Matkof i Yeso Ta Kyel i Jwon 21 - Findel i DeeƁwe Ti Alis i Ron

Yerushalima Mumwai

¹ Unai i ɗing fit mumwai hu naya mumwai. Fit muwili hu naya muwili si nzekus. Yiir hwak fotus ndarak

² I ɗing ndii ti Ashwa Musapai, Yerushalima mumwai, yit muɗor ta fit kyel i DeeƁwe fota yamwan muɗesi tima si ru'ut arom ɓa ti shwai hu re amet.

³ I hal la mbai nin taanja ta kunggul i kaitat ni, “Ɗingai, wur i DeeƁwe mwashi ma akul hu ɗufal! Ma wa mute akul hu sin, sin si wa mute ii ɗufal ames. DeeƁwe ti haisus ma wa mute akul hu sin, u te ii DeeƁwe ames.

⁴ Ma wa fyalsus filya ya ta shishat shak. Mot ti wa muhum mute na kwa, hu shaat, hu kawa, hu shum, ɓurti ɗamam muwili si lang ta.”

⁵ Yis ima ma amun si kunggul ti kaitat hai ni, “Ɗingai, i masti ɗamam shak ii mamwai!” Ɗak nyun, “Woronga mai, ɓurti a kyas i findel hu mwawei.”

⁶ Ɗak hum nyaisun, “Si mbit ndai! Ayin a Alfa hu Omega, i mii Bya' hu i Dala. Shak maɗufal ima myaf i wa fasus ham i kwar i mupweti u wo kaciwa' tali.

⁷ Shak som ima si cu uges, si wa cwai ti kop i ɗamam mii shak, i wa mute ii DeeƁwe ames, si wa mute ii fe amen.

⁸ “Ɗak som ɓwinggil, hu som ima si fa mwawei kwa, hu som i zuruk, hu som for ti ɗufal, hu som i arak i zuruk, hu som i masti sukuyat, hu som i cwai ti harkyel afut, hu shak som fyaratat, kyel i mute ames a yiir i man macwai fwet. A mai mii mot mapil.”

⁹ Unai andek ta saa ti som lu' pyoron ima si ti kwangai i worowa pyoron i dala yes nyun, “Ya! I wa kofsa ti yamwan, mbor ti Al Marai.”

¹⁰ Unai zanun ta Rin wi wa tun si hai mbai anggash masyai, kofun ti Ashwa Musapai, Yerushalima yit muɗor ta fit kyel i DeeƁwe.

¹¹ Ashwai ti mati kweneng i cinjangat i DeeƁwe, yit nzilwit fota nzyu i kaper macef, fota kaper ima si lai ii jaspa mapeli syak.

¹² Bang i ashwai mii mabangi, sisya fwet, mati kwapap hure mulang apil, yis ti som lu' hure mulang apil ima si ɗing ti foi kwapapi. Si worong asumam i ɗarai i Isar'ila hure mulang apil si kwapapi hai.

¹³ Kwapap ataat si ta ɓwai i muɗu i ɓwe, ataat si ta ɓwai yai, ataat si ta ɓwai a wuri, ataat si ta ɓwai i ɓwe ti ndak.

¹⁴ Bang i ashwai mati mahuhur hure mulang apil, si afyaiyi hai si worong asumam i fe i muro hure mulang apil i Al Maraiyi ii hai.

¹⁵ Malu' ima findeluni mati yal ti ugbwirik mujuwi ti mbati ashwai, hu kwapap amet, hu bang ameti.

¹⁶ Sisyat i ashwai ta baangi ta wa fiti a ɗama andek. Unai malu'i mba ashwai ti yal ti ambai, wis kilomita nggal apil ta ndik apili 2,200.

¹⁷ Malu' i mba riringat i bangi, wis ndik apil, ta ngga' ima maɗufal mba amba ta malu'i mba ta andi.

¹⁸ Si ta' bangi ti kaper macef ima si lai ii jaspa, ɗak si ta' ndii ti ashwai ti ugbwirik tima si cinjak ya pipel syak fota matalal.

¹⁹ Si ta' mahuhur i bangi ti musut i kaper ani shak, si kol hure mulang apil. I bya'i a jaspa, mupil a safaya, mataati a calsadoni, ma ɓarasi a emeral,

²⁰ mahara a sadoniks, mataani a Kanelya, mapyoron a topas, mamyarfu' a beril, makarfu' a topas, mu hure a krisopiras, mamulang andek a jasin, mamulang apil a ametis.

²¹ Kwapap hure mulang apili si masi ti kaper manzyuwi ma asum purl, kwapapi shak si masi ti purl zum. Si mas fiselal i ashwai ti ugbwirik ima si cinjak ya, yit nzilwit ya pyas fota matalal.

²² I ɗing wur i DeeƁwe ta wii i ashwai kwa, ɓurti a Deembai DeeƁwe Mambaitat hu Al Maraiyi a sin si mii wuri.

²³ Ashwai ti mati tirim i muka' i ɓwe hu ture kwa, ɓurti cinjangat i DeeƁwe ma fasut kweneng, Al Maraiyi ayis mii pitila ti ashwai.

²⁴ Ramam si wa ati ta kweneng wii, kaya i naya si wa murang ta ashwai ti cinjangat ames shak.

²⁵ Si wa voti kwapapi ya kwa fweng i myan hu myan, ɓurti fo' mata kyeli kwa fweng.

²⁶ Shak ramam si wa yes ta cinjangat ta ngyei wi ta wii ashwai.

²⁷ Ɗama ima mati zuruk ma wa mulang ta ashwai kwa fweng, hu ma masti ɗama i shusho hu ma fyarat. A som ima asumam ames mata Kaada i Mupwet i Al Marai je si wa mulang ta.