, i wa kinsus u te amun akul hu yin si kunggul i kaitat amen hai, fota ngga' ima i cu uges i te akul hu Deen tasi kunggul i kaitat ames hai.

²² Mamwal i hali, u hal aɗeng ima Rin ma lak ti suɓut i som koltifai.”