Matkof i Yeso Ta Kyel i Jwon 22 - Findel i DeeƁwe Ti Alis i Ron

Ɗara i Mupwet

¹ Malu' i kofun ɗara ma ham i mupwet, mapeli syak fota matalal, yis kukwol ta kyel i kaitat i DeeƁwe hu i Al Marai,

² yis muɗor wa ta saa ti mbai fisel i ashwai. Shak ɓwayai i ɗarai, yit ima ma fati Mupwet mata. Ma alan sa hure mulang apil saa ti wil, ma alan sa andek ta ture. Mwal i yiti ma fati shak ramam cala.

³ Si wa muhum wis ti ɗama i ale' kwa fweng. Kunggul i kaitat i DeeƁwe hu i Al Marai ma wa mute ta wii ashwai. Yarai ames si wa masus ro.

⁴ Si wa ɗing ti shishat ames, asum ames ma wa mute ta ɓosas ames.

⁵ Fo' ma wa mute ta kwa fweng. Si wa ɓweti man i pitila, hu i kweneng i ɓwe kwa, ɓurti a Deembai DeeƁwe ma wa mute ii kweneng ames. Si wa masti kaitat i myan hu myan.

⁶ Malu'i nyun, “Findelal mii a kyas i mwawei hu mwawei. Deembai, DeeƁwe i rin i som shit, ro malu' ames ɓa u kof yarai ɗamam ima a kpang si wa mufur.”

Yeso Mayes

⁷ “Ɗingai, i ma yes ndai! Disyo' masi maɗufal ima hya findelal i som shit i kaada moti.”

⁸ Yin Jwon, i hali i ɗing ɗamam mii. Myan ima i mbit hali hu ɗingi, i fur ta mabel i malu' ima kofun ti ɗamam mii ɓa i cus afut.

⁹ Yis nyun, “Ka ha masi andi kwa! Yin a mya yere i ro hu shuna som shit hu ima si hal findelal i kaada moti. Cwa DeeƁwe afut je!”

¹⁰ Unai nyun, “Ka ha vo findelal i mashit mai ya ti bong kwa, ɓurti myan si kat ndyong ɓa ɗamam mii si fur.

¹¹ Shak ma masti mafwashi u cu wei ti masti mafwashi, ma masti ɗamam i zuruk u cu wei ti masti ɗamam i zuruk, ma masti mwawei u cu wei ti masti mwawei, ma mute ti sapa u cu wei ti mute ti sapa.”

¹² “Ɗingai, i mai yes ndai! Talal amen ma akul hu yin, i wa fati shak maɗufal kiga' si aɗeng ima masi.

¹³ “Ayin a Alfa hu Omega, i mii Bya' hu i Dala, Furi hu Anggwe'.

¹⁴ “Disyo' si som ima si sa arom ames ya, ɓa si wis andok i cwai ta yit i mupwet, si lang ta ashwai ta fo i kwap.

¹⁵ Ta saikyel a kyara, hu som sukuyat, hu som arak i zuruk, hu ima si for ti ɗufal, hu som harkyel, hu shak som ima si ɓweti lak ti fyaratat ta ro ti fyaratati.

¹⁶ “Yin, Yeso, i ro malu' amen yes kyel amu, ɓa u fu findelal mii, ɓurti suɓut i som koltifai. Ayin a Sisyar hu Wash i Devid, hu Ɓyar ti Fo i Mwen mukweneng.”

¹⁷ Rin hu yamwan ti kunggo si ni, “Ya!” Shak maɗufal ima hal mai yis hwak ni, “Ya!” Shak maɗufal ima myaf, ɓa u yes, hu shak maɗufal ima maɓweti, hon hun u mat mal i ham i mupwet.

Findel i Dala

¹⁸ Yin Jwon, i dul ti mwal i shak maɗufal ima ma hal ti findelal i kaada i mashit moti nyai, na ɗeng dya' ii hai, DeeƁwe ma wa dya'sus worowa ima si worong na kaada moti.

¹⁹ Na ɗeng dya' ya nasi findelal i kaada i mashit mai, DeeƁwe ma wa zan ti kop ames i fe yitat i mupwet ya hu i ashwa musapai, ta ngga' ima si mba ta, na wii i kaada moti.

²⁰ Yis ima a shit i ɗamam mii ni, “Hei, i ma yes ndai!” Aandi. Ya, Deembai Yeso!

²¹ Mal Maɗesi i Deembai Yeso u te akul si hun shak. Aandi!